ပြည်တွင်းအခွန်များဦးစီးဌာနရှိ CDM လှုပ်ရှားမှုမှာ ပါဝင်တဲ့ ဝန်ထမ်းတစ်ချို့ လုပ်ငန်းခွင်မဝင်တဲ့အတွက် ချေးငွေ ပြန်ဆပ်ဖို့ ဖိအားပေးခံနေရတယ်လို့ သိရပါတယ်။
နိုင်ငံ့ဝန်ထမ်း(အမြဲတမ်း) တွေကို ၂ လစာ အတိုးမဲ့နဲ့ ကြိုတင်ထုတ်ချေးထားတဲ့ ချေးငွေတွေကို ပြန်လည်ပေးဆပ်ဖို့ မလိုတဲ့ ချီးမြှင့်ငွေအဖြစ် သတ်မှတ်ကြောင်း CRPH က မတ် ၈ ရက်နေ့က ထုတ်ပြန်ကြေညာထားပါတယ်။
ပြည်တွင်းအခွန်က ဝန်ထမ်းတစ်ဦးက “ကျနော်တို့ အသိအမှတ်မပြုထားတဲ့ စစ်ကောင်စီက တောင်းတာကို ဘယ်လိုမှ ပြန်မဆပ်နိုင်ဘူး။ CRPH ကလည်း ဒီချေးငွေတွေကို ပြန်ဆပ်စရာ မလိုဘူး၊ ချီးမြှင့်ငွေ အဖြစ်ပေးတာလို့ ပြောထားတယ်။ တကယ်လို့ ကျနော်တို့ အစိုးရပြန်တက်လာရင် ချေးငွေ ပြန်ဆပ်ရမယ်ဆိုလည်း ပြန်ဆပ်မယ်။ စစ်ကောင်စီကိုတော့ မပေးနိုင်ဘူး” လို့ ပြောပါတယ်။
COVID-19 ကြောင့် ဖြစ်ပေါ်လာနိုင်တဲ့ သက်ရောက်မှုတွေအပေါ် ကုစားနိုင်ရေးအတွက် နိုင်ငံ့ဝန်ထမ်း (အမြဲတမ်း) တွေကို လစာ ၂ လစာ ကြိုတင်ထုတ်ပေးခဲ့ပြီး ၂၀၂၀ အောက်တိုဘာလကစပြီး ဆိုင်းငံ့ ၆ လ၊ ပြန်ဆပ်ကာလ ၁ နှစ် သတ်မှတ်ပြီး ထုတ်ချေးပေးခဲ့တာ ဖြစ်ပါတယ်။
CDM လုပ်ဆောင်နေတဲ့ ဝန်ထမ်းတွေဟာ လုပ်ငန်းက ထုတ်ပယ်ခံရပြီး အတိုးမဲ့ ထုတ်ချေးထားတဲ့ ၂ လစာကို မေလကုန် နောက်ဆုံးထားပြီး ပြန်ဆပ်ဖို့ ဖိအားပေးနေတယ်လို့ သိရပါတယ်။