အိန္ဒိယက ပြန်လာသူများထဲမှ ကိုဗစ်-၁၉ အတည်ပြုလူနာသစ် ၄ ဦးတွေ့ရှိ
DVB
·
June 1, 2020
မေ ၃၁ ရက်နေ့အတွက် ဓာတ်ခွဲနမူနာ ၈၀၀ ကျော်ကို ဒုတိယအသုတ်အဖြစ် ဓာတ်ခွဲစစ်ဆေးရာမှာ ကိုဗစ်-၁၉ ရောဂါ ဓာတ်ခွဲအတည်ပြု လူနာသစ် ၄ ဦးတွေ့ရှိရတယ်လို့ ကျန်းမာရေးဝန်ကြီးဌာနက ဒီနေ့မနက် ၇ နာရီ ထုတ်ပြန်ပါတယ်။
အမျိုးသားကျန်းမာရေးဓာတ်ခွဲမှုဆိုင်ရာဌာန (ရန်ကုန်) က ဒုတိယအသုတ်အဖြစ် ဓာတ်ခွဲနမူနာ ၇၃၄ ခု၊ ရန်ကုန်မြို့၊ အမှတ် ၁ တပ်မတော် ဆေးရုံကြီး (ခုတင်-၁,၀၀၀) က ဓာတ်ခွဲနမူနာ ၁၀၃ ခု၊ စုစုပေါင်း ၈၃၇ ခုတို့ကို စစ်ဆေးချက်အရ လူနာသစ် ၄ ဦး တွေ့ရှိခဲ့တာလို့ ဆိုပါတယ်။
လူနာသစ် အမှတ် ၂၂၅၊ ၂၂၆၊ ၂၂၇ နဲ့ ၂၂၈ တို့ဟာ လှိုင်မြို့နယ်နေ အိန္ဒိယနိုင်ငံက ပြန်လာသူတွေဖြစ်ပြီး ရန်ကုန်တိုင်းအတွင်း အသွားအလာ ကန့်သတ်စောင့်ကြည့်နေသူတွေ ဖြစ်ပါတယ်။ သူတို့ကို တပ်မတော်အသည်းရောဂါအထူးကု ဆေးရုံကြီးမှာ ဆေးကုသမှု ခံယူစေမယ်လို့ ဆိုပါတယ်။
မြန်မာနိုင်ငံမှာ ဒီနေ့မနက် ၇ နာရီအထိ ကိုဗစ်-၁၉ ရောဂါ ဓာတ်ခွဲ အတည်ပြုလူနာ ၂၂၈ ဦး၊ သေဆုံးသူ ၆ ဦး၊ ဓာတ်ခွဲအတည်ပြု လူနာဟောင်းတွေမှာ ရောဂါပိုးကင်းစင်လာသူ စုစုပေါင်း ၁၃၈ ဦးရှိပါတယ်။
မေ ၃၁ ရက်နေ့အတွက် အမျိုးသားကျန်းမာရေးဓာတ်ခွဲမှုဆိုင်ရာဌာန (ရန်ကုန်) က ဓာတ်ခွဲနမူနာ ၁,၂၇၉ ခု၊ ဆေးသုတေသနဦးစီးဌာနက ဓာတ်ခွဲနမူနာ ၁၇၈ ခု၊ ရန်ကုန်မြို့၊ အမှတ် (၁) တပ်မတော် ဆေးရုံကြီး ခုတင်-၁,၀၀၀ က ဓာတ်ခွဲနမူနာ ၁၀၃ ခု၊ စုစုပေါင်း ၁,၅၆၀ ခုအား နှစ်သုတ်ခွဲစစ်ဆေးခဲ့တာဖြစ်ပါတယ်။
