ပဲခူးတိုင်း၊ တောင်ငူခရိုင်၊ ကေအန်ယူတပ်မဟာ ၂ နယ်မြေ ထန်းထပင် (ထောထတူ) မြို့နယ်မှာ စစ်ကောင်စီတပ်နဲ့ ကေအန်ဒီအိုတပ်ရင်း ၄ တို့ သြဂုတ် ၂၄ မနက်ပိုင်းက တိုက်ပွဲဖြစ်ပွားခဲ့တယ်လို့ ကေအန်ယူက သတင်းထုတ်ပြန်ပါတယ်။
အင်းအားဖြည်းတင်းလာတဲ့ စစ်ကောင်စီတပ်နဲ့ ကေအန်ဒီအို တပ်ရင်း ၄ တို့ တိုက်ပွဲဖြစ်ပွားခဲ့တာလို့ တပ်ရင်း ၄ ရုံးထိုင်မှူးက အတည်ပြုပြောကြားပါတယ်။
ကေအန်ဒီအို တပ်ရင်း ၄ ရုံးထိုင်မှူး ဗိုလ်ကြီးစောတာဘိုမူးက "ဒီမနက် ၆ နာရီမှာဖြစ်တာပါ။ ရေသိုးကြီးရွာအကျော် စစ်ကောင်စီတပ်ရဲ့ ကိုးဒေးစခန်းမရောက်ခင်ဖြစ်တာ။ ၁၈ မိုင်း ၃ လုံး နဲ့ကျနော်တို့ဆွဲပြီးပစ်တယ်၊ စကစက လူသစ်တွေလား ထောင်သားတွေလား မသိဘူး၊ အစုလိုက် အပြုံလိုက်ကိုသွားနေတာ။ ဆွဲမိုင်းဆွဲပြီးတာနဲ့ ရန်သူတွေ အော်သံ ညည်းသံတွေ ကြားနေရတယ်" လို့ ပြောပါတယ်။
တိုက်ပွဲဖြစ်ပွားရာမှာ နာရီဝက်ကျော်ကြာမြင့်ပြီး စစ်ကောင်စီရဲ့တပ်ဖွဲ့ဝင် သေဆုံးသူစာရင်း အတိအကျ အတည်မပြုနိုင်သေးပေမယ့် အနည်းဆုံး ၁၀ ဦးထက်မနည်း သေဆုံးနိုင်တဲ့အပြင် စစ်ကောင်စီဘက်က အင်အားပိုတိုးလှုပ်ရှားလာတဲ့အတွက် တိုက်ပွဲပိုမိုပြင်းထန်လာဖို့ရှိတယ်လို့ တပ်ရင်း ၄ ရုံးထိုင်မှူးက ဆိုပါတယ်။
ကေအန်ဒီအို တပ်ရင်း ၄ ဟာ ဒေါဖခိုမြို့နယ်နဲ့ ထန်းတပင်မြို့နယ် အရှေ့ခြမ်းမှာ အခြေပြုလှုပ်ရှားနေတာဖြစ်ပြီး သြဂုတ်လမှစတင်ပြီး စစ်ကောင်စီရဲ့တပ်တွေက အင်အားဖြည့်တင်းပြီး နယ်မြေတိုးချဲ့လာတဲ့အတွက် ကေအန်ဒီအို တပ်ရင်း ၄ နဲ့ မကြာခဏရင်ဆိုင် တိုက်ပွဲတွေဖြစ်ပွားလာတာလို့ ကေအန်ယူက သတင်းထုတ်ပြန်ပါတယ်။