စစ်ကိုင်းတိုင်း၊ ဆားလင်းကြီးမြို့နယ်ထဲကို စစ်ကောင်စီတပ်က  ဇူလိုင် ၂၁ ရက်မှာ သံချပ်ကာယာဉ်  ၃ စီးနဲ့ ဝင်ယောက်ပြီး ဆားလင်းကြီးမြို့ပေါ်မှာ ပစ်ခတ်ခြိမ်းခြောက်တာ၊ ပြည်သူတွေကို ဖမ်းဆီးနှိပ်စက်တာတွေ ဆက်တိုက်ပြုလုပ်နေတယ်လို့ ဒေသခံတွေက ပြောပါတယ်။ 

ဆားလင်းကြီးဒေသခံတစ်ဦးက “သံချပ်ကာ စစ်ကား ၃ စီးနဲ့ရောက်လာတယ်၊ စစ်သားတွေ မုံရွာဘက်ကနေ စက်လှေနဲ့ကူးလာတယ်။ ကျနော်တို့ ညဘက်တောင် အိပ်လို့မပျော်ပါဘူး။ မြစ်ကြောင်းဘက်ကလည်းလာမယ်ဆိုတော့ မြစ်ကြောင်းဘက်က လူတွေကလည်း ရှောင်ပြေးပေါ့ဗျာ။ ဒီနေ့မနက်ကတော့ စစ်ကြောင်းထိုးတဲ့ဟာတွေက ဆားလင်းကြီးဘက်မှာ စက်မှု ၁ ဘက်ကိုရောက်တယ်။ ဆားလင်းကြီးမြို့ပေါ်မှာလည်း ပစ်တယ် ခတ်တယ်ပေါ့ဗျာ။ သူတို့သတင်းပဲ ကျနော်တို့ကနားထောင်နေတာ။ ဘာဖြစ်လို့လဲဆိုတော့ ကျနော်တို့က ပြေးဖို့ဗျ။ သူတို့က တွေ့ရင်သတ်တယ် ပစ္စည်းယူတယ်။ မိန်းကလေးတွေဘာတွေဆိုလည်း မဖွယ်မရာလုပ်တယ်။ နည်းနည်းပါးပါး ကလန်ကဆန်လုပ်ရင်ကို ဖမ်းတော့မှာ မဟုတ်ဘူးဗျ၊ ထောင်ထဲကို မရောက်တော့ဘူး၊ သတ်သွားတာပေါ့နော်”လို့ ပြောပါတယ်။

ဆားလင်းကြီးမြို့နယ်ထဲကို ရောက်ရှိနေတဲ့ စစ်ကြောင်းဟာ ယင်းမာပင်၊ စုန်းချောင်းရွာဘက်မှာ ပြည်သူ ၁၀ ယောက်ကျော်ကို သတ်ဖြတ်ခဲ့တဲ့ စစ်ကြောင်းဖြစ်ပြီး ချင်းတွင်းမြစ်ကြောင်းကနေလည်း စစ်သားအင်အား ထပ်ပြီးဖြည့်တင်းနေတယ်လို့လည်း ဒေသခံက ပြောပါတယ်။

မုံရွာဘက်ကမ်းကနေ ဆားလင်းကြီး၊ ညောင်ပင်ကြီးဘက်ကမ်းကနေတဆင့် ရွှေလှေ၊ လက်ပံတောင်းတောင်တလျှောက် ထိန်းချုပ်နိုင်ဖို့ စစ်ကောင်စီတပ်က ဆက်တိုက်အင်အားသုံးနေတာဖြစ်ပါတယ်။

တရုတ်ကြေးနီစီမံကိန်း ဝမ်ပေါင်တည်ရှိရာ ဆားလင်းကြီးနယ်၊ လက်ပံတောင်း တောင်ပတ်ဝန်းကျင်ကို စစ်ကောင်စီက အကြိမ်ကြိမ်ဖိအားပေးထိန်းချုပ်ဖို့ကြိုးစားပေမဲ့ ဒေသခံတွေက ပြောက်ကျားတိုက်ခိုက်တာတွေကြောင့် လက်ရှိအချိန်အထိ မထိန်းချုပ်နိုင်ခဲ့ပါဘူး။

ဒေသခံပြည်သူတွေနဲ့ PDF လှုပ်ရှားလို့မရအောင် စစ်ကောင်စီတပ်တွေက လမ်းပန်းဆက်သွယ်ရေးတွေပိတ်ဆို့ပြီး လုံခြုံရေးအထူးတင်းကျပ်ထားပါတယ်။

ဆားလင်းကြီးဒေသခံ နိုင်ငံရေးအကျဉ်းသားဟောင်းတဦးက  "ဒီဘက်ဒေသမှာ ဖမ်းခံရတဲ့သူတွေရဲ့ မိသားစုတွေရှိတယ်။ နိုင်ကျဉ်းမိသားစုတွေဘာတွေရှိမယ်ပေါ့ဗျာ။ ညောင်ပင်ကြီးဘက်ကနေ စစ်ကောင်စီတပ်တွေက ခြေကုပ်ယူထားတယ်။ သွားလမ်းလာလမ်းကျဉ်းကျပ်အောင်လုပ်ထားတော့ ပြည်သူတွေမှာလည်း ထောင်ဝင်စာတွေ့ဖို့ ဘာဖို့ သားချင်းမောင်ဖွားတွေအတွက် လိုက်ပေးဖို့က တော်တော်ခဲယဉ်းသွားတယ်။ ကျနော်ဆိုရင် ထောင်ကထွက်လာတာမကြာသေးပါဘူး၊ ၇ လကျော်လောက်ရှိပါသေးတယ်။ ဒုက္ခရောက်တယ်ပေါ့။ မိတ်ဆွေတွေ ထောက်ပံ့ပေးဖို့ ဘာဖို့၊ လမ်းပန်းဆက်သွယ်ရေးကအစ ဖြတ်တောက်လိုက်တာတွေ။ စားဝတ်နေရေးကအစ တော်တော်လေးကျဉ်းကျပ်သွားတယ်”လို့ ပြောပါတယ်။

စစ်ကိုင်းဒေသတွင်း ဝမ်ပေါင်ကြေးနီစီမံကိန်း၊ တကောင်းနီကယ်စီမံကိန်းတို့အပါအဝင် တရုတ်အစိုးရရဲ့ အကျိုးစီးပွားတွေကို စစ်ကောင်စီက ကာကွယ်ဖို့ကြိုးစားနေတာပါ။

အမျိုးသားညီညွတ်ရေးအစိုးရကလည်း အင်အားကြီးတရုတ်နဲ့ သံတမန်ဆက်ဆံရေးကို ထိန်းညှိချင်တာကြောင့် စစ်ရေးပစ်မှတ်မဟုတ်တဲ့ စီမံကိန်းတွေကို မတိုက်ခိုက်ဖို့ လက်အောက်ခံ PDF တွေကို ညွှန်ကြားထားပါတယ်။

စစ်ကောင်စီက ဒီအချက်ကိုအခွင့်အရေးယူပြီး စီမံကိန်းပိုင်နက်ထဲမှာ တပ်စွဲတာ၊ စီမံကိန်းပိုင်နက်ကို အကာအကွယ်ယူပြီး ပြည်သူတွေကို တိုက်ခိုက်အကြမ်းဖက်တာတွေ ပြုလုပ်ခဲ့ပါတယ်။

မုံရွာနယ်ခံနိုင်ငံရေးသမား ကိုစိုးဝင်းဆွေက "တရုတ်နိုင်ငံအနေနဲ့က ဘေးပတ်ဝန်းကျင်နိုင်ငံတွေ မတည်မငြိမ်ဖြစ်နေတယ်။ အာဏာရှင်တွေအုပ်စိုးနေတယ်ဆိုရင် သူ့အကျိုးစီးပွားကို ပိုပြီးတော့ အကျိုးရှိစေမယ်လို့ ဆုံးဖြတ်တာမျိုးလည်း ရှိကောင်းရှိနိုင်တယ်ပေါ့။ စစ်ကိုင်းတိုင်းအတွင်းက သူ့ရဲ့ အကျိုးစီးပွားတွေကို ကာကွယ်ဖို့၊ ရှင်သန်ရပ်တည်ဖို့ဆိုရင် အကြမ်းဖက်စစ်တပ်တခုတည်းကိုပဲ တဖက်သတ်ဆက်သွယ်ပြီးတော့ ဆောင်ရွက်တာကတော့ တရုတ်အနေနဲ့ လုံလောက်မှုမရှိဘူးလို့  ယူဆတယ်။ တော်လှန်အင်အားစုတွေကိုလည်းပဲ တရုတ်အနေနဲ့ ဆက်သွယ်ဆက်ဆံတာမျိုးတွေ ဆောင်ရွက်သင့်တယ်လို့ ကျနော်ကတော့ အကြံပြုချင်တယ်"လို့ ပြောပါတယ်။

NUG က နိုင်ငံခြားရင်းနှီးမြှုပ်နှံမှု စီးပွားရေးစီမံကိန်းတွေကို မတိုက်ခိုက်ဖို့ ကန့်သတ်တာဟာ နိုင်ငံတကာစစ်စည်းကမ်းအရ စစ်ရေးပစ်မှတ်မဟုတ်တာတွေကိုမတိုက်ခိုက်ဖို့ ရှောင်လွှဲတာဖြစ်ပြီး သံတမန်ရေးအရကောင်းမွန်သလို NUG ကို နိုင်ငံတကာက တရားဝင်အစိုးရအဖြစ် အသိအမှတ်ပြုလာရေးအတွက်လည်း မျှော်မှန်းတာမျိုးဖြစ်နိုင်တယ်လို့ စစ်ကိုင်းဒေသခံ PDF အဖွဲ့တွေက ပြောပါတယ်။

မြေပြင်အဖွဲ့တွေကတော့ ဘယ်လိုညွှန်ကြားချက်မျိုးရှိရှိ ကြုံလာတဲ့အခြေအနေအပေါ်မူတည်ပြီး တုံ့ပြန်တာမျိုးဖြစ်လာလိမ့်မယ်လို့ ကျားသစ်နက်ပြောက်ကျားတပ်ဖွဲ့ခေါင်းဆောင်က ပြောပါတယ်။

သုတချမ်းသာ