ရှမ်းပြည်မြောက်ပိုင်း၊ သိန္နီမြို့နယ်ထဲမှာ အောက်တိုဘာလအတွင်း တိုက်ပွဲတွေကြောင့် ကိုယ်ဝန်ဆောင်မိခင် ၁ ဦး ထိခိုက်ဒဏ်ရာရပြီး ရွာ ၃ ရွာက နေအိမ်အဆောက်အဦတွေ ပျက်စီးကာ ရွာသားပေါင်း ၁၀၀၀ ကျော် ဘေးလွတ်ရာ ထွက်ပြေးတိမ်းရှောင်ခဲ့ရတယ်လို့  ရှမ်းလူ့အခွင့်အရေး မဏ္ဍိုင် (SHRF) အဖွဲ့က  အောက်တိုဘာ ၂၄ ရက်နေ့စွဲနဲ့ ထုတ်ပြန်ပါတယ်။

အောက်တိုဘာ ၅ ရက်မနက်ကစပြီး စစ်ကောင်စီတပ်နဲ့ KIA တပ်ဖွဲ့ဝင်တွေဟာ သိန္နီမြို့အရှေ့ဘက် ကုန်းကော်ရွာရှိ သိန္နီ-ချင်းရွှေဟော်အဝေးပြေးလမ်းမှာ တိုက်ပွဲဖြစ်ခဲ့ပြီး အောက်တိုဘာ ၆ ရက်မှာ SSPP တပ်ဖွဲ့ဝင်တွေနဲ့ ပန်နကျေးရွာတောင်ဘက်မှာ တိုက်ပွဲဖြစ်ခဲ့ပါတယ်။

တိုက်ပွဲဖြစ်တိုင်း စစ်ကောင်စီတပ်ဖွဲ့ဝင်တွေဟာ တိုင်းရင်းသားလက်နက်ကိုင် အဖွဲ့တွေရှိ ရာဘက်ကို လက်နက်ကြီးနဲ့ပစ်ခတ်တာကြောင့် ဘုန်းကြီးကျောင်းနဲ့ နေအိမ်ထိခိုက်ပျက်စီး ခဲ့သလို ရွာသားတွေလည်း ဘေးလွတ်ရာကို ထွက်ပြေးခဲ့ရတာလို့ ဆိုပါတယ် ။

SHRF မှ ကောက်ယူရရှိထားတဲ့စာရင်းတွေအရ လက်နက်ကျည်တွေဟာ ကွန်ကောက်ရွာ ဘုန်း ကြီးကျောင်းဝင်းနဲ့ ရွာထဲကိုကျပြီး ကိုရင်တွေနေတဲ့ကျောင်းဆောင် ပျက်စီးခဲ့သလို  ကွန်ကောက်၊ ကောင်းချို၊ ဖိုင်ခမ်းစတဲ့ရွာတွေထဲမှာလည်း ကျရောက်တာကြောင့် နေအိမ်တချို့ထိမှန်ကာ ကောင်းချိုရွာက အသက် ၂၅ နှစ်ရွယ် ကိုယ်ဝန်ဆောင် ၁ ဦးကို ကျည်ထိမှန်ခဲ့တယ်၊ လားရှိုးဆေးရုံကြီးမှာ တက်ရောက်ကုသစဉ် ဗိုက်ထဲကကလေး သေဆုံးခဲ့ရတယ်လို့ ဆိုပါတယ်။ 

အောက်တိုဘာ ၅ ရက်မှ ၁၀ ရက်အတွင်း ဖြစ်ပွားတဲ့တိုက်ပွဲတွေကြောင့် ကွန်ကောက်ကျောင်းတိုက်က သံဃာတော်တွေအပါအဝင် ပိန်းကန်း၊ ကွန်ကောက် ၊ ပိန်းဟုန်း၊ ဝမ်ဟယ်၊ တန့်ခန် ၊ နောင်မောင်း၊ ဟိုနောင်နဲ့ ဖိုင်ခမ်းစတဲ့ ရွာသား ၉၀၀ ကျော် ဟိုမိန်းဘုန်းကြီးကျောင်းမှာ ထွက်ပြေးခိုလှုံခဲ့ရတယ်လို့ ဆိုပါတယ်။ 

ဒါ့အပြင် အဆိုပါကျေးရွာက ရွာသားတွေရော၊ ပန်နားနဲ့ ကုန်းညောင်က ရာနဲ့ချီတဲ့ရွာသားတွေဟာ စယ်အူဘုန်းကြီးကျောင်း၊ ဖိုင်ခမ်းဘုန်းကြီးကျောင်းနဲ့ လားရှိုး၊ ကွမ်းလုံ၊ ဟိုပန်ရှိ ဆွေမျိုးတွေထံ သွားရောက်ခိုလှုံခဲ့ရတယ်။

သိန္နီ-ချင်းရွှေဟော်လမ်းမကြီးဟာ တရုတ်နိုင်ငံ ချန်ဒူးဒေသကနေ မြန်မာပြည်ကိုဖြတ်ပြီး အိန္ဒိယသမုဒ္ဒရာကို ဆက်သွယ်ထားတဲ့ ပင်လယ်-ရထား- ကုန်းလမ်းတို့ရှိရာ ခါးပတ်တစ်ကွင်းလမ်း ( OBOR  ) ရဲ့ အစိတ်အပိုင်းတစ်ခုလို့ ထုတ်ပြန်ချက်မှာ ဖော်ပြထားပါတယ်။