ပဲခူးတိုင်း၊ သနပ်ပင်မြို့နယ်၊ ကျွဲဖြူချောင်းကျေးရွာရှိ ချောင်းထဲမှာ ဇူလိုင် ၁၉ ရက်၊ နေ့လယ် ၁ နာရီလောက်က စက်လှေတိမ်းမှောက်ပြီး လူ ၄ ဦး ရေနစ်သေဆုံးသွားတယ်လို့ ပဲခူးမြို့ခံ ကယ်ဆယ်ရေးအသင်းတွေက ပြောပါတယ်။
အဆိုပါ စက်လှေပေါ်မှာ စက်လှေမောင်းသူအပါအဝင် အမျိုးသား၊ အမျိုးသမီး ၁၁ ဦး လိုက်ပါလာကြပြီး ကျွဲဖြူချောင်းရွာရှိ ဘုန်းကြီးကျောင်းမှာ ဝါဆိုသင်္ကန်းကပ်တဲ့အလှူက ပြန်လာတာလို့ သိရပါတယ်။
ပဲခူးမြို့ခံကယ်ဆယ်ရေးအသင်းတာဝန်ရှိသူတဦးက “ဝါဆိုသင်္ကန်းကပ်ပြီး ပြန်လာတဲ့လမ်းမှာ ဖြစ်သွားကြတာ၊ သူတို့က ရန်ကုန်က။ ကျွဲဖြူချောင်းသွယ်ထဲမှာ မှောက်ပြီး အမျိုးသမီး ၄ ဦး သေဆုံးပါတယ်။ ရုပ်အလောင်းတွေကို ပဲခူးမြို့က ၂ သင်း၊ သနပ်ပင် ၁ သင်း ကားတွေနဲ့ ကျီစုသုသာန်ကို လိုက်ပို့ထားပါတယ် ” လို့ ဆိုပါတယ်။
သေဆုံးသူ ၄ ဦးစလုံးဟာ ရန်ကုန်၊ တောင်ဥက္ကလာပမြို့နယ်နေထိုင်သူ အမျိုးသမီး ၄ ဦးဖြစ်ပြီး အသက် ၅၀ အရွယ် အမျိုးသမီး ၁ ဦး၊ အသက် ၂၀ ကျော်အမျိုးသမီး ၂ ဦးနဲ့ အသက် ၁၀ နှစ်အရွယ် မိန်းကလေးတဦးတို့ ပါဝင်ပါတယ်။
ရုပ်အလောင်းတွေကို သနပ်ပင်ဆေးရုံကြီးကနေ ရန်ကုန်၊ တောင်ဒဂုံမြို့နယ်ရှိ ကျီစုသုသာန်ကို ကလျာဏမိတ္တလူမူကူညီရေးအသင်း၊ သာမဏေကျော်လူမူကူညီရေးအသင်း၊ သနပ္ပင်စေတနာရှင် လူမှုကူညီရေးအသင်း ကားတွေနဲ့ ကူညီပို့ဆောင်ပေးခဲ့တယ်လို့ သိရပါတယ်။
ဓာတ်ပုံ(သာမဏေကျော်)
