ထိုင်းနိုင်ငံ၊ တော့ခ်ခရိုင်၊ မဲဆောက်မြို့အထွက်မှာ တရားမဝင် ဝင်ရောက်လာတဲ့ မြန်မာနိုင်ငံသား ၃၄ ဦးကို  နိုဝင်ဘာ ၁၈ ရက် မနက်ပိုင်းမှာ ထိုင်းရဲတပ်ဖွဲ့က ဖမ်းဆီးရမိခဲ့တယ်လို့ Daily News သတင်းဌာနမှာ ဖော်ပြပါတယ်။

မြန်မာအလုပ်သမားအများအပြားကို ကားနဲ့တင်ဆောင်လာမယ်လို့ မြန်မာနိုင်ငံသားတဦးက သတင်းပေးလို့ တာ့ခ်ခရိုင်ရဲတပ်ဖွဲ့၊ ထောက်လှမ်းရေးတပ်ဖွဲ့နဲ့ ဖဝေါရဲတပ်ဖွဲ့တို့က မဲဆောက်မြို့အထွက် ယွေ့ယဥစစ်ဆေးရေးဂိတ်၊ မဲဆောက်-တာ့ခ်ကားလမ်း တလျှောက်နဲ့ ဘန်ဖကာနဲ့ ဆက်သွယ်ထားသော ဘန်ဟေးယာဥကျေးရွာရှိ သစ်တောအတွင်းတို့မှာ အဖွဲ့ ၃ ဖွဲ့ခွဲကာ နေရာယူ စောင့်ဆိုင်းနေခဲ့ကြတာပါ။

မနက် ၄ နာရီလောက်မှာ ယွေ့ယာဥစစ်ဆေးရေးဂိတ်ဘက်ကို ပစ်ကပ်ကား ၂ စီး မောင်းနှင်လာတာ တွေ့ရလို့ စစ်ဆေးခဲ့ရာ  ပထမကားမှာ ထိုင်းနိုင်ငံသား ၂ ဦးနဲ့ တရားမဝင် မြန်မာနိုင်ငံသား ၁၅ ဦး၊ ဒုတိယကားမှာ ထိုင်းနိုင်ငံသား ၂ ဦးနဲ့ တရားမဝင်မြန်မာနိုင်ငံသား ၁၉ ဦးတို့ ဖမ်းဆီးရမိခဲ့ပါတယ်။

ထိုင်းဆယ်ကျော်သက် ၄ ဦးက မြန်မာနိုင်ငံသား ၃၄ ဦးကို မြဝတီမှတဆင့် ဘန်ကောက်မြို့ကို အလုပ်သွားလုပ်နိုင်ဖို့ ပို့ဆောင်ပေးတာလို့ ဝန်ခံခဲ့ကြောင်း တာ့ခ်ခရိုင်ရဲတပ်ဖွဲ့က ထုတ်ပြန်ပါတယ်။

ဖမ်းဆီးရမိခဲ့တဲ့ ထိုင်းနိုင်ငံသား ၄ ဦးနဲ့ မြန်မာနိုင်ငံသား ၃၄ ဦးတို့ကို ဖဝေါရဲစခန်းမှာ ဆက်လက်စစ်ဆေးနေပြီး ဥပဒေနဲ့အရေးယူသွားမယ်လို့ ထိုင်းသတင်းမှာ ဖော်ပြထားပါတယ်။

Source/Photo - Daily News