ရန်ကုန်၊ သင်္ဃန်းကျွန်းမြို့နယ်၊ လေးဒေါင့်ကန်လမ်းမကြီး၊ ခပ်ချီးယားမှတ်တိုင်အနီးမှာ အောက်တိုဘာ ၁ ရက် ဒီနေ့ မနက်ပိုင်းက YBS 111 နဲ့ လိုက်ထရပ်ကား တိုက်မိပြီး လူ ၅ ယောက် ဒဏ်ရာရခဲ့တယ်လို့ Medical လူငယ်များအသင်းက ပြောပါတယ်။
မနက် ၁၀ နာရီခွဲလောက်က လေးထောင့်ကန်လမ်းမအတိုင်း မောင်းနှင်လာတဲ့ လိုက်ထရပ်ယာဉ်ဟာ တက်စီ ၁ စီးကို တိမ်းရှောင် ဘရိတ်အုပ်လိုက်ရာကနေ သင်္ဃန်းကျွန်းစံပြဈေးဘက်ကနေ တာမွေဘက်ကို မောင်းနှင်လာတဲ့ YBS ကို ဝင်တိုက်မိတာ ဖြစ်ပါတယ်။
Medical လူငယ်များအသင်းတာဝန်ရှိသူက “အသင်းတိုက်နဲ့ ခပ်ချီးယားမှတ်တိုင်ကြားမှာ ဖြစ်တာ။ တက်စီကို လိုက်ထရပ်ကရှောင်ရင်း ဘရိတ်အုပ်လိုက်တော့ YBS နဲ့ တိုက်မိသွားတာ။ လူနာက လိုက်ထရပ်ပေါ်ကပဲ ထွက်တယ်။ ယာဉ်မောင်းကတော့ အဝါရောင်အဆင့်လူနာပါ။ ကားပေါ်မှာ ကျား ၁ ဦး၊ မ ၁ ဦးပါတယ်” လို့ ပြောပါတယ်။
ယာဉ်တိုက်မှုကြောင့် YBS ကား အရှေ့ဘက်ပျက်စီးမှန်ကွဲ၊ လိုက်ထရပ်ကားခြေနင်း ပျက်စီးသွားပြီး လိုက်ထရပ်ယာဉ်မောင်း အသက် ၄၅ နှစ်အရွယ် အမျိုးသားမှာ ဦးခေါင်းပြတ်ရှဒဏ်ရာနဲ့ ကားနောက်ခန်းမှာ လိုက်ပါလာတဲ့ အသက် ၅၀၊ ၄၀ အရွယ် အမျိုးသမီး ၄ ယောက်မှာ ရင်ဘတ်၊ ခါးရိုးထိခိုက်ဒဏ်ရာတွေ ရရှိခဲ့ပါတယ်။
ထိခိုက်ဒဏ်ရာရရှိသူတွေကို Medical အသင်းကား ၂ စီးနဲ့ သင်္ဃန်းကျွန်းစံပြဆေးရုံကြီးကို ပို့ဆောင်ပေးထားပြီး YBS 111 ဟာ တောင်ဒဂုံကနေ ဆူးလေ မဟာဗန္ဓုလပန်းခြံကို ပြေးဆွဲနေတဲ့ ယာဉ်လိုင်းဖြစ်တယ်လို့ သိရပါတယ်။