စစ်ကိုင်းတိုင်း၊ ကလေးခရိုင်၊ တမူးမြို့နယ်မှာ ဇွန် ၇ ရက် မနက် ၃ နာရီကနေ ညနေ ၆ နာရီအထိ PDF မဟာမိတ်ပူးပေါင်းအဖွဲ့နဲ့ စစ်ကောင်စီတပ်တို့ တနေကုန်နီးပါး တိုက်ပွဲဖြစ်ပွားခဲ့တယ်လို့ PDF အဖွဲ့က ပြောပါတယ်။
ဒေသကာကွယ်ရေးတပ်ဖွဲ့တွေ စိုးမိုးထားတဲ့ တမူးဒေသနယ်မြေကို စစ်တပ်က စစ်ကြောင်းထိုးလာတာကြောင့် TSG၊ BSO၊ FRT၊ ABSDF နဲ့ PDF မဟာမိတ် ပူးပေါင်းတပ်ဖွဲ့တွေက ခုခံတိုက်ခိုက်နေတာဖြစ်တယ်လို့ ဆိုပါတယ်။
တမူး PDF တပ်ဖွဲ့ တာဝန်ရှိသူက “မနက် ၃ နာရီလောက်ကစပြီး ညနေ ၆ နာရီလောက်ထိ ဖြစ်တာပါ။ ကျနော်တို့ PDF မဟာမိတ် ပူးပေါင်းတပ်တွေ စိုးမိုးထားတဲ့နယ်မြေကို အကြမ်းဖက်စစ်တပ်က စစ်ကြောင်းထိုးပြီး ထိုးစစ်ဆင်တာကို ကျနော်တို့ မဟာမိတ်တပ်များရဲ့ စည်းလုံးမှုနဲ့ အခုချိန်ထိ ထိန်းထားနိုင်တာ” လို့ ပြောပါတယ်။
စစ်ကောင်စီတပ်ကို ပြန်လည်တိုက်ခိုက်ရာမှာ ကျည်ဆန်လိုအပ်နေတာကြောင့် ဝိုင်းဝန်းကူညီပေးကြဖို့ တမူးဒေသ ကာကွယ်ရေးတပ်ဖွဲ့ PDF တပ်ရင်း-၂ တာဝန်ခံက ဆိုပါတယ်။
အလားတူ တမူးမြို့နယ် နန်မွန်းတားကျေးရွာ၊ ခွန်မွန်းနွန်ကျေးရွာနဲ့ ရန်လင်းဖိုင်ကျေးရွာကြားမှာ ဇွန် ၇ ရက် မနက်ပိုင်းက တမူးမြို့ကို ဦးတည်ချီတက်လာတဲ့ စစ်ကောင်စီတပ်ကို တမူး PDF ပူးပေါင်းတပ်ဖွဲ့တွေက ကြားဖြတ်တိုက်ခိုက်ခဲ့ကြတယ်လို့ တမူး PDF အဖွဲ့က ပြောပါတယ်။
စစ်ကောင်စီယာဉ်တန်း ၁၀ စီး အင်အားအများအပြားနဲ့ ကလေးမြို့ကနေ တမူးမြို့ကို ဖြတ်သန်းလာစဉ် ပြည်သူ့ကာကွယ်ရေးတပ်မတော် တပ်ရင်း ၃ နဲ့ ပူးပေါင်းတပ်ဖွဲ့က တိုက်ခိုက်ခဲ့ကြတာလို့ ဆိုပါတယ်။
တနေကုန်နီးပါး တိုက်ပွဲပြင်းထန်ခဲ့ပြီး တိုက်ပွဲအတွင်း စစ်ကောင်စီဘက်က ကျဆုံးမှုနဲ့ ထိခိုက်ဒဏ်ရာရရှိသူတွေ ရှိနိုင်ပေမဲ့ အတည်ပြုလို့ မရသေးကြောင်း၊ PDF ပူးပေါင်းတပ်ဖွဲ့ဘက်ကတော့ ရဲဘော် ၂ ယောက် မစိုးရိမ်တဲ့ဒဏ်ရာရပြီး ကျဆုံးတာတော့ မရှိဘူးလို့ တမူး PDF ကပြောပါတယ်။
စစ်ကိုင်းတိုင်းထဲက မြို့နယ်တွေကို စစ်ကောင်စီက အင်တာနက်လိုင်းတွေ ဖြတ်တောက်ထားပြီး သာလွန်အင်အားအသာစီးနဲ့ ဒေသတွင်းကာကွယ်ရေး တပ်ဖွဲ့တွေကို စစ်ကြောင်းထိုး ချေမှုန်းနေတဲ့အတွက် တမူး-အောင်ဇေယျ ကားလမ်းပိုင်းကို အသုံးပြု သွားလာနေကြတဲ့ ခရီးသွားပြည်သူတွေအနေနဲ့ အထူးသတိပြု သွားလာကြဖို့လည်း တမူး PDF က အသိပေး ထုတ်ပြန်ထားပါတယ်။