တနင်္သာရီတိုင်း ထားဝယ်ခရိုင်၊ သရက်ချောင်းမြို့နယ်၊ ကနက်သီရိရွာကို ဇွန် ၈ ရက်ကစပြီး ဒီကနေ့ (၁၀ရက်) အထိ စစ်ကောင်စီတပ်က စစ်ကြောင်းထိုးပြီး နေအိမ် ၃ လုံး မီးရှို့ခဲ့တယ်လို့ တိမ်းရှောင် နေရတဲ့ဒေသခံတွေက ပြောပါတယ်။
ဇွန် ၈ ရက်မှာ သရက်ချောင်းမြို့နယ်၊ ကျွဲမင်းကုန်းရွာဘက်ကနေ ရွာစဉ်တလျှောက် လယ်ကွင်းလမ်းအတိုင်း ရွာသားတချို့ကို လမ်းပြလူသားဒိုင်းအဖြစ် ဖမ်းခေါ်လာပြီး ကနက်သီရိရွာကို စစ်ကောင်စီစစ်ကြောင်းဝင်လာခဲ့တာ ဖြစ်ပါတယ်။
အဲဒီစစ်ကြောင်းနဲ့ ပြည်သူ့ကာကွယ်ရေးတပ်တွေ ဇွန် ၈ ရက်မှာပဲ တိုက်ပွဲဖြစ်ခဲ့ပြီး စစ်ကောင်စီဘက် ထိခိုက်သေဆုံးမှု ရှိခဲ့တယ်လို့ ပြည်သူ့ကာကွယ်ရေးတပ်ဖွဲ့နဲ့ နီးစပ်သူတွေဆီက သိရပါတယ်။
ဇွန် ၉ ရက်မှာတော့ စစ်ကောင်စီ သင်္ဘောတစီး ကနက်သီရိရွာဆိပ်ကမ်းမှာ လာရောက် ဆိုက်ကပ်ထားပြီး ဘုန်းကြီးကျောင်းမှာတပ်စွဲထားတဲ့ စစ်ကောင်စီတပ်က ကျွဲမင်းကုန်းရွာကနေ ကနက်သီရိရွာတလျှောက် ရွာသား ၃၀ ကျော်ကို ဖမ်းဆီးထားခဲ့ပါတယ်။
အဲဒီ ဘုန်းကြီးကျောင်းမှာပဲ စစ်ဗိုလ်လို့ယူဆရတဲ့ အလောင်းတလောင်းအပါအဝင် တာလပတ်နဲ့ အုပ်ထားတဲ့ တခြားစစ်သားအလောင်း ၃ လောင်းရှိနေတယ်လို့ ရွာသားတွေက ပြောပါတယ်။
ကနက်သီရိရွာ သေလုကုန်းရပ်ကွက် အောင်မြင်ရေးလမ်းရှိ CDM ပညာရေးဝန်ထမ်းတဦးရဲ့ နေအိမ်နဲ့ ဘဲစားပြင်ရပ်ကွက်ရှိ နေအိမ်၂ လုံး၊ စုစုပေါင်း ၃ လုံးကို ဇွန် ၉ ရက်မှာ မီးရှို့ ဖျက်ဆီးခဲ့ပါတယ်။
တိမ်းရှောင်နေရတဲ့ရွာသားတဦးက "ရွာထဲမှာတော့ သက်ကြီးပိုင်းတွေက လွဲရင် အကုန်နီးပါး ထွက်ပြေးကုန်ပြီ။ အခုမနက် (ဇွန် ၁၀ ရက် မနက် ၉း ၃၇ မိနစ်) လည်း လက်နက်ကြီး အသံတွေကြားနေရတယ်။ ရွာအနီးနား ပတ်ဝန်းကျင်လည်း ပစ်ခတ်သံတွေ ကြားနေရတယ်။ လေကြောင်းက လာပစ်မှာပဲ ပိုစိတ်ပူနေတယ်" လို့ ပြောပါတယ်။
မြိတ်-ထားဝယ်ကားလမ်းပိုင်းရှိ သရက်ချောင်းမြို့နယ်က ကျေးရွာ အချို့မှာ ဇွန်လဆန်းက စစ်ကောင်စီတပ်နဲ့ပြည်သူ့ကာကွယ်ရေးတပ်တွေ တိုက်ပွဲဖြစ်ပွားခဲ့ပြီးနောက် စစ်ကောင်စီက သရက်ချောင်းမြို့နယ်ထဲက ကျေးရွာတွေကို စစ်ကြောင်းထိုးလာတာလို့ ဆိုပါတယ်။
အခု ဇွန်လဆန်းမှာပဲ သရက်ချောင်းမြို့နယ်မှာ စစ်ကောင်စီက မီးရှို့ဖျက်ဆီးထားတဲ့ နေအိမ် ၅ လုံး အထိ ရှိနေပြီ ဖြစ်ပါတယ်။
စစ်ရေးတင်းမာနေတာကြောင့် မြိတ် - ထားဝယ် ကားလမ်းကို မနက် ၆ နာရီကနေ ည ၉နာရီ အတွင်းသာ သွားလာပေးကြဖို့ သရက်ချောင်း ပကဖ က သတိပေးထားပါတယ်။