ရန်ကုန်၊ မင်္ဂလာဒုံမြို့နယ်၊ အောင်မင်္ဂလာအဝေးပြေးထိပ်ရှိ အမှတ် ၃ လမ်းမကြီး၊ ကားမှတ်တိုင်အနီးမှာ နိုဝင်ဘာ ၁၇ ရက် မနက်ပိုင်းက ကထိန်အလှူခံမဏ္ဍပ်ကို YBS 92 ယာဉ် ဝင်တိုက်မိပြီး ၁ ဦးသေ၊ ၄ ဦးဒဏ်ရာရရှိသွားတယ်လို့ ပုလဲအရန်မီးသတ်တပ်ဖွဲ့က ပြောပါတယ်။
မင်္ဂလာဒုံ ၃ လမ်းဆုံ မီးပွိုင့်ဘက်ကနေ မြောက်ဥက္ကလာဘက်ကို မောင်းနှင်လာတဲ့ အဝေးပြေးကား YBS ဟာ အရှိန်မထိန်းနိုင်ဘဲ တက္ကစီတစီးနောက်ပိုင်းကို ဝင်တိုက်မိပြီး အလှူခံမဏ္ဍပ်ကို ထပ်မံတိုက်ကာ လမ်းဘေးရှိ ဓာတ်တိုင်ကို ထပ်မံတိုက်မိခဲ့တာ ဖြစ်ပါတယ်။
ပုလဲအရန်မီးသတ်တပ်ဖွဲ့ဝင်တဦးက “အဝေးပြေးထိပ်နားက အလှူခံမဏ္ဍပ်ကို YBS က ဝင်တိုက်မိတာပါ။ YBS ကားက မင်္ဂလာဒုံကနေ မြောက်ဥက္ကလာပဘက်ကို လာတာ။ တက္ကစီကိုတိုက်မိပြီး မဏ္ဍပ်ကိုထပ်တိုက်၊ လမ်းဘေးဓာတ်တိုင်ကို ဆက်တိုက်မိတာ။ အသက် ၆၀ အမျိုးသား ၁ ဦး သေဆုံး၊ လူ ၄ ဦးဒဏ်ရာရသွားပါတယ်။ DB ကိုတော့ မေဓာဝီဆေးရုံကို ပို့ပေးထားပါတယ်” လို့ ပြောပါတယ်။
ယာဉ်တိုက်မှုကြောင့် မဏ္ဍပ်အတွင်း အလှူခံနေသူ အသက် ၆၀ အရွယ် အမျိုးသားတဦးမှာ ကားဘီးအောက်ငြိ ဒဏ်ရာရရှိကာ သေဆုံးသွားပြီး ကားမှတ်တိုင်အနီးရှိ လူ ၄ ဦးမှာ ပွန်းပဲ့ပြတ်ရှဒဏ်ရာတွေ ရရှိခဲ့ပါတယ်။
သေဆုံးသူနဲ့ ဒဏ်ရာရရှိသူတွေကို အရပ်ဘက်ကယ်ဆယ်ရေးယာဉ်၊ ပုလဲအရန်မီးသတ်က လူနာယာဉ်တွေနဲ့ မြောက်ဥက္ကလာပမြို့နယ် မေဓာဝီဆေးရုံကြီးကို ပို့ဆောင်ပေးခဲ့တယ်လို့ သိရပါတယ်။
ပြီးခဲ့တဲ့ ၂၀၂၃ ဧပြီ ၃၀ ရက်ကလည်း မင်္ဂလာဒုံ၊ ပုလဲလမ်းဆုံအနီး ကုဋေကြွယ် လက်ဖက်ရည်ဆိုင်အရှေ့ အမှတ် ၃ လမ်းမပေါ်မှာ စက်ရုံဝန်ထမ်းတဦးကို YBS 92 က ဝင်တိုက် တက်ကြိတ်ခဲ့လို့ သေဆုံးသွားပါတယ်။
