အမေရိကန်စစ်တပ်ရဲ့ လျှို့ဝှက် စက်ရုပ်အာကာသယာဉ် X-37B ဟာ သူ့ရဲ့ သတ္တမမြောက် မစ်ရှင်ကို ဒီဇင်ဘာ ၂၈ ရက်မှာ ဖလော်ရီဒါကနေ လွှတ်တင်ခဲ့ပြီး ဒါဟာ အရင်ကထက် ပိုမြင့်မားတဲ့ ပတ်လမ်းကို ပို့ဆောင်ပေးနိုင်စွမ်းရှိတဲ့ SpaceX Falcon Heavy ဒုံးပျံကို ပထမဆုံး လွှတ်တင်နိုင်မှုလည်း ဖြစ်ပါတယ်။

ဒုံးပျံအူတိုင် ၃ ခုနဲ့အတူ ဖွဲ့စည်းထားတဲ့ Falcon Heavy ဒုံးပျံကို ကနာဗရယ်လ် အငူရှိ နာဆာရဲ့ ကနေဒီ အာကာသစခန်းမှ လွှတ်တင်ရေးစင်မြင့်ကနေ ညအချိန် လွှတ်တင်ခဲ့တာဖြစ်ပြီး ဒါကိုလည်း SpaceX ဝက်ဘ်ဆိုက်မှာ တိုက်ရိုက်ထုတ်လွှင့်ခဲ့ပါတယ်။

X-37B ကို လွှတ်တင်ပြီးနောက်မှာ Falcon ရဲ့ ဘေးပိုင်း အားဖြည့်ကိရိယာတွေက ကမ္ဘာမြေပေါ်ကို ဘေးကင်းကင်း ပြန်ရောက်ရှိလာပါတယ်။

အမေရိကန်စစ်တပ်ရဲ့ အမျိုးသားလုံခြုံရေး အာကာသလွှတ်တင်ရေး အစီအစဉ်အရ X-37B မစ်ရှင်ကို အမေရိကန် အာကာသတပ်ဖွဲ့မှ ဦးစီးကျင်းပတာဖြစ်ပြီး ပင်တဂွန်ဟာ X-37B မစ်ရှင်နဲ့ပတ်သက်တဲ့ အသေးစိတ် အချက်အလက် အနည်းငယ်ကိုသာ ထုတ်ပြန်ခဲ့ပါတယ်။

အခုပစ်လွှတ်မှုဟာ ပြီးခဲ့တဲ့ ၂ ပတ်ကျော်လောက်က မှားယွင်းမှုတွေ၊ နှောင့်နှေးမှုတွေနဲ့ စတင်ခဲ့တာပါ။

ရာသီဥတု ဆိုးရွားမှုနဲ့ အတိအကျ မသိရတဲ့ နည်းပညာဆိုင်ရာ ပြဿနာတွေကြောင့် အစောပိုင်းလွှတ်တင်မှု ၃ ကြိမ်ကို ဖျက်သိမ်းခဲ့ရပါတယ်။

ဒါ့ကြောင့် ကြာသပတေးနေ့ ပစ်လွှတ်မှုမတိုင်ခင်က မြေပြင်မှ ဝန်ထမ်းတွေဟာ အာကာသယာဉ်ကို သူ့သိုလှောင်ခန်းထဲ ပြန်ထည့်ဖို့တောင် ပြင်ဆင်ခဲ့ကြပါသေးတယ်။

ရှန်လုံ သို့မဟုတ် နတ်နဂါးကြီးလို့ နာမည်ပေးထားတဲ့ တရုတ်နိုင်ငံရဲ့ ကိုယ်ပိုင်စက်ရုပ် အာကာသယာဉ်ကို သူ့ရဲ့ တတိယမြောက်မစ်ရှင်အနေနဲ့ ပတ်လမ်းကြောင်းထဲကို လွှတ်တင်ပြီးနောက် ၂ ပတ်အကြာမှာ အမေရိကန်က အခု X-37B  လျှို့ဝှက် စက်ရုပ်အာကာသယာဉ်ကို  လွှတ်တင်လာတာဖြစ်ပြီး အာကာသနယ်ပယ်မှာလည်း အမေရိကန်-တရုတ် အပြိုင်အဆိုင်ထဲမှာ အသစ်တခု ထပ်ပေါ်လာတာလို့ ဆိုပါတယ်။

Source/Photo-Reuters