ဧရာဝတီတိုင်း၊ မြောင်းမြမြို့နယ်မှာ စက်တင်ဘာ ၁၅ ရက်နေ့က ကိုဗစ်-၁၉ အတည်ပြုလူနာ ၈ ဦးတွေ့ရှိခဲ့တယ်လို့ ကျန်းမာရေးဌာနနဲ့နီးစပ်သူတွေက ပြောပါတယ်။ 

ရောဂါပိုးတွေ့ရှိခဲ့တဲ့ အတည်ပြုလူနာတွေဟာ စက်တင်ဘာ ၁၅ ရက်နေ့က စစ်ဆေးခဲ့တဲ့ သူတွေဖြစ်ပြီး မြောင်းမြရဲစခန်းက ရဲတပ်ဖွဲ့ဝင်တွေနဲ့ အချုပ်သားတွေအများဆုံးဖြစ်ကာ ၂ ဦးကတော့ ရပ်ကွက်ထဲကလို့ ကျန်းမာရေးဌာနနဲ့ နီးစပ်သူတဦးက ပြောပါတယ်။ 

လုံခြုံရေးအရအမည်မဖော်လိုတဲ့ ရဲတပ်ဖွဲ့ဝင်တဦးက “တိုင်းကိုတော့ သတင်းပို့ထားတယ်၊ မြို့နယ်ကျန်းမာရေးက သူတွေလာစစ်တာ၊ တပ်ဖွဲ့ဝင် ၂ ဦးနဲ့ အချုပ်သား ၄ ဦးပိုးတွေ့တာ၊ စစ်တာတော့ အကုန်လုံးစစ်ရတာ” လို့ ပြောပါတယ်။

စက်တင်ဘာ ၁၅ ရက်နေ့က ကိုဗစ်ရောဂါပိုးတွေ့ရှိခဲ့တဲ့သူတွေကို အတည်ပြုထုတ်ပြန်တာမျိုးတော့ မတွေ့ရသေးသလို ရောဂါပိုးတွေ့ရှိတဲ့သူတွေကို သီးသန့်ခွဲထားပြီး ကုသတာမျိုးတွေတော့ ပြုလုပ်ပေးနေတယ်လို့ ဆိုပါတယ်။ 

NLD အရပ်သားအစိုးရလက်ထက်က ရဲစခန်းတွေမှာ ပိုးတွေ့ရင် အသွားအလာကန့်သတ်တာမျိုးတွေ ပြုလုပ်ခဲ့ပေမယ့် အာဏာသိမ်းစစ်ကောင်စီလက်ထက်မှာ ရဲတပ်ဖွဲ့ဝင်အင်အား မလုံလောက်တာကြောင့် အစားထိုးဖို့ တပ်ဖွဲ့ဝင်လိုအပ်ချက်ရှိနေတယ်လို့ ရဲတပ်ဖွဲ့အသိုင်းဝိုင်းက သိရပါတယ်။