ကိုဗစ်-၁၉ လူနာသစ် ၂၂ ဦး ထပ်မံတွေ့ရှိ၊ လူနာအမှတ် ၁၀၂၃ သေဆုံး
DVB
·
September 4, 2020
ဓာတ်ခွဲနမူနာ ၁၄၆၇ ခုအား စစ်ဆေးချက်အရ ရန်ကုန်တိုင်းက အယောက် ၂၀ အပါအဝင် ကိုဗစ်-၁၉ လူနာနာသစ် ၂၂ ဦး ထပ်မံတွေ့ရှိပြီး သေဆုံးသူ ၁ ဦး တိုးလာတယ်လို့ ကျန်းမာရေးနှင့်အားကစားဝန်ကြီးဌာနက ဒီနေ့မနက် ၈ နာရီမှာ သတင်းထုတ်ပြန်ပါတယ်။
ဒုတိယအသုတ်အဖြစ် အမျိုးသားကျန်းမာရေးဓာတ်ခွဲမှုဆိုင်ရာဌာန (ရန်ကုန်) က ဓာတ်ခွဲနမူနာ ၁,၃၂၇ ခု၊ ဆေးသုတေသနဦးစီးဌာန (DMR) က ၁၄၀ ခုတို့အား ထပ်မံ စစ်ဆေးပြီးစီးခဲ့ပြီး ကိုဗစ်-၁၉ အတည်ပြုလူနာသစ် ၂၂ ဦးတွေ့ရှိခဲ့တာပါ။
ရန်ကုန်တိုင်း ကမာရွတ်မြို့နယ်က ၄ ဦး၊ သင်္ဃန်းကျွန်း ၃ ဦး၊ တာမွေ ၂ ဦး၊ မရမ်းကုန်း ၂ ဦး၊ စမ်းချောင်း ၂ ဦး၊ သာကေတ ၁ ဦး၊ လှိုင်မြို့နယ် ၁ ဦး၊ ဗိုလ်တစ်ထောင် ၁ ဦး၊ ကျောက်တံတား ၁ ဦး၊ လမ်းမတော် ၁ ဦး၊ ရန်ကင်း ၁ ဦး၊ ဒဂုံဆိပ်ကမ်း ၁ ဦးနဲ့ မကွေးတိုင်း အောင်လံက ၁ ဦး၊ ရခိုင်ပြည်နယ် အမ်းမြို့နယ်က ၁ ဦး စုစုပေါင်း ၂၂ ဦး တွေ့ရှိခဲ့တာပါ။
လူနာသစ် ၂၂ ဦးထဲက တာမွေမြို့နယ်က ၁ ဦးကတော့ ပြည်ပနိုင်ငံက ပြန်လာပြီး အသွားအလာ ကန့်သတ်ထားတယ်လို့ ကျန်းမာရေးဝန်ကြီးဌာနက ထုတ်ပြန်ထားပါတယ်။
ဝေဘာဂီအထူးကုဆေးရုံကြီးမှာ တက်ရောက်ကုသနေတဲ့ သန်လျင်မြို့နယ်နေ အသက် ၄၆ နှစ်အရွယ် အမျိုးသမီးကတော့ အရေပြားလေးဖက်နာရောဂါအခံရှိသူ ကိုဗစ်-၁၉ အတည်ပြုလူနာအမှတ် ၁၀၂၃ ကတော့ နောက်ဆုံးအဆင့် ကျောက်ကပ်ပျက်စီးတာနဲ့ ရုတ်တရက် နှလုံးစည်းချက်မမှန်ဖြစ်ပြီး နှလုံးအမောဖောက်တာကြောင့် မနေ့ည ၁၀ နာရီခွဲမှာ သေဆုံးသွားတယ်လို့ ဆိုပါတယ်။
လူနာအမှတ် ၁၀၂၃ ဟာ ပြည်ပခရီးသွားရာဇဝင်မရှိသလို ကိုဗစ်-၁၉ အတည်ပြုလူနာတွေနဲ့လည်း ထိတွေ့မှုမရှိခဲ့ဘဲ သင်္ဃန်းကျွန်းပြည်သူ့ဆေးရုံမှာ စောင့်ကြည့်လူနာအဖြစ် ထားရှိရာကနေ ပိုးတွေ့ရှိပြီးနောက် ဝေဘာဂီအထူးကုဆေးရုံကြီးကို ပို့ဆောင်ကုသထားသူ ဖြစ်ပါတယ်။
မနေ့ညက ဓာတ်ခွဲနမူနာ ၁,၁၂၇ ခု စစ်ဆေးရာမှာလည်း ရန်ကုန်က ၁၉ ဦးနဲ့ စစ်တွေက ၁၈ ဦးအပါအဝင် ကိုဗစ်-၁၉ ရောဂါ ဓာတ်ခွဲအတည်ပြုလူနာသစ် ၅၃ ဦး ထပ်မံ စစ်ဆေးတွေ့ရှိတယ်လို့ ကျန်းမာရေးနဲ့ အားကစားဝန်ကြီးဌာနက ထုတ်ပြန်ထားပါတယ်။
မြန်မာနိုင်ငံမှာ ဒီနေ့မနက် ၈ နာရီအထိ ကိုဗစ်-၁၉ အတည်ပြုလူနာ ၁,၁၃၃ ဦး၊ သေဆုံးသူ ၇ ဦး၊ နှစ်ကြိမ်ဆက်တိုက် ပိုးမတွေ့ရှိသူ စုစုပေါင်း ၃၅၉ ဦး၊ ဆေးရုံမှ ဆင်းခွင့်ပြုခဲ့သူ ၃၅၆ ဦးနဲ့ စောင့်ကြည့်လူနာအသစ် ၈၂ ဦးရှိပါတယ်။
ကမ္ဘာတဝန်းမှာတော့ ဒီနေ့မနက်အထိ ကိုဗစ်-၁၉ အတည်ပြုလူနာ ၂၆ ဒသမ ၄ သန်းကျော်၊ သေဆုံးသူ ၈၇၀၀၀၀ ကျော်နဲ့ ရောဂါသက်သာပျောက်ကင်းလာသူ ၁၈ ဒသမ ၆ သန်းကျော်ရှိတယ်လို့ သိရပါတယ်။
