မြေစာရင်းဦးစီးမှူးအပါအဝင် ၃ ဦးကို အဂတိလိုက်စားမှုတိုက်ဖျက်ရေးဥပဒေဖြင့် တရားစွဲ
DVB
·
May 25, 2020
လယ်မြေတွေအတွက် ပုံစံ-၇ ထုတ်ပေးဖို့ဆိုပြီး ငွေတွေတောင်းခဲ့တဲ့ မြို့နယ် မြေစာရင်းဦးစီးမှူး အပါအဝင် ၃ ယောက်ကို အဂတိလိုက်စားမှုတိုက်ဖျက်ရေးဥပဒေနဲ့ တရားစွဲဆိုလိုက်ပါတယ်။
ပဲခူးတိုင်း၊ ရွှေကျင်မြို့နယ်၊ ကော်သဇင်ရွာကတောင်သူတွေဟာ လယ်ယာမြေ ပုံစံ ၇ ရဖို့ တိုင်းတာဖော်ထုတ်တာအတွက် တဧကကို ငွေ ၁၀၀၀၀ ပေးခဲ့ရတယ်လို့ တိုင်ကြားလာတဲ့အကြောင်း အဂတိလိုက်စားမှုတိုက်ဖျက်ရေးကော်မရှင်က ဒီနေ့ ထုတ်ပြန်ပါတယ်။
ဒါကြောင့် ကော်မရှင်က စုံစမ်းစစ်ဆေးရေးအဖွဲ့ ဖွဲ့စည်းစစ်ဆေးခဲ့ရာမှာ ပဲခူးတိုင်း၊ ရွှေကျင်မြို့နယ် လယ်ယာမြေ စီမံခန့်ခွဲရေးနဲ့ စာရင်းအင်းဦးစီးဌာန၊ မြို့နယ်ဦးစီးမှူး ဦးရဲထွဋ်အောင် (အခု မြို့နယ်ဦးစီးမှူး၊ နမ့်စန်မြို့နယ် လယ်ယာမြေစီမံခန့်ခွဲရေးနှင့်စာရင်းအင်းဦးစီးဌာန၊ ရှမ်းပြည်နယ်-တောင်ပိုင်း)၊ လက်ထောက် ဦးစီးမှူး ဦးနွယ်မင်းသန်းနဲ့ မြေတိုင်း(၄) ဦးသန်းဇော်မင်း တို့ဟာ ပဒဲကောကျေးရွာအုပ်စု၊ ကော်သဇင်ကျေးရွာ ကွင်းအမှတ်(၃၄) (ဧက ၁၀၀၀ ကွင်း) မှာရှိတဲ့ လယ် ၉၈၇ ဒသမ ၇၁ ဧက အတွက် ပုံစံ ၇ လုပ်ပေးရာမှာ တဧကကို ကျပ် ၁၀၀၀၀ တောင်သူတွေဆီက ကောက်ခံခဲ့ပြီး ငွေကျပ် ၉၂ သိန်း လက်ခံရယူခဲ့တာ စစ်ဆေးပေါ်ပေါက်တယ်လို့ ဆိုပါတယ်။
ဒါကြောင့် သူတို့ ၃ ယောက်ကို အဂတိလိုက်စားမှုတိုက်ဖျက်ရေးဥပဒေ ပုဒ်မ ၅၆ အရ ပဲခူးတိုင်း၊ ရွှေကျင်မြို့မရဲစခန်းမှာ မေ ၂၂ ရက်က ပထမသတင်းပေးတိုင်ချက်ဖွင့်ပြီး တရားစွဲဆို အရေးယူနိုင်ရေး ဆောင်ရွက်နေတယ်လို့ ဆိုပါတယ်။