စစ်အုပ်ချုပ်ရေးကြေညာထားတဲ့ တနင်္သာရီမြို့နယ်မှာ ပြီးခဲ့တဲ့ သြဂုတ် ၃၁ ရက်နေ့က စစ်ကြောင်းထိုးလာတဲ့ စစ်ကောင်စီတပ်နဲ့ ပြည်သူ့ကာကွယ်ရေးတပ်ဖွဲ့တို့ တိုက်ပွဲဖြစ်ပွားခဲ့ပြီး စစ်သား ၄ ယောက်သေဆုံးပြီး ပြည်သူ့ကာကွယ်ရေး ရဲဘော် ၁ ယောက် ကျဆုံးခဲ့ပါတယ်။
ပြည်သူ့ကာကွယ်ရေးအဖွဲ့ မြိတ်ခရိုင်တပ်ရင်း ၂ က စက်တင်ဘာ ၁ ရက်နေ့က ထုတ်ပြန်ထားတာဖြစ်ပြီး တိုက်ပွဲကြာချိန် ၁ နာရီလောက်ရှိပြီး စစ်ကောင်စီဘက်က တပ်သား ၄ ယောက် သေဆုံး၊ ၆ ယောက် ထိခိုက်ဒဏ်ရာရသလို ပြည်သူ့ကာကွယ်ရေး ဘက်က ၁ ယောက်ကျဆုံး၊ ၂ ယောက် ဒဏ်ရာရခဲ့တယ်လို့ ဆိုပါတယ်။
စစ်ကောင်စီရဲ့ ညောင်ပင်ကွင်းတပ်ကနေ သိန္ဓောတပ်ဘက်ကို ရိက္ခာပို့ဖို့သွားတဲ့အချိန် ပြည်သူ့ကာကွယ်ရေးတပ်တွေက သတင်းရရှိပြီး ကြားဖြတ် တိုက်ခိုက်ခဲ့တာလို့ သိရပါတယ်။
PDF ရဲဘော်တယောက်က "နှစ်ဖက် ပစ်ခတ်မှုဖြစ်ပြီး စစ်တပ်ဘက်က နောက်ဆုတ် သွားပြီးနောက် အဝေးကနေ လက်နက်ကြီးနဲ့ လှမ်းထုတာ။ LPDF ဘက်က ရဲဘော်တယောက် သေဆုံး၊ ၂ ယောက် ဒဏ်ရာရတယ်" လို့ ပြောပါတယ်။
တိုက်ပွဲအတွင်း စစ်ကောင်စီ ၅၆၁ တပ်ရင်းကနေလည်း လက်နက်ကြီးတွေနဲ့ ပစ်ခတ်တိုက်ခိုက်ခဲ့တာကြောင့် ပြည်သူ့ကာကွယ်ရေးတပ်သား လက်နက်ကြီးထိမှန် သေဆုံးခဲ့တာလို့ သိရပါတယ်။
တနင်္သာရီမြို့နယ်အတွင်းမှာ ဖြစ်ပေါ်နေတဲ့ စစ်ရေးအခြေအနေတွေအရ ဒေသခံ ပြည်သူတွေနဲ့ ခရီးသွားပြည်သူတွေအနေနဲ့ သတိရှိစွာ သွားလာကြဖို့နဲ့ စစ်ရေးအရှိန် မြှင့်တက်လာနိုင်တာကြောင့် ပြည်သူတွေရဲ့ လုံခြုံရေးကိုရှေးရှုပြီး မေတ္တာရပ်ခံ ထုတ်ပြန်ကြေညာထားတာဖြစ်တယ်လို့ ထုတ်ပြန်ချက်မှာဖော်ပြထားပါတယ်။