ထိုင်းနိုင်ငံရှိ ကြက်ခြံမှာလုပ်ကိုင်နေတဲ့ မြန်မာအလုပ်သမားတွေ လူ့အခွင့်အရေးချိုး ဖောက်ခံနေရမှုကို ရုပ်သံ​မှတ်တမ်းရိုက်တင်ပြီး ဆိုရှယ်မီဒီယာပေါ်မှာ တင်ခဲ့တဲ့အတွက် တရား​စွဲဆိုခံထားရတဲ့ ထိုင်းလူ့အခွင့်အရေးလှုပ်ရှားသူ ၃ ဦးကို သြဂုတ် ၂၉ ရက်မှာ ထိုင်းတရားရုံးက တရားသေလွှတ်ပေးခဲ့တယ်လို့  Benar News သတင်းမှာ ဖော်ပြပါတယ်။

ထိုင်းလူ့အခွင့်အရေးလှုပ်ရှားသူ ၃ ဦးဖြစ်တဲ့ အန်ခါနာ၊ ပူတန်နီနဲ့ သန်နာပွန်တို့ကို ၂၀၁၉ ခုနှစ်က Thammakaset  ထိုင်း ကုမ္ပဏီကအသရေဖျက်မှုနဲ့ တရားစွဲခဲ့တဲ့အတွက် တရားရင်ဆိုင်ခဲ့ရပေမယ့် ၄ နှစ်အကြာမှာ တရားရုံးကအပြစ်မရှိကြောင်း အမိန့်ချခဲ့ပါတယ်။

ထိုင်းလူ့အခွင့်လှုပ်ရှားသူတဦးဖြစ်တဲ့ပူတန်နီက "ဒီနေ့တရားရုံးက ဒီဆုံးဖြတ်ချက်ချတာကို ဝမ်းသာပါတယ်။ ဒါပေမဲ့ ရလဒ်ဘယ်လိုပဲဖြစ်ဖြစ် တရားစွဲဆိုခံရတဲ့ ၄ နှစ်အတွင်းဟာ ကျမတို့တယောက်ချင်းစီအတွက် အရမ်းကိုနာကျင်ရပါတယ်။ ဒီတရားရင်ဆိုင်နေရတာဟာ ကျမတို့ရဲ့အချိန်၊ အရင်းအမြစ်တွေနဲ့ စိတ်ဓာတ်တွေပါ အများကြီးဆုံးရှုံးနစ်နာခဲ့ရပါတယ်" လို့ပြောပါတယ်။

၂၀၁၆ ခုနှစ်က ဘန်ကောက်မြို့နဲ့မိုင် ၁၀၀ ခန့်ဝေးတဲ့ လော့ဘူရီခရိုင်ရှိ Thammakaset ကုမ္ပဏီပိုင် ကြက်မွေးမြူရေးခြံတခုမှာမြန်မာလုပ်သားတွေဟာ တနေ့လျှင် နာရီ ၂၀ ကျော် အလုပ်ခိုင်းစေခံရမှုတွေနဲ့ လူ့အခွင့်အရေးချိုးဖောက်မှုခံနေရတာနဲ့ပတ်သက်ပြီး လူ့အခွင့်လှုပ်ရှားသူ ၃ ဦး အဖွဲ့ဟာ  မှတ်တမ်း ဗီဒီယိုရိုက်ကာ ဆိုရှယ်မီဒီယာပေါ်တင်ခဲ့ပြီး တရားမျှတမှုအတွက် တောင်းဆိုခဲ့ပါတယ်။

Thammakaset ကုမ္ပဏီကိုတော့ နာရီ ၂၀ ကျော်အလုပ်ခိုင်းစေမှု၊ အလုပ်သမားတွေရဲ့လစာထဲ က ငွေဖြတ်တောက်မှုနဲ့ လူ့အခွင့်ရေးချိုးဖောက်မှုတွေအတွက် မြန်မာအလုပ်တွေကို ဘတ်ငွေ ၁ ဒသမ ၇ သန်းပေးဆောင်ဖို့ ထိုင်းတရားရုံးက ၂၀၁၉ ခုနှစ်မှာ အမိန့်ချမှတ်ခဲ့ပါတယ်။

Thammakaset ကုမ္ပဏီဟာ ၂၀၁၆ ခုနှစ်ကစပြီး ကုမ္ပဏီကိုမဟုတ်မမှန်တာတွေပြောဆိုခဲ့တယ်ဆိုပြီး တက်ကြွလှုပ်ရှားသူတွေ၊ အလုပ်သမားတွေနဲ့ သတင်းထောက်တွေအပါအဝင် စုစုပေါင်း ၂၂ ဦးကို အမှု ၃၉ မှုနဲ့ တရားစွဲဆိုခဲ့ပြီး ခုလက်ရှိအချိန်ထိ အမှု ၃၆ မှု ရှုံးနိမ့်ထားပါတယ်။

Source. Benar News