မွန်ပြည်နယ် ဘီးလင်းမြို့နယ်ရှိ အလူးလေးကျေးရွာတာရာဆိုင်အနောက် ခြင်္သေ့နှစ်ကောင် လမ်းဆုံ နဲ့ MK ဆီဆိုင်ရှေ့ နေရာတွေမှာ ကင်းပုန်းဝပ်နေတဲ့ စစ်ကောင်စီတပ်ဖွဲ့ကို စက်တင်ဘာ ၂၁ ရက် မနက် ၁၀ နာရီကျော်လောက်မှာ ဒရုန်းနဲ့ ၃ ကြိမ်တိုက်ခိုက်ခဲ့တယ်လို့ ကျိုက်ထိုတော်လှန်ရေး ပူးပေါင်းတပ်ဖွဲ့ဝင်တွေက ပြောပါတယ်။
မနက် ၁၀ နာရီ ၁၂ မိနစ်မှာ ပထမ အကြိမ် ဒရုန်းဗုံးသီး ၂ လုံး၊ မနက် ၁၀ နာရီ ၄၉ မိနစ်မှာ ဒုတိယအကြိမ် ဒရုန်းဗုံးသီး ၂ လုံး၊ ၁၁ နာရီ ၂၄ မိနစ်အချိန်မှာ တတိယအကြိမ် ဒရုန်းဗုံးသီး ၂ လုံးနဲ့ ပစ်ချတိုက်ခိုက်ခဲ့တယ်လို့ ကျိုက်ထိုတော်လှန်ရေးပူးပေါင်းတပ်ဖွဲ့ တာဝန်ရှိသူတဦးက ပြောပါတယ်။
“ပစ်မှတ်တွေ အားလုံးထိမှန်ခဲ့တယ်ဆိုတော့ စစ်ကောင်စီဘက်က ထိခိုက်တာ ၃ ယောက်ရှိတယ်၊ စစ်ကောင်စီဘက်က ပြန်လည်ပစ်ခတ်ခဲ့ပေမဲ့ တော်လှန်ရေးပူးပေါင်းတပ်ဖွဲ့ဝင်ဘက်က ထိခိုက်မှု မရှိကြဘူး။”
အဆိုပါစစ်ဆင်ရေးကို ကျိုက်ထို KNU၊ KNLA၊ TPDF သူရိယစစ်ကြောင်း၊ PPDF-KD ပူးပေါင်းတပ်က တိုက်ခိုက်ခဲ့တာလို့ ဆိုပါတယ်။
ဒါ့အပြင် မွန်ပြည်နယ်၊ ကျိုက်ထိုမြို့၊ ရန်ကုန်-မော်လမြိုင် ကားလမ်းအနီး သစ်ကွင်းလမ်းစုံဂိတ် ကျိုက်ထီးရိုးလေးလမ်းခွဲ သစ်ကွင်းလမ်းစုံဂိတ်တဝိုက်မှာ ကင်းပုန်းဝပ်နေတဲ့ စစ်ကောင်စီ တပ်စိတ်အား စက်တင်ဘာ ၁၉ ရက် မနက် ၉ နာရီလောက်မှာ တောကျီးကန်းစစ်ကြောင်း တပ်ခွဲ (၂) နဲ့ KNU/KNLA ပူးပေါင်းတပ်က သွားရောက်တိုက်ခိုက်ခဲ့တယ်လို့ တောကျီးကန်း စစ်ကြောင်း တာဝန်ရှိသူက ပြောပါတယ်။
စစ်ကောင်စီဘက် ၅ ဦး သေဆုံးခဲ့ပြီး ပူးပေါင်းတပ်များဘက်မှ ထိခိုက်ဒဏ်ရာရရှိမှု တစုံတရာ မရှိခဲ့ဘူးလို့ ဆိုပါတယ်။
တော်လှန်ရေးပူးပေါင်းတပ်ဖွဲ့ဝင် တဦးက “၁ နာရီနီးပါးလောက် တိုက်ပွဲက ကြာသွားတယ်။ ကားလမ်းဘေးမှာဖြစ်တော့ ကားတွေ ပုံမှန်ပဲသွားကြတာပါ။ အရပ်သားထိခိုက်မှုတော့ မရှိဘူး” လို့ ပြောပါတယ်။
ရန်ကုန် မော်လမြိုင်ကားလမ်းမှာ စစ်ကောင်စီရဲ့ ထောက်ပို့ယာဥ်တွေ မကြာခဏကြားဖြတ် တိုက်ခိုက်ခံရလေ့ရှိပြီး အထိနာနေတယ်လို့ ဒေသကာကွယ်ရေးတပ်ဖွဲ့ဝင်တွေဆီက သိရပါတယ်။
