မကွေးတိုင်း၊ မင်းလှမြို့နယ်မှာ စက်တင်ဘာ ၂၆ ရက် မနက်ပိုင်းက ရေနံမနယ်မြေရဲစခန်းရဲ့ လက်အောက်ခံ လက်ပံတံခါး ရဲကင်းစခန်း တိုက်ခိုက်ခံရပြီး ၅ ယောက် သေဆုံးခဲ့တယ်လို့ လူထုတော်လှန်ရေး မဟာမိတ်အင်အားစု-PRA (မကွေး) ကနေ သိရပါတယ်။
အထက်မင်းလှမြို့နယ် ရေနံမနယ်မြေရဲစခန်းရဲ့ လက်အောက်ခံ လက်ပံတံခါး နယ်မြေရဲစခန်းကို စက်တင်ဘာ ၂၆ ရက် မနက် ၁ နာရီ ၂၇ မိနစ်ကနေ ၂ နာရီ ၁၄ မိနစ်အထိ ပြည်သူ့ကာကွယ်ရေး ပူးပေါင်းတပ်ဖွဲ့တွေက စီးနင်းတိုက်ခိုက်ခဲ့ကြတယ်လို့ PRA(မကွေး) ရဲ့ စစ်ဦးစီးချုပ် ဗိုလ်ဟာကျူလီက ဒီဗွီဘီကို ပြောပါတယ်။
အဲဒီရဲကင်းစခန်းမှာ ရဲတွေအပြင် ကပစ ၁၃ က စစ်ကောင်စီတပ်သားတွေနဲ့ သစ်တောဝန်ထမ်းတွေ တပ်စွဲထားပြီး ရဲကင်းစခန်းကို တိုက်ခိုက်ဖို့အတွက် မဟာမိတ်တွေနဲ့ စခန်းသိမ်းဖို့အထိ အချိန်ယူ ပြင်ဆင်ကာ ဒီနေ့မနက်မှာ ဝင်ရောက်တိုက်ခိုက်ခဲ့တာလို့ ဆိုပါတယ်။
စီမံချက်အတိုင်း စခန်းသိမ်းဖို့ မလုပ်ဆောင်နိုင်ခဲ့ဘဲ မြေပြင်အခြေအနေအရ ကိုယ့်ဘက်က အားနည်းချက်တွေ လိုအပ်ချက်တွေ ရှိနေလို့ ရလဒ်မကောင်းနိုင်တာကြောင့် ရဲဘော်တွေ ထိခိုက်မှုမရှိဘဲ မဟာဗျူဟာမြောက် ဆုတ်ခွာနိုင်ခဲ့တယ်လို့ ပြောပါတယ်။
အဲဒီတိုက်ခိုက်မှုအတွင်းမှာ စစ်ကောင်စီဘက်က ၅ ယောက် သေဆုံးခဲ့ပြီး အများအပြား ဒဏ်ရာရရှိခဲ့ကာ သူတို့ဘက်ကလည်း ၄၀ မမတွေ၊ စက်လတ်တွေနဲ့ ရမ်းကား ပစ်ခတ်ခဲ့ကြတယ်လို့ ဆိုပါတယ်။
အဲဒီတိုက်ခိုက်မှုကို PRA(မကွေး)၊ အထက်မင်းလှ ပကဖ၊ မကွေးတောင်ပိုင်း PDF (မကွေးပကဖ)၊ အရှိုချင်းကာကွယ်ရေးတပ်-ACDF နဲ့ Key of Revolution ပြောက်ကျားတပ်ဖွဲ့တို့ ပူးပေါင်းတိုက်ခိုက်ခဲ့ကြတာလို့ ပြောပါတယ်။
အဲဒီတိုက်ခိုက်မှုအတွင်းမှာ စစ်ကောင်စီဘက်က ထိခိုက်သေဆုံးတဲ့ အခြေအနေကို ဒီဗွီဘီက သီးခြားအတည်မပြုနိုင်သေးသလို စစ်ကောင်စီဘက်ကလည်း သတင်းထုတ်ပြန်ထားတာ မတွေ့ရသေးပါဘူး။
စစ်ကိုင်းတိုင်း၊ ကနီမြို့နယ်မှာလည်း ချင်းတွင်းမြစ်ကြောင်းအတိုင်း အထက်ဘက်က စုန်ဆင်းလာတဲ့ စစ်သင်္ဘော ၂ စီးကို ဒေသတွင်း ပြည်သူ့ကာကွယ်ရေး ပူးပေါင်းတပ်တွေက စက်တင်ဘာ ၂၅ ရက် မွန်းလွဲ ၁၂ နာရီဝန်းကျင်မှာ ပစ်ခတ်တိုက်ခိုက်ခဲ့ရာ စနိုက်ပါလက်ချက်မိပြီး စစ်သား ၂ ယောက် ထိမှန်သေဆုံးခဲ့တယ်လို့ ကျောက်လုံးကြီး-KLG-PDF တပ်မဟာက စက်တင်ဘာ ၂၆ ရက် မနက်ပိုင်းမှာ ထုတ်ပြန်ခဲ့ပါတယ်။
KLG သတင်းနဲ့ ပြန်ကြားရေး တာဝန်ရှိသူက “မင်းကင်းမြို့နယ် ပန်းဆက်ပျူစောထီးရွာကနေ စုန်ဆင်းလာတဲ့ အကြမ်းဖက် စစ်ကောင်စီရဲ့ စစ်သင်္ဘော ၂ စီးကို စက်တင်ဘာ ၂၅ ရက်နေ့ မနက် ၁၁ နာရီ ၄၀ မိနစ်အချိန် ကနီမြို့ အောက်ဘက်အရောက် ပွိုင့် ၃ ပွိုင့်ခွဲပြီး တော်လှန်ရေးတပ်ဖွဲ့တွေက ပစ်ခတ်တိုက်ခိုက်ခဲ့တာ စနိုက်ပါနဲ့ပစ်တာမှာ ရန်သူစစ်သား ၂ ယောက် ထိပြီးသေတယ်” လို့ ပြောပါတယ်။
အဆိုပါ ပစ်ခတ်တိုက်ခိုက်မှုကို ယင်းမာပင်ခရိုင် တပ်ရင်း-၂၁၊ ၂၂၊ ၂၃ ကျောက်လုံးကြီး KLG-PDF၊ ကနီ၊ ယင်းမာပင်၊ ဆားလင်းကြီး၊ ပုလဲ တပ်မဟာအဖွဲ့နဲ့ နယ်မြေခံ ပကဖတွေ ပူးပေါင်းတိုက်ခိုက်ခဲ့တာဖြစ်ပြီး ကျောက်လုံးကြီး KLG-PDF အဖွဲ့ရဲ့ စနိုက်ပါလက်ချက်မိပြီး အကြမ်းဖက် စစ်သင်္ဘောပေါ်က ရန်သူစစ်သား ၂ ယောက်သေတာ မျက်မြင် အတည်ပြုနိုင်ခဲ့တယ်လို့ ထုတ်ပြန်ချက်မှာ ရေးသားဖော်ပြထားပါတယ်။
အဆိုပါ ပစ်ခတ်တိုက်ခိုက် သေဆုံးမှုတွေနဲ့ ပတ်သက်ပြီး သီးခြားအတည်ပြုနိုင်ခြင်းမရှိသေးသလို စစ်ကောင်စီဘက်ကိုလည်း ဆက်သွယ်မေးမြန်းနိုင်ခြင်းမရှိသေးပါဘူး။