ရခိုင်ပြည်နယ်၊ စစ်တွေမြို့ လောကန္ဒနာပုထိုးတော်ကြီးမှာ အောင်တိုဘာ ၂၈ ရက်ညက စစ်ကောင်စီက ကျင်းပပြုလုပ်တဲ့ ဆီမီး ၉၀၀၀ ပူဇော်ပွဲနဲ့ မီပုံးပျံ ၁၅၀ စုပေါင်းလွှတ်တင်ပွဲကို ပြည်သူတွေ နည်းနည်းပဲလာကြပြီး မစည်ကားဘူးလို့ ဒေသခံတွေဆီက သိရပါတယ်။
စစ်တွေဒေသခံတယောက်က “သူတို့ကျင်းပတဲ့ ပွဲတွေကို ပြည်သူတွေ လာရောက်မှု နည်းကြတယ်။ ဘာအတွက်လဲဆိုတော့ လုံခြုံရေးတွေ အပြည့်ချထားတယ်။ မသင်္ကာရင် ဟိုမေးဒီမေး စစ်ဆေးမှုတွေ ရှိနေတော့ ဘယ်ပြည်သူမှ မလာရဲကြဘူးလေ” လို့ ပြောပါတယ်။
စစ်တွေမှာ တာဝန်ကျနေတဲ့ ဝန်ထမ်းတယောက်ကလည်း မီပုံးပျံ ၁၅၀ စုပေါင်းလွှတ်တင်ပွဲမှာ မီးပုံးအကြီးစားတွေ လွှတ်တင်တာ မဟုတ်ဘဲ ကလေးတွေ လွှတ်တတ်ကြတဲ့ မီးပုံးငယ်လေးတွေ လွှတ်တာဖြစ်လို့ လာကြည့်တဲ့သူ နည်းတာလို့ ပြောပါတယ်။
“မီးပုံးပျံအငယ်လေးတွေ မပါရလို့ မဟုတ်ဘူးလေ။ ဌာနဆိုင်ရာတခုကို မီးပုံး အရွယ်အစားအလိုက် တလုံးကျစီ လုပ်ကြရမယ်အမိန့်ပေးလိုက်ဗျာ။ အလှဆုံးကိုရွေးပြီး ပထမ၊ ဒုတိယ၊ တတိယ ဆုတွေပေးလိုက်။ မစည်မရှိပါဘူးဗျာ” လို့ ပြောပါတယ်။
အောက်တိုဘာ ၂၈ ရက်၊ သီတင်းကျွတ် အဖိတ်နေ့ မနက်ပိုင်းကလည်း လောကာနန္ဒာ ပုထိုးတော်ကြီးမှာ သံဃာ အပါး ၅၀၀ ဆွမ်းဆန်တော်လောင်းလှူပွဲကို စစ်ကောင်စီရဲ့ ပြည်နယ်အစိုးရအဖွဲ့က ကြီးမှူးပြီး သိန်း ၆၀၀ ဝန်းကျင်ဖိုး လှူဒါန်းခဲ့ကြပါသေးတယ်။