ပုလဲမြို့နယ် ကျေးရွာများတွင် ရေအလှူရှင် အရေးပေါ်လိုအပ်နေ
Aung Ko Latt
·
May 29, 2019
စစ်ကိုင်းတိုင်း၊ ပုလဲမြို့နယ် ပုံတောင်ဝန်းကျင်ဒေသက တောင်ပေါ်ကျေးရွာတချို့မှာ သောက်သုံးရေရှားပါးပြတ်လပ်နေပြီး ရေအလှုရှင်တွေ နေ့စဉ်လိုအပ်နေပါတယ်။
အရင်နှစ်ကထက် အပူချိန်မြင့်မားတာကြောင့် စိမ့်စမ်း၊ ရေတွင်း၊ ရေကန်တွေ ရေခမ်းခြောက်ကာ ရေပြတ်လပ်နေတာဖြစ်ပါတယ်။
ရေချမ်းသာ၊ သဲထူး၊ သက္ကယ်ကျင်း၊ ရေသာ၊ ကုန်းရွာ၊ ချမ်းသာအောင် စတဲ့ကျေးရွာ ၆ ရွာက အိမ်ခြေ ၄၀၀ ဝန်းကျင်မှာ ရေပြတ်လပ်နေပြီး အရေးပေါ် အခြေအနေဖြစ်နေတာလို့ ဒေသခံ ပုလဲမြို့နယ် တိုင်းဒေသကြီးလွှတ်တော်ကိုယ်စားလှယ် ဦးဇော်ထက်က ပြောပါတယ်။
"သက္ကယ်ကျင်း၊ ရေသာတို့က ပေ ၁၀၀၀ ကျော်အထိ မြေအောက်ရေမရှိတာ။ မြေအောက်ရေ တိုင်းတာရှာဖွေရေးအဖွဲ့တွေ လာပြီးပြီ။ သူတို့က စိမ့်စမ်းရေသွယ်ပဲရတာ။ အခုက ပူတော့ ညစိမ့်စမ်းတွေ ခမ်းခြောက်ပြီးပြတ်တာပေါ့။ ကျန်တဲ့ ၄ ရွာလောက်ကတော့ ရေတွင်း တူးမယ်ဆိုရင် ရနိုင်တယ်။ နောက်ထပ်လည်း ၄၊ ၅ ရွာလောက်က ရေပြတ်တော့မယ်ဆိုပြီး အကြောင်းကြားထားတာတွေ ရှိနေတယ်။ လောလောဆယ်တော့ မြို့နယ် မီးသတ်၊ ကျေးလက်နဲ့ စေတနာရှင်တို့က လာပြီး လှူနေတာတွေရှိတယ်။ မိုးမရွာမချင်းကတော့ အခက်အခဲဖြစ်နေဦးမှာပဲ။ ရေပြတ်နေတာတော့ ၃ ပတ်လောက်ရှိပြီ။”
နွေရာသီမှာ သောက်သုံးရေပြတ်လပ်ပါက နီးစပ်ရာ မြို့နယ်ကျေးလက်ဖွံ့ဖြိုးရေး ဦးစီးဌာန ရုံးတွေကို ဆက်သွယ်အကြောင်းကြားပေးဖို့ တိုင်းကျေးလက်ဦးစီးဌာနကလည်း နွေဦးရာသီ ကတည်းက ကြေညာထားပါတယ်။
လက်ရှိပုလဲမြို့နယ်မှာ ရေပြတ်တာနဲ့ပတ်သက်ပြီး လာရောက်သွယ်တာ မရှိသေးပေမယ့် စုံစမ်းပြီး လိုအပ်တဲ့ အကူအညီပေးသွားမယ်လို့ တိုင်းကျေးလက်ဦးစီးမှုးက ပြောပါတယ်။ ဒါ့အပြင် ပုလဲမြို့နယ်က တောင်ပေါ် ၅ ရွာကိုလည်း ၂ လက်မတွင်းတူးပေးဖို့ စီမံနေတယ်လို့ ဆိုပါတယ်။
တိုင်းကျေးလက်ဒေသဖွံ့ဖြိုးတိုးတက်ရေးဦးစီးဌာန ညွှန်ကြားရေးမှူး ဦးဝင်းကျော်မျိုးက "တတိုင်းလုံးမှာ မုံရွာ၊ ချောင်းဦး၊ ဝက်လက်၊ ကသာ၊ ကလေးမြို့နယ်တွေက ကျေးရွာ ၁၇ ရွာကို ရေရရှိရေး လုပ်ဆောင်ပေးခဲ့တယ်။ လောလောဆယ်တော့ ကလေးနှင့် ကသာမြို့နယ်မှာ ဌာနကနေ နေ့စဉ် ရေပေးဝေနေတာ ၂ ရွာရှိတယ်။ ပုလဲမြို့နယ်က အခုရေပြတ်တယ်ဆိုတဲ့ ရွာတွေကတော့ ဆက်သွယ်လာတာမရှိသေးဘူး။ ဒါပေမယ့် တိုင်းဒေသကြီး ပိုလျှံရန်ပုံငွေကနေ ၂ လက်မတွင်းတူးဖို့ စီမံနေတာက အေးချမ်းသာ၊ မဲချောင်း၊ ၅၅ မိုင်၊ ချမ်းသာအောင်၊ ရေသာ အဲဒီ ၅ရွာကိုတော့ ပိုလျှံငွေက ခွင့်ပြုချက်ကျရင် သိပ်မကြာဘူး အကောင်အထည်ဖော်မှာပေါ့။ ချက်ချင်းလုပ်ပေးမှာ။ ရေရှိရေးအတွက် ဌာနကနေ နည်းလမ်း ၅ သွယ်နဲ့ ဆောင်ရွက်ပေးနေ ပါတယ်"လို့ ပြောပါတယ်။
ပုလဲမြို့နယ်အတွင်းက တချို့ကျေးရွာတွေဆို ရေစုကန်တွေရှိပေမယ့် နွေအပူကြောင့် ကန်ထဲက ငါးတွေသေဆုံးပြီး ပုပ်ပွကာ ရေက သောက်သုံးလို့ မရတဲ့ အနေအထားတွေလည်း ရှိပါတယ်။
ရေလှူဒါန်းလိုသူတွေအနေနဲ့ ရေပြတ်တဲ့ကျေးရွာတွေကို တိုက်ရိုက်သွာရောက် လှူဒါန်းနိုင်သလို ပုလဲမြို့နယ် လွှတ်တော်ကိုယ်စားလှယ်ရုံးကနေ တဆင့်လည်း ဆက်သွယ်လှူဒါန်းနိုင်ပါတယ်။
