ကိုဗစ်-၁၉ တတိယလှိုင်းကာလမှာ သေဆုံးသူတွေရဲ့ ၇၃ ရာခိုင်နှုန်းက လိုအပ်တဲ့ ဆေးရုံတွေ မှာ တက်ရောက်ကုသခွင့်မရဘဲ နေအိမ်တွေမှာ သေဆုံးခဲ့ကြတယ်လို့ အမျိုးသားညီညွတ်ရေးအစိုးရ (NUG)၊ ကျန်းမာရေးဝန်ကြီးဌာနက ကောက်ယူတဲ့ ကိုဗစ်-၁၉ ရောဂါ ဖြစ်ပွားမှုဆိုင်ရာစစ်တမ်းက ဖော်ပြပါတယ်။
ဒီစစ်တမ်းကိုတော့ အမျိုးသားညီညွတ်ရေးအစိုးရ (NUG)၊ ကျန်းမာရေးဝန်ကြီးဌာနက ပြီးခဲ့ တဲ့ ဩဂုတ် ၉ ရက်နေ့မှာ စတင်ကာ ပြည်သူတွေကို ပူးပေါင်းပါဝင် ဖြေဆိုပေးကြဖို့ ဖိတ်ခေါ်ထား ခဲ့တာ ဖြစ်ပါတယ်။
အခုထုတ်ပြန်လိုက်တဲ့ ထုတ်ပြန်ချက်ကတော့ ပထမ ၅ ရက်အတွင်း ဝင်ရောက် ဖြေဆိုကြသူ ဦးရေ ၂၅,၄၇၅ ယောက်ရဲ့ အချက်အလက်တွေပေါ် အခြေခံထားတာလို့ ဆိုပါတယ်။
ဖြစ်ပွားသူတွေရဲ့ ၅၆ ရာခိုင်နှုန်းကတော့ အမျိုးသမီးတွေဖြစ်ကြပြီး ကိုဗစ်-၁၉ ဖြစ်ပွား သူတွေနေထိုင်တဲ့ တိုင်းဒေသကြီး၊ ပြည်နယ်အလိုက် ရန်ကုန်တိုင်းဒေသကြီးက ၁၅,၃၉၉ ယောက်နဲ့ ၆၀ ဒသမ ၄ ရာခိုင်နှုန်းထိ အမြင့်ဆုံးဖြစ်ကာ သူ့နောက်မှာတော့ မန္တလေးတိုင်းဒေသကြီးက ၁၂ ဒသမ ၅ ရာခိုင်နှုန်း၊ စစ်ကိုင်းတိုင်းဒေသကြီးက ၅ ရာခိုင် နှုန်း၊ ပဲခူးတိုင်းဒေသကြီးက ၄ ဒသမ ၇ ရာခိုင်နှုန်း၊ ဧရာဝတီတိုင်းဒေသကြီးက ၄ ဒသမ ၂ ရာခိုင်နှုန်း အသီးသီးဖြစ်တယ်လို့ ဆိုပါတယ်။
ဒီစစ်တမ်းအရ ကိုဗစ်-၁၉ တတိယလှိုင်းကာလအတွင်း ဆေးကုသမှုခံယူပုံမှာ ၃၄ ရာ ခိုင်နှုန်းကတော့ တယ်လီဖုန်း၊ တယ်လီဂရမ်၊ အရေးပေါ် Hotline၊ ဖေ့စ်ဘွတ်ခ်မက်ဆင်ဂျာစတဲ့ အွန်လိုင်းကတဆင့် ကုသမှုခံယူခဲ့ကြပြီး အရင်အစိုးရဆေးရုံတွေမှာ တက်ရောက်ကုသမှုခံယူသူ ၅ ရာခိုင်နှုန်းသာရှိတယ်လို့ ဆိုပါတယ်။
ဒါ့အပြင် ကိုဗစ်ဖြစ်ပွားသူတွေအနက် ၁၅ ရာခိုင်နှုန်းနဲ့ ပိုးတွေ့လူနာတွေအနက် ၇ ဒသမ ၂ ရာခိုင်နှုန်းဟာ သေဆုံးခဲ့ကြကြောင်း တွေ့ရှိရပြီး စစ်ကောင်စီကတော့ သေဆုံးနှုန်း ၃ ဒသမ ၇ ရာခိုင်နှုန်းရှိတယ်လို့ ထုတ်ပြန်ထားခဲ့တာပါ။
စစ်တမ်းမှာ တွေ့ရှိရတဲ့ အထောက်အထားတွေအရ ဆေးရုံမှာ စောင့်ရှောက်ကုသဖို့ လိုအပ်တဲ့ လူနာတွေ ဆေးရုံမတက်ရောက်နိုင်တာ၊ အွန်လိုင်းကသာ ကုသမှုခံယူနေကြရတာ၊ စစ်ကောင်စီက အမှန်တကယ် သေဆုံးနှုန်းကို မဖော်ပြနိုင်တာ စတဲ့အချက်တွေဟာ ထင်ရှားနေတာမို့ စစ်ကောင်စီဟာ ကိုဗစ်-၁၉ ကာကွယ်၊ ထိန်းချုပ်၊ ကုသမှုလုပ်ငန်းတွေမှာ မှားယွင်းညံ့ဖျင်းစွာ စီမံနေတယ်လို့ သုံးသပ်ထားပါတယ်။
စစ်ကောင်စီ ကျန်းမာရေးဝန်ကြီးဌာနကတော့ မြန်မာနိုင်ငံမှာ ကိုဗစ်-၁၉ ရောဂါ ကူးစက်ခံရပြီး သေဆုံးသူ စုစုပေါင်း ၃၆၀,၀၀၀ ကျော် ရှိလာခဲ့ပြီလို့ ဩဂုတ် ၂၀ ရက်ညမှာ ထုတ်ပြန်ထားပါတယ်။