‘ဟင်း..’ ဆိုတဲ့ သက်ပြင်းချသံနဲ့အတူ မကေသီတယောက် ချက်လက်စ ထမင်းပေါင်းအိုးကို ပိတ်လိုက်ပါတယ်။ ထမင်းအိုးတည်ပြီး ၁၀ မိနစ်ခန့်အကြာမှာ ပျက်သွားတဲ့ လျှပ်စစ်မီးက EPC က ထုတ်ပြန်ထားတဲ့အချိန်အတိုင်း ပြန်လာ၊ မလာဆိုတာ မသေချာပါဘူး။ သူ နာရီကိုကြည့်လိုက်တော့ မနက် ၁၀ နာရီခွဲခါနီးပါပြီ။ မိုးမရွာလို့ ပူလောင်အိုက်စပ်နေတဲ့ အခန်းလေးထဲမှာ ယပ်တောင်တဖျပ်ဖျပ်ခတ်ရင်း သူတွေးနေမိတာက အချိန်မီသာ မီးပြန်မလာခဲ့ရင် သူတို့လင်မယား အပြင်ထမင်းဆိုင်မှာ သွားဝယ်စားရမယ့် အရေးကိုပါ။ ဒီလထဲမှာ မီးခဏခဏပျက်လို့ မလိုအပ်ဘဲ ကုန်ကျစရိတ် များလာတာက အိမ်ရှင်မဖြစ်သူ မကေသီအတွက်တော့ စိတ်ပျက်စရာပါ။ ဗဟန်းမြို့နယ်၊ ရွှေနံ့သာရပ်ကွက်မှာနေထိုင်တဲ့ မကေသီဟာ အာမခံကုမ္ပဏီတခုမှာ လုပ်ကိုင်နေသူ ဖြစ်ပါတယ်။ သူ့ခင်ပွန်းဖြစ်သူ ကိုကျော်မောင်သွင်ကတော့ ဆေးကုမ္ပဏီတခုရဲ့ သာမန် အရောင်းဝန်ထမ်းပါ။ သူတို့ဇနီးမောင်နှံလို ဝင်ငွေသိပ်မများတဲ့ မိသားစုတွေမှာ မီးပျက်တဲ့အတွက် ဖြစ်ပေါ်လာတဲ့ ဆိုးကျိုးတွေကို ပိုခံစားရပါတယ်။ “ကိုယ်က ဝန်ထမ်းတွေဆိုတော့ ဆိုင်မှာ အမြဲတမ်း သွားစားရမှာ အဆင်မပြေဘူး။ မနေ့ကဆို မီးသွေးအိတ်တွေ သွားဝယ်ရတယ်။ မဖြစ်မနေ ချက်ပြုတ်စားရမှာကို။ မီးပျက်တဲ့အချိန် အတိအကျမသိတာ အစ်မတို့အတွက် အခက်ခဲတခုပဲ” လို့ မကေသီက ပြောပါတယ်။ အိမ်ရှင်မတွေဟာ နိစ္စဓူဝ သူတို့လုပ်ကိုင်နေရတဲ့ ထမင်းဟင်းချက်တာအစ၊ ရေတင်တာအလယ်၊ အဝတ်လျှော်၊ မီးပူတိုက်တာအဆုံး လျှပ်စစ်မီးနဲ့ မကင်းနိုင်ကြသူတွေပါ။ ရေအားလျှပ်စစ်ကို အဓိကထားနေရတဲ့ မြန်မာနိုင်ငံမှာ မိုးရွာသွန်းမှုနည်းပါးပြီး လုံလောက်တဲ့ရေ မရရှိတာကြောင့် နိုင်ငံတဝှမ်း လျှပ်စစ်မီးပြတ်တောက်မှုတွေ နေ့စဉ် ကြုံတွေ့နေရပါတယ်။ လက်ရှိဖြစ်ပေါ်နေတဲ့ ဒီလျှပ်စစ်မီးပြဿနာဟာ မြို့ပြလူနေမှုဘဝမှာ စားဝတ်နေရေး ပြေလည်ဖို့ ရုန်းကန်လှုပ်ရှားနေရတဲ့ ဝင်ငွေနည်းပါးတဲ့ မိသားစုတွေအပေါ် ရိုက်ခတ်မှုတွေ ရှိနေပါတယ်။ အထူးသဖြင့် အမျိုးသမီးတွေအပေါ် ပိုပြီး ဝန်ထုပ်ဝန်ပိုး ဖြစ်စေတယ်လို့ အမျိုးသမီးအခွင့်အရေး လှုပ်ရှားနေတဲ့ အရပ်ဘက် လူမှုအဖွဲ့အစည်းတွေနဲ့ အိမ်ရှင်မတွေက ပြောပါတယ်။ အရှိုအမျိုးသမီးအဖွဲ့အစည်းမှ ဒါရိုက်တာ မိုင်သန့်စီဦးကလည်း “ညပိုင်းမှာ ကလေးတွေလည်း စာဖတ်ရတာကအစ အဆင်မပြေဘူး။ ရာသီဥတု အရမ်းပူတဲ့အချိန်မှာ မီးခဏခဏပျက်တော့ မခံနိုင်ကြတော့ဘူး။ ညပိုင်းတွေမှာ မီးပျက်ပြီဆိုရင် သူတို့မှာ ဘာမှ မလုပ်တတ်တော့ဘူး။ စိတ်တွေက တိုနေတတ်ကြတယ်။ အဲ့ဒီအချိန်မှာ အမေတွေက သူတို့ကို အချိန်ပေးပြီးတော့ သူတို့ အစစအရာရာ အဆင်ပြေအောင် လုပ်ပေး ပြင်ဆင်ပေးရတဲ့ အပိုင်းတွေ ရှိတဲ့အခါကျတော့ တော်တော်လေး စိတ်အနှောင့်အယှက် ဖြစ်မိပါတယ်။ အိပ်ရေးတွေမဝတော့ လုပ်ငန်းပိုင်းဆိုင်ရာမှာပါ အလုပ်တွေက အဆင်မပြေတော့ဘူးပေါ့” လို့ ပြောပါတယ်။ အစိုးရထုတ်ပြန်ထားတဲ့ ကိန်းဂဏန်းတွေအရ မြန်မာနိုင်ငံရှိ အိမ်ထောင်စု ၁၀ သန်းမှာ ၆ သန်းက လျှပ်စစ်မီး မရရှိသေးပါဘူး။ နှစ်စဉ် လျှပ်စစ်လိုအပ်ချက် ၁၅ ရာခိုင်နှုန်းခန့်ရှိတယ်လို့ သိရပါတယ်။ နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်က ပြီးခဲ့တဲ့ မေလ ၁၇ ရက်က ဘဲလင်း သဘာဝဓာတ်ငွေ့သုံး ဓာတ်အားပေးစက်ရုံဖွင့်ပွဲမှာ ယခုနှစ်မကုန်ခင် လျှပ်စစ်ဓာတ်အား လိုအပ်ချက်ရဲ့ ၅၀ ရာခိုင်နှုန်းကို ဖြည့်ဆည်းပေးနိုင်မယ်လို့ မျှော်လင့်ထားကြောင်း ပြောကြားခဲ့ပါတယ်။ “လာမယ့် ၂၀၂၅ ခုနှစ်မှာဆိုရင် တနိုင်ငံလုံး ရာနှုန်းပြည့် သုံးနိုင်မယ်လို့ မျှော်မှန်းထားပါတယ်” လို့ သူက ဆိုပါတယ်။ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်က လျှပ်စစ်မီး လုံလောက်စွာရရှိဖို့ မျှော်လင့်ထားပေမယ့် လျှပ်စစ်မီးပြတ်တောက်မှုကတော့ တနှစ်ထက်တနှစ် ပိုများလာနေတယ်လို့ အိမ်ရှင်မတွေက ဆိုကြပါတယ်။ တောင်ဥက္ကလာမြို့နယ်၊ ၁၂ ရပ်ကွက်က မသီသီနိုင်က “တနိုင်ငံလုံးကိုလည်း မီးလင်းစေချင်ပါတယ်။ မီးရထားတဲ့ နေရာတွေကိုလည်း မီးပုံမှန်လာစေချင်တယ်။ မီးပုံမှန်မလာတော့၊ တနေ့လုပ်ရမယ့် အချိန်ဇယားတွေပါ ပြောင်းကုန်တာ။ အမှန်ဆို မီးပျက်မယ့်အချိန်လေး ကြိုပြောထားရင် ပိုအဆင်ပြေမယ်” လို့ ပြောပါတယ်။ အခုလို လျှပ်စစ်မီး မလုံလောက်မှုအတွက် သက်ဆိုင်ရာ အစိုးရဌာနတွေက ကိန်းဂဏန်းတွေနဲ့ ထုတ်ပြန်ထားပေမယ့် လက်ရှိ အိမ်ရှင်မတွေ ကြုံတွေ့နေရတဲ့ မိသားစု အရေးပြဿနာတွေ ဘယ်လောက်ထိ မြင့်တက်လာနေသလဲ ဆိုတာကိုတော့ တိုင်းတာဖို့ ခက်ခဲလှပါတယ်။ မကေသီက “အစိုးရရဲ့ အခက်အခဲတွေကို နားလည်ပေမယ့် ပြည်သူတွေရဲ့ အခက်အခဲတွေကိုလည်း စာနာပြီး ဖြေရှင်းပေးစေလိုပါတယ်” လို့ ဆိုပါတယ်။ မကေသီလိုပဲ အခြားသော အိမ်ထောင်ရှင် အမျိုးသမီးတွေဟာလည်း လျှပ်စစ်မီး ပြတ်တောက်မှုဒဏ်ကို ခံစားနေကြရပါတယ်။ မဖြူဖြူအောင်တယောက် ရေချိုးခန်းထဲကို ဝင်လိုက်တာနဲ့ ရေစည်ပိုင်းထဲမှာ ဖင်ကပ်သာရှိတော့တဲ့ရေကို တွေ့လိုက်ရပါတယ်။ အခန်းထောင့်မှာရှိတဲ့ အဝတ်ခြင်းထဲက မလျှော်ရသေးတဲ့ အဝတ်ပုံကို ကြည့်ပြီး သူ ခေါင်းခါယမ်းလိုက်ပါတော့တယ်။ သူလက်ရှိနေထိုင်နေတဲ့ ယုဇနဥယျာဉ်မြို့တော်ရဲ့ ရေပေးဝေမှုဟာ ရန်ကုန်မြို့ရဲ့ အခြားနေရာတွေနဲ့ မတူပါဘူး။ တရက်ခြား တခါသာ ရေပေးဝေတာပါ။ ရေပေးဝေချိန်မှာ သူ အလုပ်ကိစ္စနဲ့ မြို့ထဲရောက်နေတာ၊ အိမ်မှာရှိနေပေမယ့်လည်း မကြာခဏ မီးပျက်နေတာတွေကြောင့် ပုံမှန်ရေမတင်ရပါဘူးလို့ သူက ဆိုပါတယ်။ မိသားစုဝင်လေးယောက်ရှိတဲ့ မဖြူဖြူအောင်တို့အိမ်မှာ လက်ရှိ ရေတစည်ကို ကျပ် ၁၅၀၀ နှုန်းနဲ့ ဝယ်ယူသုံးစွဲနေရတာဖြစ်ပြီး တနေ့ကို ရေနှစ်စည်ကုန်ပါတယ်။ “ကျနော်တို့တောင် တနေ့ကို ရေဖိုး ၃၀၀၀ ကုန်ရင် မိသားစုများတဲ့သူတွေဆို စဉ်းစားကြည့်ပေါ့” လို့ သူက စိတ်ပျက်နေတဲ့လေသံနဲ့ ပြောပါတယ်။ မီးပြန်လာတဲ့ အချိန်မှာလည်း မီးအားမပြည့်တဲ့အတွက် လျှပ်စစ်ပစ္စည်းတွေ အန္တရာယ်ဖြစ်နိုင်တဲ့ အခြေအနေကို စိုးရိမ်နေရတယ်လို့ ကွန်ပျူတာ၊ ပရင်တာတွေကို သုံးစွဲလုပ်ကိုင်နေရတဲ့ ဂရပ်ဖစ်ဒီဇိုင်နာ မဖြူဖြူအောင်က ရှင်းပြပါတယ်။ “တမနက်ခင်းလုံး မီးပျက်နေတာ။ မီးလာတော့ ယုဇနမှာ မီးအားအဝင် ၅၀ (ဗို့) ပဲရှိတယ်။ ဘာမှလုပ်လို့မရတဲ့အပြင် ရှိစုမဲ့စု လျှပ်စစ်ပစ္စည်းလေးတွေ ကြွတော့မယ်။ ကျနော်တို့က လက်လှုပ်မှ ပါးစပ်လှုပ်ရတဲ့ သာမန်ပြည်သူလေ” လို့ သူက ဆိုပါတယ်။ လက်ရှိအခြေအနေမှာတော့ ရာသီဥတုပူပြင်းပြီး ရေနည်းနေတာကြောင့် ရေအားလျှပ်စစ်စက်ရုံတွေက ထုတ်လုပ်မှု လျော့ကျလာပြီး ဇောင်းတူ၊ မုန်း၊ ဖြူးချောင်း၊ မြစ်သာ၊ ရာဇဂြိုလ်နဲ့ တာပိန် စတဲ့ ရေအားလျှပ်စစ်စက်ရုံ ၆ ရုံကို ခေတ္တရပ်နားထားရတယ်လို့ သိရပါတယ်။ ရန်ကုန်မြို့ကို လျှပ်စစ်မီး အပြည့်အဝပေးဖို့ဆိုရင် မဂ္ဂါဝပ် ၁၆၀၀ ခန့် ဖြန့်ဖြူးထုတ်လုပ်ရမှာ ဖြစ်ပါတယ်။ ဒါပေမယ့် လက်ရှိ မဂ္ဂါဝပ် ၁၃၀၀ ခန့်သာ ပေးနိုင်တဲ့ အနေအထားကြောင့် ယခုမေလကစပြီး မြို့နယ်အလိုက် အုပ်စုတွေခွဲပြီး အလှည့်ကျစနစ်နဲ့ မီးပေးနေတာဖြစ်တယ်လို့ ရန်ကုန်တိုင်းဒေသကြီး လျှပ်စစ်နှင့် စွမ်းအင်ဝန်ကြီးဌာနထံမှ သိရှိရပါတယ်။ ရန်ကုန်လျှပ်စစ်ဓာတ်အားပေးဌာနရဲ့ ကြေညာချက်မှာတော့ အများပြည်သူအုပ်စုကို A, B, C, D အုပ်စု ၄ ခုခွဲပြီး ဝန်အားလျော့ချမှာဖြစ်တယ်လို့ ထုတ်ပြန်ထားပါတယ်။ အုပ်စုအလိုက် ဝန်အားလျော့ချမယ့် အကြိမ်ရေဟာ တနေ့ကို အများဆုံး ၃ ကြိမ်ကနေ အနည်းဆုံး ၂ ကြိမ်ရှိမှာဖြစ်ပြီး တကြိမ်ကို ၂ နာရီ ကြာမြင့်မှာ ဖြစ်တယ်လို့လည်း ဖော်ပြထားပါတယ်။ လျှပ်စစ်နှင့်စွမ်းအင်ဝန်ကြီးဌာနမှ ဒုတိယအမြဲတမ်းအတွင်းဝန် ဦးစိုးမြင့်က “အရင်နှစ်တွေကထက် မီးပိုပျက်တယ်လို့ ပြောလို့ရတယ်။ ဘာကြောင့်လဲဆိုတော့ ရာသီဥတု ပူပြင်းတော့ မီးသုံးစွဲသူတွေအတွက် အချိန်ပိုင်းလေးတွေ မျှအောင်ပေးရတာပေါ့” လို့ ပြောပါတယ်။ တနှစ်ထက်တနှစ် အပူချိန်လွန်ကဲလာတဲ့အတွက် အိမ်သုံးလျှပ်စစ်ပစ္စည်း သုံးစွဲမှုမှာလည်း မြင့်တက်လာပြီး တအိမ်ကို ယူနစ် ၃၀ သုံးစွဲရာမှ ယူနစ် ၅၀ ထိ တိုးမြှင့်သုံးစွဲလာလို့ လျှပ်စစ်မီးမလုံလောက်မှုတွေ ဖြစ်ရတယ်လို့လည်း ဦးစိုးမြင့်က ဆက်ပြောပါတယ်။ မီးပျက်လို့ မကြာခဏ အပြင်ထမင်းဆိုင်ကနေ ဝယ်စားနေရတဲ့ မကေသီတို့ ဇနီးမောင်နှံကတော့ သူတို့ဝင်ငွေနဲ့ကိုက်ညီတဲ့ ထမင်းဆိုင်တွေကို ရွေးချယ် စားသောက်နေရပါတယ်။ ခင်ပွန်းဖြစ်သူ ကိုကျော်မောင်သွင်က “အစကတော့ မသိဘူး။ တခါတရံပျက်တယ်ဆိုတော့ အပြောင်းအလဲဖြစ်တယ်။ အပြင်မှာသွားစားကြမယ်ပေါ့။ ပျက်တာစိပ်လာတော့ ဝင်ငွေအရလည်း အဆင်မပြေတော့ဘူးလေ” လို့ ပြောပါတယ်။ မီးပျက်တာကြောင့် စီးပွားရေးထိခိုက်တဲ့အပြင် လူမှုရေး အဆင်မပြေမှုတွေလည်း ရှိနေပါသေးတယ်။ “မီးပျက်တော့ ညပိုင်းမှာ ရာသီဥတုကပူ၊ အိပ်လို့ကမရ၊ မနက်ပိုင်း မထဘဲ အိပ်တော့၊ သူနဲ့ပြိုင်အိပ်တယ်ပြောတော့ ရန်ဖြစ် စကားများကြပြန်ရော” လို့ မကေသီက ဆိုပါတယ်။ လက်ရှိအခြေအနေမှာတော့ မကေသီတို့လို ဝင်ငွေနည်းတဲ့ ပြည်သူတွေအနေနဲ့ မိုးဖြိုင်ဖြိုင်ရွာသွန်းပြီး ရေအားသုံး လျှပ်စစ်ဓာတ်အားပေးစက်ရုံတွေ ပြန်လည်ပတ်နိုင်ဖို့သာ မျှော်လင့်နေကြရပါတယ်။ အခရာ အမျိုးသမီးအဖွဲ့မှ ဒါရိုက်တာ မထားကတော့ မီးပျက်မှုအပေါ် အခုလို မှတ်ချက်ပေးပါတယ်။ “မီးပျက်ပြီဆိုရင် ကလေးငယ်ရှိတဲ့ အိမ်တွေမှာဆို အမေတွေကပဲ ထပြီး ယပ်ခတ်ပေးရတယ်။ အမျိုးသမီး၊ အမျိုးသား၊ အဖေ၊ အမေ တူပေမယ့်လည်း အမျိုးသားက ထပြီး ယပ်ခတ်ပေးတာမျိုး မရှိဘူး။ အမျိုးသမီးတွေက ဒီလိုလုပ်ပေးရတော့ မနက်အလုပ်သွားရမယ်။ အိပ်ရေးပျက်တယ်။ အစရှိသဖြင့်။ အဲ့လို မီးပျက်ပြီဆိုရင် ဘယ်သူပိုခံနေရသလဲဆိုရင် အမျိုးသမီးတွေက ပိုပြီးခံနေရပါတယ်။” သွေးစစ်ကိုင်း / ကျော်စိုးမိုး / မေချိုကျော်သိန်း / မိုးမိုး (hiburma.net ဝက်ဘ်ဆိုက်မှ ပြန်လည်ဖော်ပြသည်။)