Home
မြန်မာသတင်း
မော်လမြိုင် အမှတ် (၉) အထက်တန်းကျောင်း မီးလောင်
DVB
·
August 4, 2023

မွန်ပြည်နယ်၊ မော်လမြိုင်မြို့၊ ပန်းပဲတန်းရပ်ရှိ၊ အ.ထ.က (၉) အခြေခံပညာ အထက်တန်း ကျောင်းမှာ သြဂုတ် ၃ ရက် ညသန်းခေါင်လောက်က  မီးလောင်မှု ဖြစ်ပွားပြီး နှစ် ၁၀၀ ကျော် သက်တမ်းရှိ နှစ်ထပ် ကျောင်းဆောင်အပါအဝင် စာသင်ဆောင်တွေ မီးလောင်ပျက်စီးဆုံးရှုံးသွားပါတယ်။

မီးလောင်မှုကို မြို့ခံမီးသတ်တပ်ဖွဲ့ဝင်တွေ၊ လူမှုကယ်ဆယ်ရေးသမားတွေအပါအဝင် ဒေသခံတွေက မီးကိုဝိုင်းဝန်းငြှိမ်းသတ်ခဲ့တာကြောင့် သြဂုတ် ၄ ရက် မနက် ၁ နာရီ မိနစ်  ၅၀ လောက်မှာ မီးငြိမ်းသွားတယ်လို့ မြို့ခံလူမှုကယ်ဆယ်ရေးတာဝန်ရှိသူက ပြောပါတယ်။

မြို့ခံတယောက်က “မီးကများပါတယ်။ စာသင်ကျောင်းတကျောင်းလုံးနီးပါးလောက် မီးလောင်သွားတာ။ ဝါယာရှော့ခ်ကနေ လောင်တာ။ ၂ နာရီကြာလောက် မီးသတ်သမားတွေက ငြှိမ်းရတယ်။ မီးလောင်ရတဲ့ အကြောင်းရင်းကိုတော့ မီးသတ်တပ်ဖွဲ့ဝင်တွေကစုံ စမ်းစစ်ဆေးနေတုန်းပဲ”လို့ ပြောပါတယ်။

အဲ့ဒီမီးလောင်မှုကို မီးသတ်တပ်ဖွဲ့က Level အဆင့် ၄ သတ်မှတ်ပြီး မီးသတ်ကား ၄ စီး၊ မီးသတ်ရေသယ်ယာဉ် ၁၀ စီး၊ လူမှုကယ်ဆယ်ရေးနဲ့ မီးသတ်ရေသယ်ယာဉ် ၁၆ စီးနဲ့ စုစုပေါင်းယာဉ်အစီး ၃၀ ကျော်နဲ့  ရေဂါလံ ၆၀၀၀၀ ကျော် အသုံးပြု မီးငြှိမ်းသတ်ခဲ့ရပါတယ်။

မီးသတ်ရာမှ ပါဝင်ခဲ့တဲ့  ပရဟိတသမား ၁ ဦးက “ကျောင်းအုပ်ကြီး အဆောင်အနောက်က ဝါယာရှော့ခ် ဖြစ်ပြီး မီးစလောင်တာပါ၊ သန္ဓေမီးသတ်တပ်ဖွဲ့က မီးသတ်သမား တဦးလည်း ထိခိုက်ဒဏ်ရာရရှိခဲ့ပါတယ်” လို့ ပြောပါတယ်။

ဒဏ်ရာရသွားသူကတော့ မြို့နယ်မီးသတ်စခန်းက တပ်ကြပ်ကြီးငြိမ်းချမ်းဖြစ်ပြီး သူ့ရဲ့ ယာဘက်လက်ဖမိုးမှာ မှန်ကွဲပြတ်ရှဒဏ်ရာ အနည်းငယ်ရခဲ့တာဖြစ်ပြီး မစိုးရိမ်ရဘူးလို့ မြို့နယ်မီးသတ်တပ်ဖွဲ့ကနေ သိရပါတယ်။

စာကျောင်း အလယ်ဆောင်ကနေ  ၃ ထပ်ဆောင်ထိ  မီးလောင်သွားပြီး စာသင်ကျောင်းသွပ်မိုး၊ အုပ်ညှပ်ပျဉ်ကာ ပျဉ်ခင်း ၂ ထပ်၊ ၊သွပ်မိုး ပျဉ်ကာပျဉ်ခင်း ၃ ထပ် ပေါ်ထပ်၊ စာသင်ခုံတွေ စုစုပေါင်း ကျပ် ၂၇၃ သိန်းခန့် ဆုံးရှုံခဲ့ပါတယ်။ မီးလောင်မှုကြောင့် ကျောင်း အဆောက်အဦ ၂ ခုအပါအဝင် စာသင်ခန်းသုံးပစ္စည်းတွေ၊ စာရွက်စာတမ်း၊ စာအုပ်တွေလည်း ပျက်စီး ဆုံးရှုံးခဲ့တယ်လို့ အေးမြကြည်လင် အရေးပေါ်ကယ်ဆယ်ရေးအသင်း တာဝန်ရှိသူတဦးက ဆိုပါတယ်။

မီးလောင်မှုကြောင့် ကျောင်းသား ၁၀၀၀ ကျော်လောက် ပညာသင်ကြားနေတဲ့ စာသင်ကျောင်းကို ယာယီပိတ်ထားလိုက်ပြီလို့  မြို့ခံတွေက ပြောပါတယ်။

အဆိုပါမီးလောင်မှုနဲ့ပတ်သက်ပြီး ကျောင်းစောင့်  ဦးဝင်းဌေးကို မြို့မရဲစခန်းက အမှုဖွင့် အရေးယူထားပါတယ်။

မီးလောင်ခဲ့တဲ့ ၂ ထပ်ကျောင်းဆောင်ဟာ ၁၈၉၉ ခုနှစ်မှာ စတင်တည်ထောင်ခဲ့ကာ ရှင်မဟာဗုဒ္ဓဃောသ အထက်တန်းကျောင်းလို့ လူသိများပြီး အမျိုးသားကျောင်းတွေ မပေါ်ပေါက်ခင် ကိုလိုနီခေတ်ကတည်းက တည်ထောင်ခဲ့တဲ့ကျောင်း ဖြစ်ပါတယ်။

မွန်ပြည်နယ်ထဲမှာ ပေါ့ဆမီးတွေကြောင့် မီးလောင်မှုတွေဟာ မကြာခဏဆိုသလို ဖြစ်လာနေပြီး မီးလောင်မှုတွေကြောင့် အသက်ဆုံးရှုံးခဲ့ရသလို လူနေအိမ် ဆုံးရှုံးရတာလည်း အများအပြား ရှိထားပါတယ်။

ဓာတ်ပုံ - မော်လမြိုင်မီးသတ်၊ အေးမြကြည်လင်အသင်း)

Live

About DVB

The Democratic Voice of Burma (DVB) publishes daily independent news and information across Myanmar and around the world by satellite TV and the internet. DVB was founded in 1992 and is registered as a non-profit association in Thailand.

Follow Us

© Democratic Voice of Burma 2024