ကချင်ပြည်နယ်၊ ဝိုင်းမော်မြို့နယ်ထဲက ကျေးရွာ တချို့မှာ ၂၀၁၇ ခုနှစ်တုန်းက တရုတ်ဖရဲစိုက်ခင်း အဖြစ် ငှားရမ်းခဲ့တဲ့ လယ်တွေမှာ ၂၀၂၃ ခုနှစ်ကစပြီး စပါးကို ပြန်လည်စိုက်ပျိုးလာတယ်လို့ တောင်သူတွေ က ပြောပါတယ်။
တရုတ်ဖရဲတွေကို မြောင်းဖော်ကာ ပလတ်စတစ်အုပ်ပြီး စိုက်ပေမဲ့ အဆင်မပြေတာကြောင့် နှစ်အနည်းငယ်သာစိုက်ပျိုးကြပြီး အခုနှစ်မှာ စပါးပြန်စိုက်ကြတာလို့ ဝိုင်းမော်မြို့ခံ တဦးက ပြောပါတယ်။
ဒေသခံတောင်သူ တဦးက "ဖရဲက တရာသီပဲ စိုက်တာ။ ပထမ ၂ နှစ် စပါးအရမ်းကောင်းတယ်။ တတိယနှစ်မှာတော့ စပါးစေ့ လှီပြီး စပါးကြိတ်ရင် အမှုန့်တွေ ဖြစ်သွားလို့ တကွင်းလုံး ဒုက္ခ ရောက်သွားတယ်" လို့ ပြောပါတယ်။
ဝိုင်းမော်အထွက် မြစ်ကြီးနား- လိုင်ဇာကားလမ်းဘေးရွာတွေဖြစ်တဲ့ ခါးရှီ၊ အင်းလေး၊ အောင်မြေ ၁၊ အောင်မြေ ၂နဲ့ ရွှေညောင်ပင်ကျေးရွာတွေက ဖရဲစိုက်ခင်းအဖြစ် ငှားရမ်းခဲ့သူတွေဟာ တတိယနှစ်ရဲ့ ခြောက်ခြားစရာ အဖြစ်အပျက်ကြောင့် တောင်ကြားတွေဖက်ထိ အဝေးကြီး တောင်ယာ သွားခုတ်ရ တဲ့ အနေအထားဖြစ်ခဲ့ရတယ်လို့ ဆိုပါတယ်။
အောင်မြေ ၁ က လူငယ် တဦးကတော့ "သတိထားမိသလောက်ဆို ဓာတ်မြေသြဇာတွေကို တနှစ်ထက် တနှစ် ဆတိုးပြီး ထည့်ပေးနေရင်းကနေ မြေဆီက လုံးဝပျက်စီးသလို ဖြစ်သွားတာ" လို့ ပြောပါတယ်။
ဒီနှစ်မှာတော့ စပါးကို ပြန်စမ်းစိုက်တာဖြစ်ပြီး စပါးအထွက်နဲ့ ဆန်အနေအထားကို စောင့်ကြည့်ရမယ်လို့ ၅ နှစ်လောက်ဖရဲစိုက်ခဲ့သူ တဦးက ပြောပါတယ်။
၂၀၂၃ ခုနှစ်မှာတော့ မျှော်လင့်ချက်များစွာနဲ့ ဧကရာချီတဲ့ လယ်ကွင်း တော်တော်များများက စိမ်းစို စပြုလာနေသလို ပြန်မပြင်နိုင်သေးတဲ့ လယ်စောင့်တဲလေးတွေနဲ့ ဆက်ပစ်ထားတဲ့ ဖုန်းဆိုးလယ်မြေတွေလည်းအများအပြား ရှိနေပါသေးတယ်။
၂၀၁၇ - ၂၀၁၈ ခုနှစ်တွေတုန်းက ဝိုင်းမော်တဝိုက် ကျေးရွာတွေဖြစ်တဲ့ လိုင်ဇာလမ်းမကြီးဘေးက ခါးရှီ၊ အင်းလေး၊ အောင်မြေ ၁၊ အောင်မြေ ၂၊ ရွှေညောင်ပင်ကျေးရွာနဲ့ ခတ်ချို-တာလောကြီး လမ်းဘေးရွာတွေဖြစ်တဲ့ ခတ်ချို၊ စန်းကား တလျှောက် တာစန်းရွာ အလွန်ဘက်တွေထိ ဧကထောင်ချီတဲ့ တစ်သျူးငှက်ပျောစိုက်ခင်းတွေနဲ့အပြိုင် ဖရဲခင်းပြောင်းခင်းတွေကို အပြိုင် ငှားရမ်းစိုက်ပျိုးခဲ့ကြဖူးပါတယ်။
