တနင်္သာရီတိုင်းဒေသကြီး၊ မြိတ်ခရိုင်၊ ပုလောမြို့နယ် ပဝတ်ကုန်းရွာမှာ ပြည်သူ့ကာကွယ်ရေး မဟာမိတ်တပ်ဖွဲ့များပူးပေါင်းပြီး စစ်ကောင်စီကို ဒရုန်းနဲ့ ဗုံးချတိုက်ခိုက်ခဲ့တယ်လို့ ကရင်ပြည်သူ့ကာကွယ်ရေးတပ်ဖွဲ့ (ပုလော) KPDF က ဇူလိုင် ၂၁ ရက်ညက ထုတ်ပြန်လိုက်ပါတယ်။
ပဝတ်ကုန်း လမ်းဆုံ ၂ ခုမှာ စစ်ဆေးနေတဲ့ စစ်ကောင်စီတပ်ဖွဲ့ဝင်တွေကို ကရင်ပြည်သူ့ကာကွယ်ရေးတပ်ဖွဲ့ (ပုလော) KPDF နဲ့ ပုလောပြည်သူ့ကာကွယ်ရေးတပ်ဖွဲ့ (PPDF) တို့ ပူးပေါင်းပြီး ဇူလိုင် ၂၀ ရက် ညနေ ၃ နာရီလောက်က ဒရုန်းနဲ့ တိုက်ခိုက်ခဲ့တယ်လို့ ထုတ်ပြန်ထားပါတယ်။
PPDF မှ တာဝန်ရှိသူတဦးက “ပဝတ်ကုန်းက ပဝတ်ဖျားကိုသွားတဲ့ လမ်းပေါ်က လမ်းဆုံ ၂ နေရာမှာ လမ်းသွားလမ်းလာတွေကို စစ်နေတဲ့ စစ်ကောင်စီတပ်သားတွေ” လို့ ရှင်းပြပါတယ်။
အဆိုပါ ဒရုန်းနဲ့ ဗုံးချတိုက်ခိုက်ခဲ့တာကြောင့် စစ်ကောင်စီတပ်ဖွဲ့ဝင် ၅ ဦးလောက် ထိခိုက်နိုင်ပြီး ထိခိုက်ဒဏ်ရာရသူတွေကို အရေးပေါ်ကား ၃ စီးနဲ့ သယ်ဆောင်သွားတယ်လို့ ထုတ်ပြန်ချက်မှာ ဖော်ပြထားပါတယ်။
“ထိခိုက်သေဆုံးသူ ၅ ဦးဆိုတာက ဗွီဒီယိုထဲမှာ ဗုံးချလိုက်လို့ လဲကျသွားတာ ၅ ယောက်တွေ့လို့၊ ထိခိုက်သေဆုံးသူစာရင်းကိုတော့ အတည်မပြုနိုင်သေးဘူးပေါ့” လို့ PPDF တာဝန်ရှိသူက ပြောပါတယ်။
ဇူလိုင် ၁၉ ရက်နေ့ကလည်း ပုလောမြို့နယ် မင်းထိန်ရွာမှ ပဝတ်ကုန်းရွာကို စစ်ကြောင်းထိုးလာတဲ့ စစ်ကောင်စီတပ်ကို ပြည်သူ့ကာကွယ်ရေးတပ်ပေါင်းစုမှ “နန်းထိုက်အောင်စစ်ဆင်ရေး” အဖြစ် မိုင်း ၂ လုံးနဲ့ မိုင်းဆွဲတိုက်ခိုက်ခဲ့ရာမှာ စစ်ကောင်စီတပ်ဖွဲ့ဝင် ၅ ဦးသေဆုံးခဲ့ပြီး ၅ ဦးထက်မနည်း ထိခိုက်ဒဏ်ရာရခဲ့တယ်လို့ ပုလောပြည်သူ့ကာကွယ်ရေးတပ်ဖွဲ့ Palaw People’s Defence force က ထုတ်ပြန်ထားပါတယ်။