ကရင်ပြည်နယ်၊ ကော့ကရိတ်မြို့နယ်၊ ဆင်ကုန်းကျေးရွာနဲ့ တတန်ကူးကျေးရွာကြားမှာ အောက်တိုဘာ ၂၄ ရက် မနက် ၅ နာရီလောက်ကစတင်ပြီး စစ်ကောင်စီတပ်တွေနဲ့ KNLA ပူးပေါင်းတပ်ဖွဲ့တွေ တိုက်ပွဲပြင်းထန်ကာ စစ်ကောင်စီတပ်ဘက်က ၆ ဦးသေပြီး ၈ ဦး ဒဏ်ရာရရှိခဲ့တယ်လို့ KNLA တပ်မှူး စောကျော်သက်က ပြောပါတယ်။
စစ်ကောင်စီတပ်ဘက်က အင်အား ၁၀၀ လောက်က KNLA ပူးပေါင်းတပ်ဖွဲ့တွေ လုံခြုံရေး ရယူထားတဲ့ နေရာကို ဝင်ရောက်ပြီး စစ်ကြောင်းထိုး လှုပ်ရှားလာတာကြောင့် နှစ်ဖက်တိုက်ပွဲပြင်းထန်ပြီး အထိနာတာကြောင့် လေကြောင်းကနေ ပစ်ကူပေး ပစ်ခတ်ခဲ့တယ်လို့ ဆိုပါတယ်။
KNLA တပ်မှူး စောကျော်သက်က “စစ်ကောင်စီဘက်က ၆ ယောက်သေပြီး ၈ ယောက် ဒဏ်ရာရတယ်လို့ သိထားတယ်။ တပ်ရင်းမှူးအဆင့် ကျတယ်လို့တော့ ကြားတယ်။ တိတိကျကျပြောနိုင်ဖို့ မြေပြင်မှာ စုံစမ်းနေတုန်းပဲ။ လက်ရှိအခြေအနေမှာ စစ်ကောင်စီဘက်က ပြန်မဆုတ်သေးဘူး၊ ရင်ဆိုင်ထားတုန်းပဲ” လို့ ပြောပါတယ်။
ကျားဖြူစစ်ကြောင်း လုံခြုံရေးတပ်ခွဲ တာဝန်ရှိသူက “သူတို့က နယ်မြေပြန်လည်စိုးမိုးနိုင်ဖို့ ဝင်ရောက်လာတာ။ သူတို့က နေရာပြန်လည်ရယူဖို့လုပ်တာ။ တိုက်ပွဲဖြစ်တာကတော့ ကြာတယ်။ နေ့လယ် ၂ နာရီလောက်မှ ပြန်ငြိမ်သွားတယ်။ သူတို့ အထိနာပုံရတယ်။ ကျနော်တို့ကြားတာတော့ တပ်ရင်းမှူးအဆင့် ကျတယ်လို့ ကြားတယ်။ ဒါကြောင့် Mi35 နဲ့ လာပစ်တဲ့အဆင့် ရောက်သွားတယ်” လို့ ပြောပါတယ်။
စစ်ကောင်စီတပ်ဘက်က ထိခိုက်သေဆုံးသူ များပြားခဲ့တာကြောင့် မနက် ၈ နာရီခွဲလောက်မှာ စစ်ကောင်စီက လေကြောင်းကနေ Mi35 နဲ့ ၂ ကြိမ် ပျံသန်းပစ်ခတ်ခဲ့ပြီး မြေပြင် ထိခိုက်သေဆုံးမှုကိုတော့ အတိအကျ မပြောနိုင်သေးပေမဲ့ တော်လှန်ရေး ပူးပေါင်းတပ်ဘက်က ရဲဘော် ၁ ဦး ထိမှန်ဒဏ်ရာ ရရှိခဲ့တယ်လို့ ဆိုပါတယ်။
နှစ်ဖက်တိုက်ပွဲအတွင်း စစ်ကောင်စီတပ်ဘက်က ထိခိုက်သေဆုံးမှုကိုတော့ ဒီဗွီဘီအနေနဲ့ သီးခြား အတည်မပြုနိုင်သေးပါဘူး။
စစ်ကောင်စီတပ်ဘက်က လေကြောင်းတိုက်ခိုက်မှုအပြင် စကခ ၁၂ လက်အောက်ခံ ၃၁၃ အေမြာက်တပ်၊ ခလရ ၉၇ တပ်ရင်းနဲ့ တပ်စခန်းတွေကနေ လက်နက်ကြီးတွေ ပစ်ခတ်နေတာကြောင့် အနီးအနားကျေးရွာက ဒေသခံတွေ ထွက်ပြေး တိမ်းရှောင်နေရတယ်လို့ ဒေသခံတွေဆီက သိရပါတယ်။