ပါလက်စတိုင်းလူမျိုးတွေဟာ နိုင်ငံတကာ ကာကွယ်စောင့်ရှောက်မှုကို လိုအပ်နေတယ်လို့ ပါလက်စတိုင်း ဝန်ကြီးချုပ် မိုဟာမဒ်ရှတဲယာက နိုဝင်ဘာ ၉ ရက်က ပါရီမှာ ပြုလုပ်တဲ့ အကူအညီပေးရေးညီလာခံမှာ ပြောကြားခဲ့ပါတယ်။
အစ္စရေးတောင်ပိုင်းမှာ အောက်တိုဘာ ၇ ရက်က ဟားမတ်စ်စစ်သွေးကြွတွေရဲ့ တိုက်ခိုက်မှုကို တုံ့ပြန်တဲ့အနေနဲ့ အစ္စရေးက မြေပြင်နဲ့ လေကြောင်းထိုးစစ်တွေ စတင်ခဲ့ချိန်ကတည်းက ဂါဇာကမ်းမြောင်ဒေသရှိ ဒဏ်ရာရသူတွေကို ဘယ်လိုကူညီရမလဲ အကဲဖြတ်ဖို့နဲ့ အကူအညီတွေကို ညှိနှိုင်းဆောင်ရွက်ဖို့ ရည်ရွယ်တဲ့ ပါရီမြို့ ကွန်ဖရင့်တခုမှာ ဝန်ကြီးချုပ် ရှတဲယာ က ပြောကြားခဲ့တာပါ။
အစ္စရေးဟာ နိုင်ငံတကာ လူ့အခွင့်အရေးဥပဒေကို ချိုးဖောက်နေပြီး စစ်ရာဇ၀တ်မှုတွေကို ကျူးလွန်နေတယ်လို့ သူက ပြောပါတယ်။
အစ္စရေးက ဟားမတ်စ်ကို စစ်တိုက်နေတာ မဟုတ်ဘဲ ပါလက်စတိုင်းအားလုံးကို တိုက်ခိုက်နေတာဖြစ်ကြောင်းလည်း ပြောဆိုပါတယ်။
ပါလက်စတိုင်းဝန်ကြီးချုပ် မိုဟာမက်ရှတဲယာက “စစ်ပွဲရပ်ဖို့ ပါလက်စတိုင်း ဘယ်နှယောက် သေပေးနေရမလဲ။ တစ်နာရီကို ကလေး ၆ ယောက်ဆို လုံလောက်မလား။ တနာရီတိုင်း အမျိုးသမီး ၄ ယောက် အသတ်ခံရရင် လုံလောက်ပါသလား။ ရက်ပေါင်း ၃၀ အတွင်း လူ တစ်သောင်းလောက် သေဆုံးပေးရင် လုံလောက်ပါပြီလား”လို့ ပြောသွားတာပါ။
ပါလက်စတိုင်း ပြည်သူတွေအတွက် နာကျင်မှုလမ်းကြောင်းဟာ အောက်တိုဘာ ၇ ရက် ကတည်းက စတင်ခဲ့တာ မဟုတ်ပါဘူး။ ဒုက္ခသည်စခန်းတွေနဲ့ လူစုလူဝေးတွေမှာ၊ အနောက်ဘက်ကမ်းနဲ့ ဂျေရုဆလင်တို့မှာ၊ အခု ဂါဇာကမ်းမြောင်မှာ အဝိုင်းခံထားရပြီး စစ်တိုက်ခံနေရလို့ နာကျင်မှုတွေ ခံစားနေရတာဟာ သက်တမ်း ၇၅ နှစ် ကြာခဲ့ပါပြီလို့လည်း ပါလက်စတိုင်းဝန်ကြီးချုပ်က ဆိုပါတယ်။
အနောက်ဘက်ကမ်း၊ ဂါဇာနဲ့ ဂျေရုဆလင်တို့က ပါလက်စတိုင်းလူမျိုးတွေဟာ နိုင်ငံတကာ အကာအကွယ်ကို လိုအပ်နေပါတယ် လို့ ပြောသွားပါတယ်။
Source/Photo-Reuters