မန္တလေးတိုင်း မိတ္ထီလာမြို့ ရန်ကုန်-မန္တလေးအမြန်လမ်းမကြီးဘေးက ကံကောင်းရွာနားက ရွှေအုန်းပင်ထမင်းဆိုင်ကို အမည်မသိ အရပ်ဝတ်လူတစ်စုက စက်တင်ဘာ ၂ ရက်နေ့ နေ့လယ်ပိုင်းက ဘက်ဟိုးကားတစီးနဲ့ ထိုးပြီး ဖျက်ဆီးသွားတယ်လို့ ဒေသခံတစ်ဦးက ပြောပါတယ်။
"ဖျက်ဆီးခံရတဲ့ ရွှေအုန်းပင်ထမင်းဆိုင်က ၅ ဧက ကျယ်တဲ့ ခြံဝင်းထဲမှာ ဆောက်ထားတာ ဇွန်လ၆ရက်နေ့က လက်လုပ်မိုင်းတွေ ပေါက်ကွဲမှုဖြစ်ပြီးနောက် အဖျက်ခံရတဲ့ဆိုင် အပါ ထမင်းဆိုင် ၃ ဆိုင်၊ ဟိုတယ်တို့ အပိတ်ခံထားရတယ်။ အဖျက်ခံရတဲ့ဆိုင်က အလုပ်သမားတွေ လည်း အဖမ်းခံရတယ် ဇွန်လကုန်မှာတော့ ပြန်လွှတ်ပေးတယ်။ ဆိုင်ပိုင်ရှင် လင်မယားကတော့ တိမ်းရှောင်သွားတယ် လက်လုပ်မိုင်းတွေ ပေါက်ကွဲလို့ နည်းပညာတက္ကသိုလ်ကျောင်းသား ကိုရန်နိုင်စိုး သေဆုံးခဲ့တယ်။ ထမင်းဆိုင်ကို ဘယ်သူတွေက ဘာကြောင့် ဖျက်ဆီးတယ် မသိရသေးဖူး နေ့ခင်းကြီးမှာ ပြောင်ပြောင်တင်းတင်း လုပ်နေတာပဲ"လို့ ပြောပါတယ်။
ပြီးခဲ့တဲ့ ဇွန် ၆ ရက်နေ့ မနက်ကလည်း အမြန်လမ်းဘေးရှိ ရွှေအုန်းပင်ထမင်းဆိုင် ခြံဝင်းထဲမှာ ပေါက်ကွဲမှုတွေဖြစ်ပြီး ရဲနဲ့ စစ်တပ်က ဝင်ရောက်စီနင်း ရှာဖွေခဲ့ရာ လက်လုပ်မိုင်းတွေနဲ့ လက်လုပ်မိုင်းပြုလုပ်ရာမှာ အသုံးပြုတဲ့ ဆက်စပ်ပစ္စည်းတွေ သိမ်းဆည်းရမိခဲ့ပြီး ရွှေအုန်းပင်ထမင်းဆိုင်ကို ပိတ်ထားခဲ့တာလို့ သိရပါတယ်။