၂၀၂၁ နိုဝင်ဘာလဆန်းပိုင်းမှာ စစ်တပ်ဖမ်းလိုက်တဲ့ ထားဝယ်ခရိုင် မေတ္တာမြို့နယ် ဟိန္ဒားရွာက တက္ကသိုလ်ကျောင်းသူ ၂ ဦးဖြစ်တဲ့ မအိခြူးခြူးမွန် နဲ့ မလင်းလက်ကြည်တို့ကို ဖေဖော်ဝါရီ ၁၆ ရက်မှာ ထားဝယ်ထောင်တွင်းတရားရုံးကနေ အလုပ်နဲ့ထောင်ဒဏ် ၇ နှစ်ချလိုက်တယ်လို့ သိရပါတယ်။
သူတို့ကို အကြမ်းဖက် ပုဒ်မ ၅၂ (ခ) နဲ့ အခုလို ထောင်နှစ်ရှည်ချမှတ်လိုက်တာလို့ ထားဝယ်နိုင်ငံရေး အကျဥ်းသားများကွန်ရက် DPPN က ဖော်ပြပါတယ်။
မအိခြူးခြူးမွန်ရဲ့ သူငယ်ချင်းတဦးက “သူတို့က စစ်ဘေးရှောင်တွေကို KBZ pay နဲ့ ၅၀၀၀ စီ ကူညီဖူးတာကို အလှူခံတဲ့လူက အွန်လိုင်းမှာ အမည်နဲ့ဖော်ပြပြီးတဲ့နောက် နေအိမ်တွေမှာ အမည်စာရင်းနဲ့တကွ အဖမ်းခံလိုက်ရတာဖြစ်တယ်” လို့ ပြောပါတယ်။
မအိခြူးခြူးမွန်ဟာ ထားဝယ်တက္ကသိုလ် အင်္ဂလိပ်စာ အထူးပြု ပထမနှစ်ကျောင်းသူတယောက်ဖြစ်ပြီး မလင်းလက်ကြည်ကတော့ နယ်စပ်ဒေသတိုင်းရင်းသားများ ဖွံ့ဖြိုးရေးဒီဂရီကောလိပ် (စစ်ကိုင်း) က ကျောင်းသူတယောက်ဖြစ်တယ်လို့ သိရပါတယ်။
၂၀၂၁ သြဂုတ်လကလည်း ကလိန်အောင်မြို့က အောက်ဆီဂျင် လှူဒါန်းတဲ့ အသက် ၂၀ ဝန်းကျင်အမျိုးသမီးတဦးကို PDF အား ထောက်ပံ့တယ်ဆိုပြီး စစ်တပ်က ဒီနေ့အထိ ဖမ်းဆီးထိန်းသိမ်းထားပါတယ်။
ပုံစာ - မအိခြူးခြူးမွန် ၊ မလင်းလက်ကြည်၊ ဟိန္ဒားရွာ
