စစ်ရေးအရှိန် မြင့်နေတဲ့ ရှမ်းပြည်မြောက်ပိုင်း၊ ကိုးကန့်ဒေသ လောက်ကိုင်မြို့မှာ ပိတ်မိနေတဲ့ ထိုင်းနိုင်ငံသား အယောက် ၂၀၀ နီးပါးနဲ့ နိုင်ငံခြားသားတွေကို မြန်မာစစ်တပ်ရဲ့ စစ်စခန်းတွေမှာ ထိန်းသိမ်းထားပါတယ်။ အဲဒီလူတွေဟာ လူသားဒိုင်း Human Shelter အနေနဲ့ အသုံးချခံနေရသလို အလုပ်ကြမ်းစေခိုင်းခံရတာတွေ ရှိနေတယ်လို့ ထိုင်း-မြန်မာ လူကုန်ကူးမှု တိုက်ဖျက်ရေး ကူညီပေးသူတွေဆီက သိရပါတယ်။

အောက်တိုဘာ ၂၇ ရက် ၁၀၂၇ စစ်ဆင်ရေး မတိုင်ခင်က လောက်ကိုင်က အွန်လိုင်းငွေလိမ်ဂိုဏ်းတွေမှာ လူကုန်ကူးခံရသူတွေကို စစ်ကောင်စီတပ်တွေဟာ အောက်တိုဘာ ၁၅ ရက်က ကယ်ဆယ်ခဲ့တာဖြစ်ပြီး အဲဒီမှာ ပိတ်မိနေတဲ့ နိုင်ငံခြားသားတွေကို စစ်တပ်ရဲ့ စစ်စခန်းတွေမှာ ထိန်းသိမ်းထားတာပါ။

လူကုန်ကူးခံခဲ့ရသူတွေကို သက်ဆိုင်ရာ နိုင်ငံတွေဆီ အမြန်ဆုံး လွှဲပြောင်းပေးရမှာဖြစ်ပေမယ့် စစ်မြေပြင်အနီး စစ်ကောင်စီ ရှေ့တန်းစစ်ခန်းတွေမှာ လူသားဒိုင်းအဖြစ် သုံးတာ၊ ပေါ်တာဆွဲတာ စတဲ့ လူ့အခွင့်အရေး ချိုးဖောက်တာတွေ လုပ်ဆောင်နေတယ်လို့ သိရပါတယ်။

ဒီအကြောင်းအရာတွေနဲ့ ပတ်သက်လို့ ပိတ်လှောင်ခံထားရတဲ့ ထိုင်းနိုင်ငံသားတွေကို အနီးကပ် ကူညီပေးနေတဲ့ ထိုင်း-မြန်မာ လူကုန်ကူးမှု တိုက်ဖျက်ရေးအဖွဲ့မှ ကူညီပေးသူ တယောက်ကို ဒီဗွီဘီသတင်းထောက် ဇွဲသစ်က သီးသန့် တွေ့ဆုံ မေးမြန်းထားပါတယ်။

မေး - ပထမဆုံး လောက်ကိုင်ဒေသမှာ ပိတ်မိနေတဲ့ ထိုင်းနိုင်ငံသားတွေရဲ့ အခြေအနေ သိချင်ပါတယ်။

ဖြေ - ထိုင်းနိုင်ငံသားတွေရော အခြားနိုင်ငံသားတွေရော ရှိနေတာပေါ့နော်။ လောက်ကိုင်မှာ စစ်တပ်က ခွင့်ပြုပြီးတော့ BGF က တည်ဆောက်ထားတဲ့ Call Center (Scam Center) အဲ့ထဲမှာ ထိုင်းနိုင်ငံသားတွေ အမြောက်အမြား ပါပြီးတော့ တရုတ်နိုင်ငံသားတွေလည်း ပါသလို မလေးရှား၊ ဗီယက်နမ်၊ အင်ဒိုနီးရှား နိုင်ငံပေါင်းစုံပေါ့ ပါဝင်တယ်။ အထူးသဖြင့် ထိုင်းနိုင်ငံသားတွေ ကိစ္စကို ပြန်ကြည့်ရင် သူတို့က လိမ်လည်ပြီးတော့ ခေါ်သွားတယ်။ တကယ်တမ်း ဒီလိမ်လည်ရမယ့် Scam Center လို့ မထင်ဘဲ ရောက်သွားတယ်။ လူကုန်ကူးတဲ့သူက ခေါ်သွားတယ်။ ဟိုရောက်ပြီးတော့မှ သူတို့ကို ရောင်းလိုက်တယ်။ ရောင်းခံရပြီးမှ သက်ဆိုင်ရာ မိသားစုတွေဆီကနေ ကျနော်တို့ဆီ အကူအညီတောင်းတာ ရောက်လာတယ်။ လောက်ကိုင်မှာ တည်ရှိတဲ့ Scam center က အရမ်းကို အင်အာကြီးပြီး ဘယ်သူမှ မကူညီ မကယ်ထုတ်နိုင်ဘူး။ အဲ့အပေါ်မှာမှ မြန်မာစစ်တပ်ကနေ သွားရောက် ကူညီ ကယ်ထုတ်ခဲ့တာ ရှိတယ်။ အဲဒါကြောင့် ဒီဘက် ထိုင်းအဖွဲ့အစည်းတွေကလည်း မြန်မာစစ်တပ်က ကူညီပေးတယ်ဆိုပြီး ပျော်ရွှင်ကြတယ်ပေါ့။ ဒါက အောက်တိုဘာ ၂၇ မတိုင်ခင်ကပေါ့။ လွန်ခဲ့တဲ့ အောက်တိုဘာ ၁၅ ရက်လောက်က ဖြစ်ခဲ့တဲ့ ကိစ္စပေါ့။

စစ်တပ်က သက်ဆိုင်ရာ လူကုန်ကူးမှု တိုက်ဖျက်ရေး တားဆီးနှိမ်နင်းရေးအဖွဲ့တွေကို မအပ်ဘဲနဲ့ စစ်တပ်ရဲ့ တပ်စခန်းမှာ သိမ်းထားတယ်ဆိုတာ တကယ်တမ်းက တပ်နဲ့ လူကုန်ကူး တိုက်ဖျက်ရေးက တခြားစီပေါ့။ ဆိုတဲ့အခါကျ ဒီလူတွေကို တပ်ထဲမှာပဲ သိမ်းထားပြီးတော့ ၂၇ ရက်နေ့ စစ်ပွဲစဖြစ်တဲ့အချိန်မှာ ထိုင်းနိုင်ငံသားတွေကို အလုပ်တွေ ခိုင်းတယ်။ ပေါ်တာဆွဲတဲ့ ပုံစံတွေ ဖြစ်လာတယ်။ ပြီးတော့ ဒီလူတွေအတွက် လုံခြုံမှု မရှိဘူး။ အဲဒီမှာ ကိုယ်ဝန်ဆောင် အမျိုးသမီးတွေလည်း ပါတယ်။ ဟိုဘက်မှာ ဒုက္ခရောက်လို့ အကူအညီ တောင်းတဲ့ဟာကို ဒီဘက်မှာ သွားပြီး စိတ်ပိုင်းဆိုင်ရာအရ ထိခိုက်ပြီး စားမတတ် သောက်မတတ် ဖြစ်နေကြတယ်။ အဲဒါကို ကျနော်တို့က မြေပြင်ကနေ အကူအညီ တောင်းလာတဲ့ ထိုင်း (victims) တွေဆီကနေ အချိန်နဲ့ တပြေးညီ သတင်းပို့တာတွေ ရှိတယ်။

မေး - အဲ့ဒီအတွက် ထိုင်းအစိုးရနဲ့ ချိတ်ဆက်ပြီးတော့ အစ်ကိုတို့ ဘာတွေ ကူညီ ဆောင်ရွက်ပေးနေလဲ။

ဖြေ - ကျနော်တို့ အဖွဲ့အစည်းမှာ ထိုင်းအစိုးရနဲ့ အစကတည်းက ချိတ်ဆက် ဆောင်ရွက်တာ ဖြစ်တယ်။ ဒါပေမဲ့ ထိုင်းအစိုးရရဲ့ ပေါ်လစီအရ မြန်မာစစ်တပ်နဲ့ အစိုးရအချင်းချင်း ချိတ်ပြီးတော့မှ ရန်ကုန်မှာရှိတဲ့ ထိုင်းသံရုံးကနေ မြန်မာစစ်တပ် နစကကိုပဲ သူတို့က လှမ်းပြီးတော့ အကူအညီ တောင်းရတယ်။ မေးမြန်းရတယ်။ သူတို့ပေးတဲ့ အချက်အလက်ပဲ ထိုင်းက ရတာပေါ့။ အဲ့မှာ တချက်က ဘာရှိလဲဆိုတော့ ဒီခံရသူတွေရဲ့ ဖုန်းကို အကုန်လုံး သိမ်းဆည်းထားတယ်။ စစ်တပ်က မသိလိုက်တာက အထက်ကို ပေးတဲ့ အချက်အလက်တွေမှာ ဖုန်းတွေကို သူတို့ အားလုံး သိမ်းထားပြီးတော့မှ အချက်အလက်က အောက်က မထွက်ဘူးလို့ ယူဆထားတာပေါ့။ တကယ်တမ်း (victim) တွေက ဖုန်းတလုံး နှစ်လုံး သိမ်းထားပြီးတော့ အဲဒီက အချက်အလက်တွေ လာတော့ ထိုင်းက စစ်တပ်က လာတဲ့အချက်အလက်နဲ့ မြေပြင်က အချက်အလက်က လုံးဝကို ကွာခြားနေတာပေါ့။ စစ်တပ်က ပြောနေတာ ထိုင်းနိုင်ငံသားတွေကို ကောင်းကောင်းမွန်မွန် ပြုစုထားပါတယ်လို့ သတင်းတွေ ကြားထားတယ်။ တကယ်တမ်းက အဲ့လို မဟုတ်ဘူး။ ဟိုမှာ ကတုတ်ကျင်းတွေ တူးခိုင်းတယ်။ ဘန်ကာတွေ လုပ်ခိုင်းတယ်။ သစ်တွေ ထမ်းခိုင်းတယ်။ အလုပ်ကြမ်းတွေ အကုန် လုပ်ခိုင်းတယ်။ မလုပ်ဘူးဆိုရင်လည်း ကြောက်စရာ လန့်စရာကြီး သူတို့နဲ့ ၁၀ ပေလောက် ဝေးတဲ့ နေရာမှာ လက်နက်ပုံတွေ အများကြီးပုံထားတယ်။ ပေါက်ကွဲစေတဲ့ လက်နက်တွေရောပေါ့။ အဲ့တော့ ကြောက်နေရတယ်။

မေး - ဒီလို ကြုံနေရတာ ဘယ်အချိန်လောက်ကတည်းကလဲ။

ဖြေ - အောက်တိုဘာ ၁၅ ရက်နေ့ကတည်းက ထိုင်း victim တွေကို မြန်မာအစိုးရက ကယ်ဆယ်ထားပါတယ် ဆိုပြီးတော့ ထိုင်းအစိုးရကို တင်ပြထားတာပေါ့။ အောက်တိုဘာ ၂၇ ရက်နေ့မှာ တိုက်ပွဲဖြစ်လာတော့ သူတို့ကို ထိုင်းကိုလည်း ပို့မလာသလို လုံခြုံတဲ့နေရာ တရုတ်ပြည်တို့၊ ဝတို့ စစ်မဖြစ်တဲ့နေရာ ဘာလို့ မပို့တာလဲပေါ့။ ထိုင်းပြည်သူ တရပ်လုံးကလည်း ထိုင်းအစိုးရကို မေးသလို မြန်မာစစ်တပ်ကို မေးနေတာလည်း ရှိတယ်။

မေး - အခုလိုမျိုး Victim တွေကို ဖမ်းချုပ်ခေါ်ထားပြီးတော့ လူသားဒိုင်းပုံစံ လုပ်တယ်။ ပေါ်တာဆွဲပြီး ခိုင်းစေတာတွေ လုပ်တယ်ဆိုတော့ ဒါက ဘယ်လို ပြစ်မှုမြောက်လဲ။

ဖြေ - တကယ်တမ်း ဒါက လူ့အခွင့်အရေးဘက်က ကြည့်ရင် ဥပဒေအရဆိုရင် လူကုန်ကူးထားရတဲ့ victim တွေကို ထောင်ထဲ အချုပ်ထဲ လက်ထိတ်တောင် ခတ်လို့ မရဘူး။ အလုပ်တွေ ခိုင်းဖို့ နေနေသာသာ ဘာလို့လဲဆိုတော့ သူတို့က စိတ်ပိုင်းဆိုင်ရာ ရုပ်ပိုင်းဆိုင်ရာ ထိခိုက်လာသူတွေ။ အကောင်းဆုံး ကျွမ်းကျင်တဲ့ သူနာပြုတွေ၊ ဆရာဝန်တွေ လာပြီး ကြည့်ပေးရမယ်။ တချို့တွေဆို လျှပ်စစ်ရှော့ခ်တွေနဲ့ ညတိုင်း ရှော့ခ်တိုက်ခံရတာ ရှိတယ်။ တချို့တွေဆို နေ့တိုင်းညတိုင်း ဒဏ်ပေးတာရှိတယ်။ တချို့တွေဆို ဖားခုံတဲ့ ခုန်ပုံနဲ့ မိနစ် ၂၀ တနာရီ ခုန်ခိုင်းတာ ရှိတယ်။ နောက်ပြီး တိုင်တွေမှာ ချည်ပြီး ရှော့ခ်တိုက်တဲ့သူတောင် ပင်ပန်းတဲ့အထိ ရှော့်ခ်တိုက်ခံရသူ ကိုယ်တိုင် ရှော့ခ်တိုက်ပြီးမှ ရပ်ရတဲ့ အနေအထားရှိတယ်။ ဆိုတဲ့အခါကျ ဒီလို စိတ်ပိုင်းဆိုင်ရာ ရုပ်ပိုင်းဆိုင်ရာ ထိခိုက်ပျက်စီးနေသူတွေကို စစ်တပ်က လူသားဒိုင်းအနေနဲ့ Human Shelter အနေနဲ့ အသုံးပြုနေတာက နိုင်ငံတကာ အာရုံစူးစိုက်မှုက မြန်မာစစ်တပ်အပေါ်မှာ ရှိလာမယ်ဆိုတာ ယုံကြည်တယ်။ နောက်တခါ ထိုင်းနဲ့ မြန်မာ စစ်တပ်ရဲ့ ချစ်ကြည်ရေးလည်း ဒီလိုသာ ဆက်လုပ်နေရင် အင်မတန် မကောင်းတဲ့ လက္ခဏာ ဖြစ်လာမယ်လို့ မြင်မိတယ်။ အဲ့လိုမျိုး သူတို့ ကူညီပေးမယ်ဆိုပြီး ထုတ်လာတဲ့သူတွေကို လူသားဒိုင်း လုပ်နေတယ်ဆိုတာ လူ့အခွင့်အရေးနဲ့လည်း လုံးဝ မညီညွတ်ဘူး။ အရင်တုန်းကတော့ မြန်မာနိုင်ငံသားတွေနဲ့ တိုင်းရင်းသားတွေကို လုပ်နေတာက အခုဆို နိုင်ငံခြားသားတွေပါ လုပ်တယ်ဆိုတာက အင်မတန်မှ နိုင်ငံတကာရဲ့ အာရုံ စူးစိုက်မှုလည်း ရှိလာမယ်လို့ အပြည့်အဝ ယုံကြည်တယ်။

မေး - စစ်ကောင်စီဘက်က ဘာကြောင့် ဒီလို လုပ်တယ်လို့ သုံးသပ်မိလဲ။

ဖြေ - ရှင်းတာပေါ့။ စကစမှာလည်း လူတွေက ကုန်သလောက်ဖြစ်နေပြီ။ သူတို့အတွက်ကလည်း ပေါ်တာဆွဲဖို့ ဘယ်လိုမှ အဆင်မပြေဘူး။ ဒီဘက်က မဟာမိတ်တွေ ညီနောင် သုံးဖွဲ့ကလည်း ပတ်ပတ်လည် ဝိုင်းထားတဲ့အတွက် တခြားလူတွေကို ဖမ်းဆီးဖို့ အင်မတန်မှ ခက်ခဲတဲ့ အခြေအနေကို ကျနော်တို့ မြင်ရတယ်။ အဲ့လိုဖြစ်နေတဲ့အခါမှာ ကွက်တိပေါ့။ ဒီလူတွေလည်း ရောက်လာတယ်။ ဒီလူတွေကို မင်းတို့ကို ငါတို့ ထမင်းကျွေးရတယ်၊ ငါတို့ ခိုင်းတာ လုပ်ရမယ်ဆိုပြီး ပါရင်လည်း ပါမှာပေါ့။ အောက်ခြေက စစ်တပ်တွေက တကယ်တမ်း ဥပဒေ လုံးဝ နားမလည်တာတွေ၊ ပြီးတော့ လူ့အခွင့်အရေး၊ နိုင်ငံခြားသားလည်း ဖြစ်တယ်။ တရားမဝင် လာတာလည်း မဟုတ်ဘူး။ တရားဝင်လာတာပေါ့။ ဒါပေမဲ့ အဲဒီမှာ ပိတ်လှောင်သွားတဲ့အခါ သူတို့ရဲ့ ဗီဇာတွေ သက်တမ်းကုန်သွားတယ်။ မတရား အဓမ္မပေါ့။ အဲဒီမှာ မိန်းကလေးတွေဆိုရင် ပြည့်တန်ဆာတွေ လုပ်ခိုင်းတယ်။ အဓမ္မ ကျင့်တာတွေ။ သူတို့ မိသားစုတွေဆီ အဲ့ဗွီဒီယိုတွေ ပို့ပေးတာတို့၊ ဒေါ်လာသောင်းနဲ့ချီ တောင်းတာတို့၊ အဲ့လို မပေးဘူးဆိုရင် လျှပ်စစ်နဲ့ ရှော့ခ်တိုက်တာတွေ လုပ်တယ်။ ရိုက်နှက်တယ်။ ထမင်းမကျွေးဘူး။ အမှောင်ခန်းတွေမှာ ထားတယ်။ victim တွေထဲက တယောက်ယောက်က ကျနော်တို့ကို သတင်းပေးတယ်ဆိုတာ တရုတ် မန်နေဂျာ တယောက်ယောက်က သိသွားရင် ၉၉ ရာခိုင်နှုန်းက သေဖို့ပဲ။ သူတို့ တော်တော်လေး အရဲစွန့်ပြီးတော့မှ သတင်းအချက်အလက်တွေ ပို့ပေးတာ ရှိတယ်။ အခုလို စိတ်ပိုင်းဆိုင်ရာ ရုပ်ပိုင်းဆိုင်ရာ ထိခိုက်ပျက်စီးနေသူတွေကို စစ်တပ်က Human Shelter အနေနဲ့ သုံးတယ်။ ပြီးတော့ ပေါ်တာတွေလည်း ဆွဲနေတယ်ဆိုတာ လုံးဝ လက်ခံလို့ မရဘူး။

မေး - အခုက ၁၀၂၇ စစ်ဆင်ရေးက မြင့်သထက် မြင့်လာပြီဆိုတော့ ပိတ်မိနေတဲ့ ထိုင်းနိုင်ငံသားတွေကို အချိန်မီ ပြန်မပို့နိုင်ရင် ဘာတွေ ဆက်ဖြစ်လာနိုင်လဲ။

ဖြေ - အခု ဒီစစ်ဆင်ရေးက တရက်နဲ့ တရက် မြင့်သထက် မြင့်လာတယ်။ ပြီးတော့ နယ်မြေထိန်းချုပ်မှုကလည်း မဟာမိတ် ညီနောင် ၃ ဖွဲ့က ထိန်းချုပ်မှု အားကောင်းလာတဲ့အပေါ်မှာ အင်မတန် ကြောက်စရာကောင်းတာက လောက်ကိုင်မှာ ပိတ်မိနေတဲ့ နိုင်ငံခြားသားတွေအတွက်က အင်မတန် ကြောက်စရာကောင်းတယ်။ ဘာသာစကားလည်း မသိသလို လမ်းကြောင်း ဘယ်သွားရမယ်မှန်းလည်း မသိဘူး။ ပြီးတော့ သူတို့ ထောင်ထားတဲ့ မိုင်းတွေလည်း နေရာတိုင်းမှာရှိတယ်။ ပြီးတော့ စစ်ဖြစ်လာတဲ့ စစ်မြေပြင်မှာ ဘာမှ မဟုတ်တဲ့ Victim တွေကို Human Shelter ဒီလူတွေအတွက် အရမ်းအန္တရာယ် ရှိပါတယ်။ ဒီလူတွေကို မြန်မာစစ်တပ်က အနီးဆုံး တရုတ်နိုင်ငံကို ပို့လို့ရတယ်။ တရုတ်ကလည်း လက်ခံနေတယ်။ ထိုင်းအစိုးရကလည်း တရုတ်အစိုးရကို အကြောင်းကြားထားပြီးသား ဖြစ်တယ်။ အကြောင်းကြားပြီးသားဖြစ်တဲ့အခါ ဝဘက်ကိုလည်း မပို့ဘူး။ လွတ်မြောက်တဲ့ နေရာတခုလည်း မပို့လာဘူး။ မပို့တဲ့အခါ စဉ်းစားစရာတော့ ရှိတာပေါ့။

မေး - ဒီ အွန်လိုင်းငွေလိမ်ဂိုဏ်းတွေ နောက်ကွယ်မှာရော စစ်ကောင်စီ ပါဝင် ပတ်သက်နေတယ်လို့ ယူဆလား။

ဖြေ - ဒီ Scamming center တွေကို ၂၀၀၉ ကတည်းက ကိုးကန့်နယ်မြေတို့၊ မြဝတီတို့ လွတ်မြောက်နယ်မြေ တခုတွေကို BGF ကို အပ်ထားတဲ့ territorially လေးတွေ ရှိတယ်။ BGF ကလည်း စစ်တပ် လက်အောက်က ဆိုတော့ မပါဝင်ဘူးလို့ ပြောလို့ မရဘူး။ အပြည့်အဝ ပါဝင်တယ်။ ဘာလို့လဲဆိုတော့ ဒီ BGF ကို စစ်တပ်က ထောင်ခဲ့ပေးတာ။ BGF တရုတ်ရဲ့ လောင်းကစားဝိုင်းတွေကို အဲဒီနေရာမှာ ခွင့်ပြုပေးထားတယ် ဆိုတာ လက်တဖက်နဲ့ တကယ်တမ်းက စစ်တပ်က အပြည့်အဝ ပါဝင်တယ်လို့ ပြောလို့ ရတယ်။ မပါဝင်ဘူးဆိုရင် ဒီလူတွေ ဒီလုပ်ငန်းကို လုပ်စရာ အကြောင်း မရှိဘူး။ အဲဒီမှာ ပိတ်လှောင်နေတဲ့ victim ထဲက တယောက်က သတင်းပို့တာ မာဖီးယားခေါင်းဆောင်တွေကို စစ်တပ်က ဟယ်လီကော်ပတာနဲ့ သယ်ယူ ပို့ဆောင်နေတယ်ဆိုတဲ့ သတင်းကို ကြားတယ်။ အဲဒါ မကြာသေးဘူး ခုနကမှပေါ့။ ဆိုတော့ သူတို့က ဒီလူကုန်ကူးမှုနဲ့ Scammer တွေကို ဘာလို့ မဖမ်းတာလဲ။ တရုတ်က ဖမ်းနေတယ်။ မြန်မာ အစိုးရက ကာကွယ်ပေးနေတယ်ဆိုတော့ အဖြေက ရှင်းပါတယ်။

မေး - နောက်ဆုံးအနေနဲ့ ဘာများ ဖြည့်စွက် ပြောပြချင်ပါသေးလဲ ခင်ဗျာ။

ဖြေ - ရှင်းရှင်းပြောမယ်ဆိုရင် ကျနော်တို့ နိုင်ငံမှာက နိုင်ငံရေးအရ တိုင်းပြည်ပျက်စီးမှု ဖြစ်နေတာ နိုင်ငံသားတွေ သိပြီးသားပေါ့။ နောက်တဆင့်မှာ အခုလို လူကုန်ကူးမှုက တကယ်ကျယ်ပြန့်ပြီးတော့ မြန်မာနိုင်ငံက လူတွေ အားလုံးက လူကုန်ကူးမှုတို့၊ သတ်ဖြတ်တာတို့၊ လိမ်လည်တာတို့ လုပ်နေတယ်ဆိုတဲ့ ပုံရိပ်က ကျနော်တို့ရဲ့ ဒီဟာကို နားမလည်တဲ့ နိုင်ငံခြားသားတွေက ဘယ်လိုထင်ကြမလဲဆိုတော့ တရုတ်နဲ့ မြန်မာနဲ့ ပေါင်းပြီး ဒီလို Scammer တွေ လုပ်စားနေတယ်။ တချို့ နိုင်ငံခြားသားတွေဆို ထိုင်း-မြန်မာ နယ်စပ် သွားဖို့တောင် ကြောက်လန့်နေကြတယ်။ အခု တရုတ် ဖရီးဗီဇာ ပေးတာတောင် တရုတ်တွေ မဝင်ရဲဘူး။ call center တွေက ထိုင်း-မြန်မာ နယ်စပ်တလျှောက်မှာရှိနေတဲ့အခါကျ ဟိုးအရင်လို ကိုဗစ် မတိုင်ခင်ကလို ကျယ်ကျယ်ပြန့်ပြန့် လည်ပတ်တာ ခရီးသွားလာတာ နည်းပါးသွားတယ်။ ဒါကို ကြည့်ခြင်းအားဖြင့် ကျနော်တို့နိုင်ငံရဲ့ ပုံရိပ်လည်း မကောင်းဘူး။ ဒါကို နှစ်ဘက်နိုင်ငံရဲ့ အစိုးရရော ကျနော်တို့ NUG အစိုးရနဲ့ လက်နက်ကိုင် မဟာမိတ်အဖွဲ့အစည်း အားလုံးက တိုက်ထုတ်မှသာလျှင် အနည်းဆုံး နယ်မြေတွေမှာရှိတဲ့ ပြည်သူတွေ စိတ်အေးအေးချမ်းချမ်းနဲ့ နေရမယ်။

ဇွဲသစ်