(က)

ရေနွေးကြမ်းဝိုင်းမှာ အဘစောမူးသာတို့ စစ်ပြန်ကြီးအဘလုံးတုံးတို့၏ မျက်နှာများကား ကြည်လင်ဝင်းပလျက်ရှိကြသော်ငြား စိမ်းသရဖူစိမ်း ရပ်ကျေးအစိမ်းဥက္ကဋ္ဌ အဘ စိမ်းမောင်တို့ သူ၏တပည့် စိမ်းဆိုမှစိမ်း အဘစိမ်းလွင်တို့၏ မျက်နှာများကား မှိုင်းမှုန်နေတာကို မြင်ရပါလေ၏။

"လက်ရှိအခြေအနေကို သဘောပေါက်တယ်နော် စိမ်းမောင်တို့ "

"ဘာကိုပြောတာလဲ၊ ဘာတွေကို သဘောပေါက်ရမှာလဲ "

" ဟဲ ဟဲ ဟဲ ဟဲ ဟဲ ဟဲ . . . စိမ်းမောင် . .စိမ်းမောင် . . . မသိခြင်ထောင် ထောင်နေတာကြီးက ရယ်စရာကြီးကွာ "

" ဝါး . . . . ဟားဟား ဟားဟား ဟားဟား "

ထရယ်လိုက်ကြရာ အဘစိမ်းမောင်ကော အဘစိမ်းလွင်ပါ စပ်ဖျဉ်းဖျဉ်းဖြစ်သွားကြပါလေ၏။

ကြင်စိုး သာ၀ မအလ၏ လက်ရှိအခြေအနေကို အရွှင်အဘတွေက မြင်သမျှ ပြောကြပါလေရာ

' ဘဘစိမ်း ' တို့ထံမှ တုံ့ပြန်စကားတွေ ထွက်လာပါလေ၏။

" စခန်းတွေသိမ်းလည်း ခဏပါကွာ . . . "

" အခုဟာက မြို့တွေပါ သိမ်းနေတာကွ "

" မြို့တွေသိမ်းလည်း ခဏပေါ့ကွာ၊ ကြာရှည်တော့ ရမလားဟ . . . "

"စခန်းတွေ၊ မြို့တွေ၊ တင့်ကားတွေ၊ သံချပ်ကာကားတွေ၊ တိုက်လေယာဉ်တွေပါ မင်းတို့အဘ မအလက အလှူကြီးပေးနေတာပါဗျား "

" ဝါး . . . . ဟားဟား ဟားဟား ဟားဟား "

"အခုတော့ သူ့ရဲ့ စစ်သည်တော်တွေကိုပါ နေရာအနှံ့မှာ ဖြန့်ကြက်ပြီး လှူနေပြန်ပြီလေ "

" ဟေ . . . အဲ . . . "

" အရင်တုန်းက မင်းတို့ရဲ့မအလတွေက သေနတ်ကလေးတဆဆ အာဏာကလေးတပြပြနဲ့ အော်ဟစ်ကြိမ်းမောင်းခဲ့ကြတာ မှတ်မိသေးလား"

" ဘာကို ပြောတာလဲ "

" ' သေရဲတဲ့ကောင်ထွက်ခဲ့' ဆိုတာလေကွာ "

" အဲ . . . . . . "

"အခုတော့ မသေရဲတဲ့ဖက်ဆစ်ကောင်တွေက ' အလံဖြူ  ' လေးတွေတပြပြနဲ့ ကျီးလန့်စာစား မျက်နှာသေကလေးတွေနဲ့ ပြည်သူ့ကာကွယ်ရေးတပ်တွေဆီကို လက်နက်ချနေရပြီ "

"အဲသလို လက်နက်ချတာ လူနည်းစုပါကွာ "

" အေး . . . မင်းတို့ အစွန်းရောက် စိမ်းသရဖူစိမ်း ဘောမတွေ ခဏပဲစောင့်ကြည့်လိုက်လေ၊

သိပ်မကြာခင်မှာ မအလတပ်တွေ အကုန်လုံး လက်နက်ချကိုချကြတော့မှာ "

" . . . . . . "

" နှစ်မကုန်ခင် မအလတပ်တွေအကုန် အမြင်မှန်ရပြီး ပြည်သူ့ရင်ခွင်ကို ခိုလှုံကြတော့မှာ။ နေပြည်တော်မှာ ကျန်ခဲ့မယ့် စစ်သားဆိုလို့ မအလနဲ့ စစ်ရေးပြကွင်းက အရုပ်ကြီး ၃ ရုပ်ပဲ ရှိတော့မှာကွ စိမ်းမောင်ရ "

" ဝါး . . . ဟားဟား ဟားဟား ဟားဟား "

(ခ)

" မင်းတို့ကိုးကွယ်တော်မူနေတဲ့ ကြင်စိုး သာ၀ မအလဆိုတဲ့ အယုတ်တမာကောင်ဟာ ခုဆိုရင် အဲသည်လို လျော့ပါးသွားတဲ့ စစ်သားတွေနေရာမှာ Non CDM ဝန်ထမ်း တွေကိုလက်နက်တပ်ဆင်ပေးပြီး အသေခံ ခိုင်းဖို့ ကြိုးစားနေပြန်ပြီလေကွာ "

" ဟုတ်လို့လားကွာ "

" သေချာသပေါ့ စိမ်းမောင်ရာ၊ အာဏာရှင် ဆိုတာ သူ့မိသားစုအကျိုးကလွဲလို့ ဘာကိုမှ ညှာတာထောက်ထားလိမ့်မယ် မထင်နဲ့၊ အခု ရုံးတက်နေတဲ့ဝန်ထမ်းတွေဟာ မအလနဲ့ သူ့မိသားစုကို သေနတ်ကိုင် အသေခံပြီး ကာကွယ်ပေးကြရဦးတော့မယ် "

" ဟှူး. . . . . . ဝှူး . . . . "

အဘစိမ်းမောင်နှင့် အဘစိမ်းလွင်တို့ထံမှ ပြိုင်တူသက်ပြင်းချသံကို ကြားကြရပါ၏။

နေပြည်တော်မှာ သူတို့၏ တူ တူမ အရင်း ဝန်ထမ်းတွေရှိနေကြသမို့ သည်သတင်းတွေကို သူတို့လည်း ကြို၍သိထားကြပြီးဖြစ်လေသည် မဟုတ်ပါလား။

" အေး . . . အခု တောထဲတောင်ထဲမှာရောက်နေတဲ့ ခေတ်ပညာတတ် PDF လူငယ်လေးတွေကို အထင်မသေးနဲ့ကွ၊ မင်းတို့ပြောပြောနေတဲ့ နှစ် ၇၀ ရှိပါပြီဆိုတဲ့ခေတ်မီတပ်မတော်ဆိုတာကြီးကို ၃ နှစ် မပြည့်ခင် ပြိုအောင်ဖြိုတော့မှာ "

" . . . . . . . "

" ကဗျာဆရာ မောင်မောင်ငြိမ်းအေးရဲ့ ကဗျာလေးတစ်ပုဒ် ရှိတယ်ကွ "

" ရွတ်ပြပါအုံး မူးသာရ "

" အေး အေး ရွတ်ပြမယ် လုံးတုံး "

သူ့ဖုန်းထဲမှာ ရှာပါလေ၏။ တွေ့ပြီကွ ဆိုကာ ရေနွေးကြမ်းတစ်ခွက်မော့ရင်း လည်ချောင်း ရှင်းပါ၏။ ကဗျာခေါင်းစဉ်လေးက ' အချိန် ' တဲ့ကွဟုဆိုကာ ရွတ်ပြပါ၏။

" အလောင်းကောင်က

သူ့နဖူးကကျည်ဆန်ကိုယူကြည့်တော့။

လွန်ခဲ့တဲ့သုံးနှစ်က

သူပစ်ခဲ့တဲ့ကျည်ဆန်ဖြစ်နေတာတွေ့ရပေါ့ "

ကဗျာလေးက ကဗျာဆန်လိုက်တာကွာဟု အဘလုံးတုံးက မှတ်ချက်ပြုပါ၏။ ပြီးတော့ သူ့ဆီမှာလည်း ခေတ်ပညာတတ် PDF လူငယ်လေးတွေနဲ့ပတ်သက်တဲ့ ကဗျာလေးတွေရှိတယ်ကွဟု ဆိုကာ ပြန်ရှာနေပါ၏။ ခဏအကြာမှာ " တွေ့ပြီကွ " ဟုဆိုပြီး ငါလည်းရွတ်ပြမယ်ဟု ပြောပါ၏။

"ဘယ်သူ့ကဗျာလဲ လုံးတုံး "

" ဆရာမင်းထင်ကိုကိုကြီးရဲ့ ကဗျာကွ၊ ကဗျာ ခေါင်းစဉ်က ' အလွမ်း ' တဲ့ကွ "

ပြီးတော့ သူ၏ဘယ်သံကြီးဖြင့် ပီပီသသရွတ်ဆိုပြပါ၏။

" ခဏဆိုပြီး ထွက်လာခဲ့တုန်းက

ဖိနပ်တောင် မပါခဲ့ဘူး။

အခုနေ

အိမ်ပြန်ရမယ်ဆိုရင်

ခြေထောက်တစ်ဘက် ပြန်မပါတော့ဘူး။

ဖိနပ် မပါပါ

ခြေထောက် မပါပါ

အသက်ကလေး ပါတုန်း

အိမ်ပြန်ချင်တယ် "

(ဂ)

စိမ်းသရဖူစိမ်းအဘများကား အိမ်ပြင်သို့လှမ်း၍ငေးနေကြကာ သက်ပြင်းပူတွေသာ ခိုးခိုး ချနေကြပါလေ၏ ခင်ဗျာ။ အဘစောမူးသာနှင့် အဘလုံးတုံးတို့က ပြုံးစိပြုံးစိမျက်နှာကြီးများနှင့် ဖေကြီးကို လှမ်းလှမ်းကြည့်ကြပါ၏။

" ကြင်စိုး သာ၀ မအလမှာ ' အချိန် ' လုံး၀ မရှိတော့ဘူးကွ။ ' တိုက်တိုင်းပြောင် 'ဘဝကနေ ' တပ်တိုင်းပြေး ' ဘဝဆိုးကြီးကိုရောက်ရှိနေပြီဆိုတော့ကာ များမကြာ ခင်မှာပဲ ဒီအယုတ်တမာကောင်ကြီးဟာ' ပြေး ' ကိုပြေးရတော့မှာ "

" အဲသလိုပဲဖြစ်လာမှာပါ လုံးတုံးရာ "

" ကျိန်းသေပေါ့ကွ မူးသာရ "

" မင်းတို့ပြောတာတွေက ဖြစ်နိုင်ပါ့မလား "

" ဖြစ်နိုင်ပြီလား စိမ်းမောင်ရာ၊ မင်းတို့စိမ်းသရဖူစိမ်းတွေရဲ့ရှေ့ဆောင်  (---မ) မောင် မောင်တွေဖြစ်တဲ့ မိုးဟိန်းတို့၊ အောင်မင်းတို့၊ ကျော်မျိုးမင်းတို့၊ ကျော်စိုးဦးတို့၊ ဖားမင်းဆွေတို့လို အယုတ်တမာကောင်တွေ တောင်မှ မအလ ခုခံချိန်မရတော့ပဲ ' လစ် 'ရတော့မှာ ကျိန်းသေနေပြီဆိုတာကို ကြိုတင်သုံးသပ်နေကြပြီလေကွာ "

" ဟှူး . . . . ဝှူး. . . . . "

" သေနင်္ဂဗျူဟာ  ရှေးကဗျာထဲကလိုပဲပေါ့၊ စစ်သည်အင်အား လက်နက်အင်အား ပိုမိုသာလွန်ပေမဲ့လည်း ပြည်သူလူထုရဲ့ ထောက်ခံမှုမရရင် အဲသည်တပ် ရှုံးမှာပဲ "

" အေးကွ . . . အခုလည်း ' တူမီး ' လေးတွေနဲ့ မီးကျိုး မောင်းပျက်ကလေးတွေနဲ့ ခုခံခဲ့ကြတဲ့ တရားသောစစ်ဟာ ပြည်သူလူထုရဲ့ထောက်ခံမှုနဲ့ အောင်ပွဲတွေရခဲ့တာတော့ လက်တွေ့ပေါ့ကွာ "

အစိမ်းအဘတွေကား ဘာမှမဆိုင်သလိုလို ဘာမှမကြားသလိုလို ငူငူငေါင်ငေါင်ကြီးတွေ ခင်ဗျ။ အရွှင်အဘတွေကလည်း စကားဝိုင်းထဲဆွဲခေါ်ကာ ကြပ်ကြပါလေ၏။

" သိပ်မကြာခင်မှာ မင်းတို့လို အစိမ်းတွေကို လာခေါ်ပြီး လက်နက်တပ်ဆင်ပေးမယ်၊ ပြီးရင် ရှေ့တန်း တန်းပို့မှာတဲ့ကွ "

" ဟေ . . . . . . "

" အေး . . . ရှေ့တန်းရောက်တာနဲ့ ဘာမှလုပ်မနေနဲ့၊ အောက်ခံစွပ်ကျယ်အဖြူလေးတွေကို ချွတ်ထားပြီး ' အလံဖြူ  ' လေးတွေရယ်ဒီလုပ်ပြီးထောင်ထားလိုက်၊ အိုကေပဲ "

" အဲ . . . . . . "

တကယ်တော့ ကြင်စိုး သာ၀ မအလကို မနေကြတဲ့သူတွေလည်း မအလရဲ့ နိဂုံးကို ' သိ ' နေကြပါပြီ။ ဘယ်နေ့ဘယ်ရက်ကိုယ်လွတ်ရုန်းပြီးထွက်ပြေးမလဲဆိုတာ သူ တို့လည်း စောင့်ကြည့်နေကြတာပါ။ ဒါပေမဲ့လည်း ' ဟန်ကိုယ့်ဖို့ ' လုပ်နေကြဆဲပါ။

စကားဝိုင်းကား နိဂုံးချုပ်လေပြီ။ အဘစောမူးသာက လိုင်းပေါ်မှာတွေ့သည့် ' အကျိုးဆိုသော ကဗျာကလေးကို ရွတ်ဦးမယ်ကွာဟုဆိုပြီး အသံနှင့် ဋ္ဌာန်နှင့် ပီသကြည်မြစွာ ရွတ်ဆိုပြပါလေ သတည်း။

" ပြည့်ဝမ်းကိုလည်း ဖောက်သော

ပြည့်ဦးကင်းကိုလည်း နှိမ်သော

ပြည့်တံခွန်ကိုလည်း လှဲသော

ပြည့်မျက်စိကိုလည်း ထုတ်သော

ပြည့်အစွယ်ကိုလည်း ချိုးသော

ပြည့်မျက်နှာကိုလည်း ဖျက်သော

ပြည့်ခြေပြည့်လက်ကိုလည်း ဖြတ်သော

ဟယ် . . . အကြင်သူယုတ်။

သင်ပြုသမျှကံကား

သင့်ထံ ပြန်လာနေချေပြီ။

အသင့်ပြင်ထားလော့ "

ဖေကြီး(လေရှီး)