ချင်းပြည်နယ်၊ ထန်တလန်မြို့က စစ်ကောင်စီတပ်နဲ့ ချင်းတော်လှန်ရေးတပ်တွေရဲ့တိုက်ပွဲမှာ စစ်ကောင်စီတပ်သား ၈၀ ကျော်သေဆုံးဒဏ်ရာရပြီး ချင်းတော်လှန်ရေးပူးပေါင်းတပ်ဘက်က ၁၅ ယောက် ကျဆုံးခဲ့တယ်လို့ CDF-Thantlang က ဒီနေ့ ထုတ်ပြန်ပါတယ်။
Tilim Operation 3 လို့ အမည်ပေးထားတဲ့ စစ်ဆင်ရေးနဲ့ ဩဂုတ် ၂၇ နဲ့ ၂၈ ရက်မှာ ထန်တလန်မြို့တွင်းက တပ်ကုန်းနဲ့ အနီးဝန်းကျင်က စစ်စခန်း ၅ ခု၊ မြို့တွင်းက စစ်တပ်စခန်းငယ် ၂ နဲ့ ဟားခါး-ထန်တလန်ကြား Auto Tower တောင်တို့ကို ထိုးစစ်ဆင်တိုက်ခိုက်ခဲ့ကြတယ်လို့ ဆိုပါတယ်။
ဒီ Tilim Operation 3 စစ်ဆင်ရေးကြောင့် စစ်ကောင်စီတပ်သား ၃၀ ကျော်သေဆုံး၊ ၅၀ ကျော်ဒဏ်ရာရပြီး လက်နက် ၅ လက်နဲ့ ကျည်ဆန်တွေ သိမ်းဆည်းရမိခဲ့တယ်လို့ ထုတ်ပြန်ချက်မှာ ဖော်ပြထားပါတယ်။
ပြီးတော့ ချင်းတော်လှန်ရေးအဖွဲ့တွေဖြစ်တဲ့ CNA ကရဲဘော် ၅ ယောက်၊ CDF- ထန်တလန်က ရဲဘော် ၄ ယောက်၊ CDF-ဟားခါးက ရဲဘော် ၁ ယောက်နဲ့ CDF-ဇိုဖေက ရဲဘော် ၅ ယောက်၊ စုစုပေါင်း ရဲဘော် ၁၅ ယောက်ဟာ ချင်းအမျိုးသားလွတ်မြောက်ရေးအတွက် အသက်ပေးလှူခဲ့ကြတယ်လို့ ဆိုပါတယ်။
ဒီစစ်ဆင်ရေးကို ချင်းအမျိုးသားတပ်ဦး (Chin National Army -CNA)၊ CDF ထန်တလန်၊ CDF ဟားခါးနဲ့ CDF ဇိုဖေ ပူးပေါင်းတပ်ဖွဲ့က တိုက်ခိုက်ခဲ့တာလို့ ဆိုပါတယ်။
ပြီးခဲ့တဲ့ ဇူလိုင် ၁၁ ရက်နေ့က Tilim Operation 2 စစ်ဆင်ရေးကို ဆင်နွှဲခဲ့ပြီး အဲဒီတိုက်ပွဲအပြီး ခလရ ၂၆၉ က တပ်သားတယောက်ဟာ လက်နက်အပြည့်အစုံနဲ့ အလင်းဝင်ခဲ့ပါတယ်။
အဲဒီ ၃၇ ရက်ကြာတိုက်ပွဲမှာတော့ စစ်ကောင်စီဘက်က ၁၅ ယောက်သေဆုံး၊ ၃၀ ကျော်ဒဏ်ရာရပြီး ၂ ယောက်ကို အရှင်ဖမ်းဆီးနိုင်ခဲ့ပါတယ်။
