ကိုဗစ်-၁၉ ကူးစက်ရောဂါကြောင့် ၃ နှစ်ကျော် ပိတ်ထားခဲ့တဲ့ မြန်မာနိုင်ငံ၊ ရှမ်းပြည်အရှေ့ပိုင်း တာချီလိတ်မြို့နဲ့ ထိုင်းနိုင်ငံမြောက်ပိုင်းချင်းရိုင်းခရိုင် မယ်ဆိုင်မြို့ကြားရှိ အမှတ် - ၁ ချစ်ကြည်ရေးတံတားကို ဖေဖော်ဝါရီ ၂၀ ) ရက် ဒီနေ့မနက်က ပြန်လည်ဖွင့်လှစ်လိုက်ပါတယ်။

မြန်မာဘက်ခြမ်းမှာ တာချီလိတ်ခရိုင်အုပ်ချုပ်ရေးမှူး ဦးမြင့်နိုင်ဦးဆောင်ပြီး သက်ဆိုင်ရာ လဝက၊ အကောက်ခွန်၊ အုပ်ချုပ်ရေးမှူးနဲ့ တိုင်းရင်းသားရိုးရာယဉ်ကျေးမှုအဖွဲ့တွေ ပါဝင်တဲ့အဖွဲ့ဟာ ဒီမနက် ၆ နာရီခွဲလောက်က တံတားပေါ်မှာ သံဃာတော် ၅ ပါး ပင့်ဖိတ်ပြီး အန္တရာယ်ကင်း ပရိတ်ရွတ်ဖတ်ခြင်းအခမ်းအနားပြုလုပ်ပြီး ထိုင်းနိုင်ငံအဝင်ဂိတ်မှာ ထိုင်းဘက်ခြမ်းအာဏာပိုင်တွေနဲ့ လာရောက်ဆုံဆည်းကြပါတယ်။

အလားတူ ထိုင်းဘက်ခြမ်းကလည်း ချင်းရိုင်းခရိုင်ဝန် နိုင်းဆုမ်ဝမ် ဘွန်းလယောင်း ဦးဆောင်တဲ့ လဝက၊ ကျန်းမာရေးဌာန ၊ အကောက်ခွန်စတဲ့  နယ်စပ်ဂိတ်တာဝန်ရှိသူတွေနဲ့အတူ ရောက်လာကာ  မိုးပျံပူးပေါင်းတွေ လွှတ်ပြီး အခမ်းအနားနဲ့ ဖွင့်လှစ်ခဲ့ပါတယ်။

ထိုင်းဘက်ခြမ်းက သံတံခါးကြီးဖွင့်လိုက်တဲ့အခါ အနီးနားနေပြည်သူတွေက ဝမ်းသာအား ရလက်ခုပ်လက်ဝါးတီးပြီး ကြိုဆိုလိုက်ပါတယ်။

တံတားဖွင့်ပွဲပြီးပြီးချင်း တာချီလိတ်မှ ထိုင်းဘက်သို့ သွားရောက်လည်ပတ်မယ့်သူတွေကို ယာယီ နယ်စပ်ဖြတ်ကူးလက်မှတ် လုပ်ဆောင်ပေးနေပါတယ်။

နယ်စပ်ဖြတ်မယ့်သူတွေအနေနဲ့ အမျိုးသားမှတ်ပုံတင်ကတ် ( မူရင်း ) ၊ ကိုဗစ် - ၁၉ ကာကွယ်ဆေး ၂ ကြိမ်ထိုးနှံပြီးကြောင်း အထောက်အထားနဲ့ မိတ္တူ လိုအပ်တယ်လို့ တံတားအနီးရှိနေသူတွေက ပြောပါတယ်။

ကိုဗစ်-၁၉ ကာကွယ်ဆေးထိုးပြီးအထောက်အထားမရှိသူတွေအနေနဲ့ တာချီလိတ်ခရိုင်ဆေးရုံကြီးမှာ ၄၈ နာရီအတွင်း RT-PCR စနစ်နဲ့ ကိုဗစ်-၁၉ ရောဂါ စစ်ဆေးရမှာ ဖြစ်ပါတယ်။  

ချစ်ကြည်ရေးတံတားကို မနက် ၆ နာရီကနေ ညနေ ၆ နာရီထိဖွင့်လှစ်မယ်လို့ ဆိုပါတယ်။ လွန်ခဲ့တဲ့ ၃ နှစ် တံတားမပိတ်ခင်ကတော့ တံတားကို မနက် ၆ နာရီခွဲကနေ  ည ၉ နာရီထိ ဖွင့်လှစ်ခဲ့ပါတယ်။ 

တံတားပေါ်ကနေ  သုံးဘီးကား၊ ဆိုင်ကယ်၊ အိမ်စီးကားနဲ့ ကုန်ပစ္စည်းအနည်းငယ်တင်တဲ့ကားတွေ ဖြတ်သန်းခွင့်ပြုပြီး ကုန်တင်ကားကြီးတွေကတော့ အမှတ် ၂ ချစ်ကြည်ရေးတံတားကနေပဲ ဖြတ်ရမယ်လို့ တာချီလိတ်ခရိုင်၊ ပို့ဆောင်ရေး စီမံကိန်း ဦးစီးဌာန (ပို့ဆက်) ခရိုင်ဦးစီးမှူးဦးတင်စိုးက တာချီလိတ်မဏ္ဍိုင်ကို ပြောပါတယ်။

ထိုင်းဘက်ခြမ်းက ပြည်သူတွေအနေနဲ့လည်း မြန်မာနိုင်ငံထဲကို ဝင်လာမယ်ဆိုရင် မယ်ဆိုင် မြို့နယ်အုပ်ချုပ်ရေးရုံးမှာ နယ်စပ်ဖြတ်လက်မှတ်ယူပြီး ကိုဗစ်-၁၉ ကာကွယ်ဆေးထိုးပြီးတဲ့ အထောက်အထားပြရမယ်လို့ ဆိုပါတယ်။ 

ထိုင်း-မြန်မာ ၂ နိုင်ငံမှာ ကိုဗစ်-၁၉ ရောဂါကူးစက်လာတဲ့နောက် အဆိုပါတံတားကို ၂၀၂၀ ခုနှစ် မတ်လကစပြီး ပိတ်ခဲ့ပေမဲ့ ကုန်ပစ္စည်းတွေကိုတော့ အမှတ် ၂ တံတားကနေ ပို့ဆောင်ခဲ့ကြ ပါတယ်။