မကွေးတိုင်း၊ မြိုင်မြို့နယ်မှာ မေလ ၁၅ ရက် ညပိုင်းက စစ်ကောင်စီတပ်သားတွေတပ်စွဲထားတဲ့ စီမံကိန်းရုံးနားကို မြိုင်PDF က လက်နက်ကြီးတွေနဲ့ ပစ်ခတ်တိုက်ခိုက်ခဲ့လို့ စစ်ကောင်စီဘက်က သေဆုံး ဒဏ်ရာရသူရှိခဲ့တယ်လို့ မြိုင်PDF တပ်ဖွဲ့က ပြောပါတယ်။
မနေ့ ည ၇နာရီကျော်လောက်မှာ မြိုင်PDF ရဲ့ လက်ခွဲ နံ့သာမြိုင်ပြောက်ကျားတပ်ဖွဲ့နဲ့ တမာမြေ ပြောက်ကျားတပ်ဖွဲ့တို့ပူးပေါင်းပြီး စီမံကိန်းရုံးနားက စစ်ကောင်စီတပ်တွေကို လက်နက်ကြီးတွေနဲ့ ပစ်ခတ်တိုက်ခိုက်ခဲ့တာလို့ မြိုင်PDF တပ်ရင်း(၁)ရဲ့ ဒုတပ်ရင်းမှူး ဗိုလ်ဘာဂျာက ပြောပါတယ်။
“အဲဒီနေရာက စီမံကိန်းရုံးဘေးနဲ့ မြိုင်ကနေ ပခုက္ကူအထွက် ပုသိမ်-မုံရွာ လမ်းဆုံမှာ ဘန်ကာတွေ၊ ကတုတ်ကျင်းတွေနဲ့ စစ်(...)တွေ အခိုင်အမာတပ်စွဲထားတဲ့ နေရာဗျ။ အဲဒီနေရာမှာ ပြည်သူလူထုကို မတရားဖမ်းဆီးတာတွေ၊ စျေးကားတွေလာရင် အောက်ဆင်းခိုင်းပြီး ပစ္စည်းတွေကို လုယူတာတွေပြုလုပ်ပြီး ပြည်သူကို ဒုက္ခပေးနေကြတာ။ အဲဒါကြောင့် နံ့သာမြိုင်အဖွဲ့နဲ့ တမာမြေအဖွဲ့က ရဲဘော်တွေက ည ၇နာရီ ၁၅ လောက်မှာ တာဝေးပစ်လက်နက်တွေဖြစ်တဲ့ ၆၀ မမ ၂လုံး ၊၁၂၀ မမ ၉ လုံးနဲ့ လှမ်းပစ်တာ သူတို့ဘက်က ၃ ယောက်လောက်သေဆုံးနိုင်ပြီး အများအပြားဒဏ်ရာ ရရှိခဲ့တယ်။”
အဆိုပါပစ်ခတ်မှုမှာ စစ်ကောင်စီတပ်သားတွေ ထိခိုက်သေဆုံးဒဏ်ရာတာနဲ့ ပတ်သက်ပြီး စစ်ကောင်စီဘက်ကလည်း သတင်းထုတ်ပြန်တာမတွေ့ရသေးသလို ဒီဗွီဘီအနေနဲ့ သီးခြား အတည်ပြုနိုင်ခြင်းတော့ မရှိသေးပါဘူး။
မေ ၁၅ ရက် ညနေ ၄ နာရီလောက်ကလည်း မြိုင်မြို့နယ်ထဲက လက်ယက်မစံပြကျေးရွာကို မီးရှို့ဖျက်ဆီးပြီး ပြန်ဆုတ်လာတဲ့ အကြမ်းဖက်စစ်ကောင်စီတပ်ကို ဒေသခံ ပြည်သူ့ကာကွယ်ရေး PDF မဟာမိတ်တပ် ၁၂ ဖွဲ့က ပူးပေါင်းတိုက်ခိုက်ခဲ့ကြပြီး ကောင်စီတပ်သား ၇ ယောက်လောက် သေဆုံးခဲ့တယ်လို့ သိရပါတယ်။
ရွာမီးရှို့ခဲ့တဲ့ စစ်ကောင်စီတပ်တွေကို ကြည့်ကန်ကျေးရွာမြောက်ဘက် တောတိုက်အရောက်မှာ (မြိုင်)|နဂါးနီတပ်ဖွဲ့၊ မြိုင်မြို့နယ်ပြည်သူ့ကာကွယ်ရေးတပ်မတော်၊ Myaing Village Revolution Front (MVRF)၊ ဂဠုန်ပြောက်ကျားတပ်ဖွဲ့ (မြိုင်)၊ ပခုက္ကူမြို့ပြပြောက်ကျားတပ်ဖွဲ့ (PUGF)၊ ကိုခိုင်လေးလက်နက်ကြီးတပ်ဖွဲ့၊ တမာမြေပြောက်ကျားတပ်ဖွဲ့၊ PKU North PDF၊ YSO North PDF၊ YSO Southern PDF နဲ့ Earthquake People's Defense Force မဟာမိတ်တပ်ပေါင်းစုတွေက လက်နက်ကြီး/လက်နက်ငယ်တွေနဲ့ ဆက်တိုက် ပစ်ခတ်ခဲ့ပြီး တိုက်ပွဲဖြစ်ပွားခဲ့တာပါ။
အဆိုပါ တိုက်ပွဲအတွင်း စစ်ကောင်စီတပ်ဘက်က သေနတ်တွေနဲ့ ရမ်းသန်းပစ်ခတ်ခဲ့တာကြောင့် ပြည်သူ ၁ ယောက် ကျည်ဆန်ထိမှန်ခဲ့ပေမယ့် မစိုးရိမ်ရဘူးလို့ ဆိုပါတယ်။
မြိုင်မြို့နယ်ထဲမှာ စစ်ကောင်စီတပ်သားတွေလက်နက်ကြီးလက်နက်ငယ်တွေနဲ့ ပစ်ခတ်ကာ စစ်ကြောင်းထိုးပြီး ကျေးရွာတွေကို မီးရှို့ဖျက်ဆီးနေတာကြောင်း ဒေသခံပြည်သူ ၂၀,၀၀၀ ကျော်လောက်ဘေးလွတ်ရာနေရာတွေကို ထွက်ပြေးတိမ်းရှောင်နေကြရပါတယ်။
မကွေးတိုင်းဒေသကြီးမှာ စစ်တပ်အာဏာသိမ်းတဲ့ ဖေဖော်ဝါရီ ၁ ရက်ကနေ ဧပြီ ၃၀ ရက်အထိ စစ်ကောင်စီတပ်တွေ အကြမ်းဖက် မီးရှို့ဖျက်ဆီးလို့ အိမ်ခြေ ၂၁၃၁ လုံးမီးလောင် ဆုံးရှုံးခဲ့တယ်လို့ Data For Myanmar က မေလ ၁ ရက်နေ့ရက်စွဲနဲ့ ထုတ်ပြန်ထားပါတယ်။