မန္တလေး၊ ချမ်းမြသာစည်မြို့နယ်နဲ့ အောင်မြေသာစံမြို့နယ်တို့မှာ မီးလောင်မှု ၂ ကြိမ် ဖြစ်ပွားခဲ့ပြီး လူနေဆိုင်ခန်းတွေနဲ့ ကား ၁ စီး၊ ဆိုင်ကယ် ၃ စီး မီးလောင်ပျက်စီးခဲ့တယ်လို့ မြန်မာမီးသတ်ဌာနချုပ်က ထုတ်ပြန်ပါတယ်။

အောင်မြေသာစံမြို့နယ်၊ ဥပုသ်တော်ရပ်ကွက်၊ ၇၆ လမ်း၊ ၄ လမ်း × ၅ လမ်း၊ စည်သာလမ်းကြားမှာ မတ်လ ၅ ရက် မနက် ၄ နာရီခွဲလောက်က မီးလောင်မှု ဖြစ်ပွားခဲ့တာကြောင့် Level 1 အဆင့် မီးငြှိမ်းသတ်ရေးယာဉ်အုပ်စုတွေ လာရောက်ငြှိမ်းသတ်ခဲ့ကြပါတယ်။

မီးလောင်မှုဟာ ‌၁၀ ပေ × ပေ ၅၀ အတွင်း ဖွင့်လှစ်ထားတဲ့ ခေါက်ဆွဲဆိုင်ကနေ စတင်ခဲ့တာလို့ သိရပြီး မီးလောင်မှုကြောင့် ခေါက်ဆွဲဆိုင် အပါအဝင် ဆိုင်ခန်း ၅ ခန်းနဲ့ လူနေအိမ် ၁ လုံး ပျက်စီးဆုံးရှုံးခဲ့ပါတယ်။

အရပ်ဘက်အသင်းဝင်တဦးက “ဆိုင်တန်း ၁ တန်းနဲ့ အိမ် ၁ လုံး ပါသွားတယ်။ ဆိုင်တန်းမှာ အတွဲလိုက် ၅ ခန်းရှိတယ်။ ဖုန်းဆိုင်၊ ဖိနပ်ဆိုင်၊ အထည်ဆိုင်တွေပါ။ ၁၀ ပေပတ်လည်လေးတွေ” လို့ ပြောပါတယ်။

မီးလောင်မှုကြောင့် လူထိခိုက်ဒဏ်ရာရမှု မရှိဘူးလို့ သိရပြီး မီးသတ်နဲ့ အရပ်ဘက် ပူးပေါင်းငြှိမ်းသတ်ခဲ့တာကြောင့် မနက် ၄ နာရီ မိနစ် ၅၀ မှာ မီးထိန်း၊ ၄ နာရီ ၅၅ မိနစ်မှာ မီးငြိမ်းသွားပါတယ်။

ချမ်းမြသာစည်မြို့နယ်၊ ၄၈ လမ်း × ၄၉ လမ်း မနော်ဟရီလမ်းရှိ လိုတရ ဆီဆိုင်မှာ မတ်လ ၄ ရက် ညနေ ၃ နာရီ ၅၈ မိနစ်လောက်က Level 1 အဆင့် မီးလောင်မှု ဖြစ်ပွားခဲ့ပါတယ်။

မီးလောင်မှုဟာ ဆီဆိုင်ကို 92 ဆီလာပို့တဲ့ ဂါလံ ၃,၂၀၀ ဆန့် ဆီဘောက်ဆာယာဉ်ကနေ ဆီသိုလှောင်ကန်ကို ဖြည့်သွင်းနေရင်း မီးပွားစင်ကာ ဆိုင်ကယ် ၃ စီးနဲ့ Lexus LX 570 အိမ်စီးကား ၁ စီးကို ကူးစက်လောင်ကျွမ်းခဲ့တာ ဖြစ်ပါတယ်။

မြို့နယ်မီးသတ်တပ်ဖွဲ့ဝင်တဦးက “ဆီလာဖြည့်တဲ့ အိမ်စီးကား အဖြူတစီးနဲ့ ရပ်ထားတဲ့ ဆိုင်ကယ် ၃ စီးတော့ ပါသွားတယ်။ မြေအောက်ကန်အထိတော့ မီးမကူးဘူး။ ဆီလက်ကျန်ရှိတာတွေတော့ လောင်သွားတယ်။ အသေးစိတ်တော့ စစ်ဆေးနေဆဲပါ” လို့ ပြောပါတယ်။

မီးသတ်နဲ့ အရပ်ဘက်အသင်းတွေက ပူးပေါင်းငြှိမ်းသတ်ခဲ့တာကြောင့် ညနေ ၄ နာရီ ၄ မိနစ်မှာ မီးထိန်း၊ ညနေ ၄ နာရီ ၅ မိနစ်မှာ မီးငြိမ်းသွားပါတယ်။

မီးလောင်မှု ၂ ကြိမ်အတွင်း လူထိခိုက်ဒဏ်ရာရမှု မရှိဘူးလို့ သိရပြီး ပျက်စီးမှုတန်ဖိုး အသေးစိတ်ကို သက်ဆိုင်ရာ မြို့နယ်မီးသတ်တပ်ဖွဲ့တွေက စစ်ဆေးတွက်ချက်နေဆဲ ဖြစ်ပါတယ်။

ဓာတ်ပုံ- မန္တလေးတိုင်းမီးသတ်