အစ္စရေးအသင်းဟာ နိုင်ငံမှာဖြစ်ပွားနေတဲ့ တိုက်ပွဲတွေနဲ့ပတ်သက်လို့ လျစ်လျူရှုမထားနိုင်ပေမဲ့ ၂၀၂၄ ဥရောပခြေစစ်ပွဲ အောင်နိုင်ရေးကိုတော့ မျှော်လင့်နေဆဲလို့ အစ္စရေးနည်းပြက ပြောကြားလိုက်ပါတယ်။
အစ္စရေးအသင်းဟာ ယူရိုခြေစစ်ပွဲအဖြစ် တနင်္ဂနွေနေ့က ကစားခဲ့တဲ့ ကိုဆိုဗိုနဲ့ပွဲစဉ်မှာ ၁ ဂိုး ဂိုးမရှိနဲ့ ရှုံးနိမ့်ခဲ့ပြီးနောက် နည်းပြဖြစ်သူက အခုလို ပြောဆိုခဲ့တာပါ။
ဒီပွဲစဉ်ဟာ အောက်တိုဘာ ၇ ရက် ဟားမတ်စ်တို့ရဲ့ တိုက်ခိုက်ခံရမှုဖြစ်စဉ်နောက်ပိုင်း ပထမဆုံးအကြိမ် ကစားရတဲ့ပွဲလည်း ဖြစ်ပါတယ်။
အစ္စရေးအသင်းဟာ ခြေစစ်ပွဲစဉ် အုပ်စုအဆင့်မှာ ၇ ပွဲကစား ၁၁ မှတ်နဲ့ အဆင့် ၃ နေရာမှာ ရှိနေပြီး ၈ ပွဲကစားထားတဲ့ ကိုဆိုဗိုနိုင်ငံအသင်းထက် ၁ မှတ်အသာ ရရှိထားတာပါ။
အစ္စရေးအသင်းဟာ ၁၉၉၄ ခုနှစ်မှာ UEFA အဖွဲ့ဝင်နိုင်ငံ ဖြစ်လာပြီးနောက် ပထမဆုံးအကြိမ် ယူရိုပြိုင်ပွဲ ယှဉ်ပြိုင်ခွင့်ရဖို့ မျှော်လင့်ထားတာပါ။
နိုင်ငံအသင်းအနေနဲ့ နောက်ထပ် ခြေစစ်ပွဲ ၂ ပွဲ ထပ်မံကစားဖို့ ရှိနေပြီး နိုဝင်ဘာ ၁၅ ရက်နေ့ ဟန်ဂေရီမှာ ဆွစ်ဇာလန်အသင်းနဲ့ ယှဉ်ပြိုင်ရမှာဖြစ်ပြီး နောက် ၃ ရက်အကြာမှာ ရိုမေးနီးယားနဲ့ ထပ်မံယှဉ်ပြိုင်ရမှာ ဖြစ်ပါတယ်။
ခြေစစ်ပွဲစဉ်အုပ်စုထဲမှာ ရိုမေးနီးယားက ၈ ပွဲကစား ၁၆ မှတ်နဲ့ ဦးဆောင်နေပြီး ဆွစ်ဇာလန်က ၇ ပွဲကစား ၁၅ မှတ်နဲ့ ဒုတိယနေရာမှာ ရှိနေပါတယ်။
Source/Photo-Reuters
