တရုတ်-မြန်မာနယ်စပ်၊ မူဆယ် နန်းတော်ဂိတ်နဲ့ ဆင်ဖြူဂိတ်မှာ နယ်စပ်ဖြတ်ကျော်ခွင့် တခါသုံးကတ်ရဖို့ တန်းစီနေသူတွေ များလွန်းတာကြောင့် ညအိပ်စောင့်ဆိုင်းနေရတယ်လို့ တန်းစီစောင့်ဆိုင်းနေသူတွေက ပြောပါတယ်။
အမျိုးသားတဦးက “လူတွေလည်း အရမ်းများတယ်။ တချို့ဆို ၂ ည ၃ ည စောင့်ကြတယ်။ မနက်ကျတော့ ဝင်လို့မရဘူး။ ၂ ရက် ၃ ရက်အထိ ဝင်မရတာတွေ လက်တွေ့တွေပဲ အဲဒီမှာ” လို့ ပြောပါတယ်။
တရုတ်ဘက်ဝင်ခွင့် တခါသုံးကတ်ရဖို့ နန်းတော်ပေါက်မှာလည်း တန်းစီစောင့်ဆိုင်းသူတွေ ရာချီရှိပြီး ညအိပ်စောင့်ကြသလို ဆင်ဖြူပေါက်မှာလည်း တန်းစီစောင့်ဆိုင်းသူတွေ ထောင်ချီရှိနိုင်ပြီး အဲဒီမှာလည်း ညအိပ်စောင့်ကြရကြောင်း၊ လူများလွန်းလို့ မူးလဲသူ၊ ဆေးရုံပို့ရသူတွေတောင် ရှိတယ်လို့ ဆိုပါတယ်။
ညအိပ်စောင့်ရတဲ့အပြင် နေပူလိုက်၊ မိုးရွာလိုက်ဆိုတော့ မခံနိုင်တော့ဘဲ စက်တင်ဘာ ၆ ရက် မွန်းလွဲ ၂ နာရီကျော်လောက်က အမျိုးသားတဦး မူးလဲ ဒဏ်ရာရကာ ဆေးရုံပို့ဆောင်ပေးရတယ်လို့ ပရဟိတအသင်း တာဝန်ရှိသူတဦးက ပြောပါတယ်။
မာရှယ်လောလွတ်အောင် မနက် ၄ နာရီသွားပြီး တန်းစီတာ မရလို့ ညထပ်အိပ် စောင့်တာလည်း မဝင်ရဘဲ ပြန်ခဲ့ရတယ်လို့ မိန်းကလေးတဦးက ပြောပါတယ်။
“ည ၂ နာရီတောင် ထိုးနေပြီ။ ထမင်းလည်း မစားရသေးဘူး။”
နယ်ဝေးကလာတဲ့လူတွေ စရိတ်ထောင်းပြီး ပိုဒုက္ခရောက်ကြရတယ်လို့ ဆိုပါတယ်။
တချို့တွေက လူမဝင်ဘဲနဲ့ တန်းစီ နေရာဦးပြီး နေရာပြန်ရောင်းတာတွေရှိကာ တနေရာကို တရုတ်ငွေ ယွမ် ၂၀၀ (မြန်မာငွေ ၉ သောင်းကျော်) အထိ ပေါက်ဈေးရှိနေတယ်လို့ တန်းစီနေသူတွေက ပြောပါတယ်။
တခါသုံးကတ်ရဖို့ တန်းစီသူတွေ များလွန်းတာကြောင့် နယ်စပ်ဖြတ်ကျော်ခွင့် စာအုပ်အနီနဲ့ တနိုင်တပိုင် ကုန်သယ်တဲ့လူတွေ အရင်က တရက် ၂ ခေါက် ရပေမဲ့ လက်ရှိမှာတော့ တခေါက်တောင် မနည်းဝင်ထွက်ရတာကြောင့် တော်တော် အခက်အခဲ ဖြစ်ကြတယ်လို့ ဆိုပါတယ်။
လက်ရှိ တခါသုံးကတ်ကို ဆင်ဖြူ၊ နန်းတော်၊ မန့်ဝိန်းဂိတ်တွေမှာ ထုတ်ပေးနေပြီး မန့်ဝိန်းဂိတ်ကနေတော့ ၆ ဘီးကားသမားတွေကိုသာ ထုတ်ပေးလို့ လူသိပ်မရှိတာ တွေ့ရပါတယ်။
ကိုဗစ်ကြောင့် ၂၀၂၀ မတ်လကုန်ကစပြီး နှစ်နိုင်ငံ လူဝင်လူထွက် အကန့်အသတ်မရှိ ပိတ်ခဲ့ကာ အခု ၂၀၂၃ နှစ်ဆန်းပိုင်းက တရုတ်နဲ့ထိစပ်နေတဲ့ နယ်စပ်ဒေသခံတွေကို နယ်စပ်ဖြတ်ကျော်ခွင့် စာအုပ်အနီနဲ့ ဝင်ထွက်ခွင့်ပြုခဲ့ပြီး စက်တင်ဘာ ၄ ရက် မွန်းတည့် ၁၂ နာရီမှာ မြန်မာနိုင်ငံသား မှတ်ပုံတင်ရှိသူတွေကို ၆ ညအိပ် ၇ ရက် လည်ပတ်ခွင့် တခါသုံးကတ်နဲ့ ပြန်လည်ဝင်ထွက်ခွင့်ပြုခဲ့တာ ဖြစ်ပါတယ်။