ကရင်ပြည်နယ် ကိုဗစ်-၁၉ ကာကွယ်ရေးအတွက် ထိုင်းနိုင်ငံ တာခ်ရိုင်မှူးက အကူအညီပေးအပ်
DVB
·
September 9, 2020
ကရင်ပြည်နယ်မှာ ကိုဗစ်-၁၉ ရောဂါကူးစက်ကပ်ဘေးကာလအတွင်း လိုအပ်တာ အသုံးပြုနိုင်ဖို့ မြဝတီတစ်ဘက်ခြမ်း ထိုင်းနိုင်ငံ တာခ်ရိုင်မှူးက ထိုင်းဘတ်ငွေ ၂ သိန်းဖိုးရှိတဲ့ လက်ဆောင်ပစ္စည်းတွေ စက်တင်ဘာ ၈ ရက်နေ့မှာ လွှဲပြောင်းပေးအပ်လိုက်တယ်။
ရေသန့်စင်စက်၊ ခြင်ထောင်၊ စားစရာနဲ့ အဝတ်လျှော်စက်တွေအပါအဝင် ထိုင်း ဘတ်ငွေ နှစ်သိန်းကျော်လောက်တန်ဖိုးရှိတဲ့ လက်ဆောင်တွေကို တာခ်ရိုင်မှူးက ကိုယ်တိုင်မသွားဘဲတဆင့် လွဲပြောင်းပေးခဲ့ရာမှာ မြဝတီခရိုင် အုပ်ချုပ်ရေးမှူး အခွန်ဦးစီးဌာန ကုန်သွယ်ရေး ကုန်သည်ကြီးများအသင်း ဥက္ကဋ္ဌက လက်ခံရယူခဲ့ပါတယ်။
တာခ်ခရိုင် အထွေထွေအုပ်ချုပ်ရေးမှူး နိုင်းအော်လစေ့ စမ်ဖမ်းထလပ်က “ အိမ်နီးချင်းဖြစ်တဲ့ မြဝတီမြို့တွင်း ဗိုင်းရပ်စ်ကူးစက်မှုကို မြဝတီခရိုင်မှူးက အဓိကထား အရေးကြီးတဲ့ လုပ်ငန်းတစ်ခုဆိုတာ ကျနော်နားလည်ထားပြီး လိုအပ်ပါက တာခ်ခရိုင်မှူးနဲ့ မြဝတီခရိုင်မှူးက ပူးပေါင်းကာကွယ်မှုလုပ်ပေးနေသလို ကျန်းမာရေး သတင်းဖလှယ်မှုတွေလည်း ပြုလုပ်နေဆဲပါ။” လို့ ပြောပါတယ်။
အိမ်နီးချင်းမြန်မာနိုင်ငံဘက်က ကိုဗစ်-၁၉ ရောဂါဖြစ်ပွားမှု အခြေအနေကို စောင့်ကြည့်နေပြီး ပိုမိုဆိုးရွားတဲ့ ပြောင်းလဲမှုတွေ ပေါ်ပေါက်လာပါက နပ်စပ်သွားလာ ကုန်တင်ပို့တာတွေကို ပြန်လည် သုံးသပ် အဖြေရှာသွားမယ်လို့လည်း ပြောပါတယ်။
မြန်မာနိုင်ငံဘက်မှာ ကိုဗစ်-၁၉ ရောဂါကူးစက်မှု ပြန်လည်မြင့်တက်လာတာကြောင့် မြဝတီ-မဲဆောက်နယ်စပ်မှာ အသွားအလာတွေပိတ်ထားပြီး ကုန်စည်ပို့ဆောင်ရာမှာလည်း ၄ ဘီးကားတစ်စီဂကို ယာဉ်မောင်းတစ်ဦးသာ မြန်မာ-ထိုင်းချစ်ကြည်ရေးတံတား အမှတ်(၂)ကနေ သွားလာခွင့်ပေးထားပါတယ်။
ထုတ်ပြန်ထားတဲ့ စည်းကမ်းတွေကို ချိုးဖောက်ပြီး နယ်ကျော်သူတွေကိုလည်း ဥပဒေနဲ့အညီ အရေးယူမယ်လို့လည်း အသိပေးကြေညာထားပါတယ်။
ထိုင်းနိုင်ငံရောက် ရွှေ့ပြောင်းမြန်မာအလုပ်သမားတွေအနေနဲ့ မတ်လကနေ အခုအချိန်အထိ မြန်မာနိုင်ငံကို ပြန်လာသူပေါင်း ၇၀၀၀၀ ဦးကျော်ပြီး ကိုဗစ်-၁၉ ရောဂါ ကူးစက်ခံရသူ တချို့လည်း ရှိပါတယ်။
သတင်း - ဖိုးစီ
