မကွေးတိုင်း၊ ပေါက်မြို့နယ်၊ တပ်ကုန်းရွာသစ်ကို ပြည်သူ့ကာကွယ်ရေးတပ်ဖွဲ့ (PDF) တွေက ဇူလိုင် ၁၁ ရက် မနက် ၅ နာရီလောက်က စတင်ပြီး ဝင်ရောက်စီးနင်းတိုက်ခိုက်ခဲ့ရာ စစ်ကောင်စီတပ်ဘက်က စစ်သားနဲ့ ပျူစောထီးတွေ ထိခိုက်သေဆုံးမှုရှိတယ်လို့ Earthquake People's Defense Force က သိရပါတယ်။
စစ်ကောင်စီတပ် တပ်စွဲထားပြီး ပျူစောထီးတွေနေထိုင်တဲ့ တပ်ကုန်းရွာသစ်ကို PDF တွေက လက်နက်ကြီး၊ လက်နက်ငယ်တွေနဲ့ ၁ နာရီ ၄၅ မိနစ်ကြာ တိုက်ခိုက်ခဲ့တယ်လို့ Earthquake PDF ခေါင်းဆောင်က ပြောပါတယ်။
“သူတို့ဘက်က ထွက်ပြေးတာတွေရှိတယ်၊ ကျနော်တို့ကို ပြန်ပစ်ပေမဲ့ ကြီးကြီးမားမား ထိခိုက်တာ မရှိပါဘူး။ သူတို့ လေကြောင်းပစ်ကူလာတာက တိုက်ပွဲပြီးမှလာတာ။”
တပ်ကုန်းရွာသစ် တိုက်ပွဲမှာ စစ်သား ၅ ယောက်နဲ့ ပျူစောထီးအဖွဲ့က ၇ ယောက် သေဆုံးခဲ့သလို ၁၆ ယောက် ထိခိုက်ဒဏ်ရာရခဲ့ပြီး ပြည်သူ့ကာကွယ်ရေးတပ်ဖွဲ့ဘက်က ရဲဘော် ၃ ဦး ဒဏ်ရာရခဲ့တယ်လို့ သိရပါတယ်။
တပ်ကုန်းရွာတိုက်ပွဲမှာ သေဆုံးတဲ့ စစ်ကောင်စီတပ်ဘက်က အလောင်းတွေကို နေရာတင် ထားခဲ့တယ်လို့ Earthquake PDF ခေါင်းဆောင်က ပြောပါတယ်။
တပ်ကုန်းရွာသစ်မှာ စစ်ကောင်စီတပ်နဲ့ PDF တွေ တိုက်ပွဲဖြစ်ပွားပြီးနောက် စစ်တပ်ဘက်က Mi 35 ရဟတ်ယာဥ်နဲ့ မနက် ၈ နာရီမှာ လာရောက်ပစ်ခတ်ခဲ့တယ်လို့ သိရပါတယ်။
စစ်ကောင်စီတပ်က ပေါက်မြို့ပေါ်ကနေ ၁၂၀ မမ လက်နက်ကြီးနဲ့ အချက်ရေများစွာ ပစ်ခတ်ခဲ့တာကြောင့် တပ်ကုန်းရွာထဲက တိရစ္ဆာန်တွေ ထိခိုက်သေဆုံးမှုရှိတယ်လို့ သိရပါတယ်။
အဆိုပါတိုက်ပွဲကို ပေါက်မြို့နယ် YRF တပ်ဖွဲ့၊ ပခုက္ကူခရိုင် PDF ရင်း ၁၁/၁၈၊ PKU Earthquake အဖွဲ့၊ ပေါက်ပကဖ၊ ပေါက်ကျေးရွာကာကွယ်ရေးအဖွဲ့တွေ၊ မြိုင်ပကဖ ရင်း ၃၊ ခွဲ ၂၊ ၄ မှ တပ်စိတ်တွေ၊ ပခုက္ကူမြို့ပြပြောက်ကျားတို့ ပူးပေါင်းတိုက်ခိုက်ခဲ့တာဖြစ်ပြီး လက်လုပ်သေနတ် ၇ လက်လည်း သိမ်းဆည်းရမိခဲ့တယ်လို့ သိရပါတယ်။
ဇူလိုင် ၁၁ ရက် နေ့လယ် ၁ နာရီလောက်က မြိုင်မြို့နယ် တောင်ကန်နီပျူရွာနဲ့ ညနေ ၅ နာရီလောက်မှာ မြိုင်မြို့မရဲစခန်းတို့ကို မောင်းသူမဲ့လေယာဥ် အသုံးပြုပြီး ဗုံးကြဲတိုက်ခိုက်ခဲ့တယ်လို့ မြိုင်ပကဖကနေ သိရပါတယ်။
မြိုင်မြို့နယ်အတွင်း ဒရုန်းနဲ့ တိုက်ခိုက်မှုကြောင့် စစ်ကောင်စီတပ်သားတွေ ထိခိုက်မှုအခြေအနေကို ဒီဗွီဘီအနေနဲ့ သီးခြား အတည်မပြုနိုင်သေးပါဘူး။