ကားနှင့်ဆိုင်ကယ်တိုက်မိပြီး ကျောင်းအုပ်ဆရာမ ၁ ဦးသေဆုံး၊ ၃ ဦးဒဏ်ရာရ
DVB
·
October 27, 2019
ရန်ကုန်-မန္တလေးလမ်းဟောင်း မိုင်တိုင် ၃၄၇/၀ နှင့် ၁အကြား မိတ္ထီလာမြို့ စက်မှူဇုန် ၃ လမ်းနဲ့ ၄ လမ်းအနီးမှာ အောက်တိုဘာလ ၂၆ ရက် ညနေက ယာဉ်တိုက်မှုဖြစ်ပွားလို့ ကျောင်းအုပ်ဆရာမ ၁ ဦး သေဆုံးပြီး ၃ ဦး ဒဏ်ရာရရှိခဲ့တယ်လို့ မိတ္ထီလာအမှတ် ၃ ရဲစခန်းက ပြောပါတယ်။
မန္တလေးဘက်မှ မိတ္ထီလာဘက်ကို ဟန်ဇော်ထွန်း မောင်းလာတဲ့ Hijet အ မျိုးအစား ကားငယ်က အခြားကား ၁ စီးအား ကျော်တက်ရာ တဖက်ယာဉ်ကြောထဲ ရောက်ရှိပြီး မျက်နှာချင်းဆိုင်မောင်းလာတဲ့ ဆိုင်ကယ်ကို တိုက်မိခဲ့တာလို့ ဆိုပါတယ်။
ယာဉ်တိုက်မှုကြောင့် ဆိုင်ကယ်မောင်းလာတဲ့ ခြုံစွန်းရွာ အမှတ် ၁၄၀ မူလတန်းကျောင်းအုပ်ဆရာမ ဒေါ်ခင်အုံးမြင့် သေဆုံးသွားပြီး နောက်မှာ ထိုင်လိုက်လာတဲ့ အစ်မဖြစ်သူ ဒဏ်ရာရခဲ့တာပါ။
ယာဉ်တိုက်မှုဖြစ်ပြီးနောက် Hijet ကားက မောင်ပြေးသွားပြီး ရန်ကုန်-မန္တလေးလမ်းဟောင်း မိုင်တိုင် ၃၃၉/၇ နှင့် အကြားမှာ ဆိုင်ကယ်တစီးအား ထပ်တိုက်ခဲ့လို့ ၂ ဦး ဒဏ်ရရှိခဲ့ပါတယ်။
မိတ္ထီလာအမှတ် ၃ ရဲစခန်းစခန်းမှူး ရဲအုပ်ဝင်းမြင့်ဦးက "ကားကျော်တက်ပြီး အရှိန်မထိန်းနိုင်တော့ဘဲ တဖက်ယာဉ်ကြောထဲက ဆိုင်ကယ်ကို တိုက်မိတာပါ။ ကျောင်းအုပ်ဆရာမကြီးကို ပရဟိတကားနဲ့ ဆေးရုံပို့နေတုန်း လမ်းမှာသေဆုံးသွားတယ်၊ Hijet ကားကတော့ မောင်းပြေးသွားတာ ကျီတော်ကုန်းမှာ ထပ်ဖြစ်တယ်" လို့ ပြောပါတယ်။
မိတ္ထီလာအမှတ် ၃ ရဲစခန်းက Hijet ကား ယာဉ်မောင်း ဟန်ဇော်ထွန်း (ဖမ်းမိ) အား ယာဉ်မဆင်မခြင်မောင်းလို့ လူသေဆုံးမှု၊ ပြင်းထန်ဒဏ်ရာရမှု၊ မောင်းပြေးမှု ရာဇသတ်ကြီးပုဒ်မ ၃၀၄-က/၃၃၈/၂၀၂ စတဲ့ပုဒ်မတွေနဲ့ ဖမ်းဆီးအမှုဖွင့်ထားတယ်လို့ သိရပါတယ်။
မောင်မောင်လင်း
