ဖုန်းငွေဖြည့် အပိုဆု အစီအစဉ်များ ယာယီရပ်ဆိုင်း
DVB
·
February 13, 2019
ဖုန်းငွေဖြည့်အပိုဆုအစီအစဉ်တွေကို မနက်ဖြန်ကစပြီး ပြောင်းလဲတော့မယ်လို့ မြန်မာပြည်တွင်း မိုဘိုင်းဖုန်းဆက်သွယ်ရေးလုပ်ငန်း လုပ်နေတဲ့ ဖုန်းအော်ပရေတာတွေက ကြေညာပါတယ်။
ဆက်သွယ်ရေးညွှန်ကြားမှုဦးစီးဌာနကနေ ဖုန်းအော်ပရေတာတွေအားလုံးရဲ့ ဖုန်းငွေဖြည့် အပိုဆု အစီအစဉ်တွေကို ယာယီရပ်ဆိုင်းဖို့ ညွှန်ကြားထားတာကြောင့်လို့ ဆိုပါတယ်။
မိုင်တဲလ်ကတော့ ဖေဖော်ဝါရီ ၁၄ မှာ 120% Top Up Promotion ကို ရပ်ဆိုင်းမယ်လို့ ဆိုပါတယ်။
အူရီဒူးကတော့ သူတို့ရဲ့ ၆ ဆတိုးအစီအစဉ်ကို ဖေဖော်ဝါရီ ၁၄ ရက်ကကစပြီး ၆ ဆတိုး + အစီအစဉ်အဖြစ် မနက်ဖြန်ကစ ပြောင်းလဲမယ်လို့ ဆိုပါတယ်။
ဖြည့်သွင်းလိုက်တဲ့ ဖုန်းငွေပမာဏကို ၆ ဆတိုးသွားစေပြီး ဒေတာအသုံးပြုတာတွေ၊ အူရီဒူး အချင်းချင်းဖုန်းခေါ်ဆိုတာတွေနဲ့စာတိုပေးပို့တာတွေအတွက် အသုံးပြုနိုင်မယ်လို့ ထုတ်ပြန်ပါတယ်။
တယ်လီနော မြန်မာကတော့ လက်ရှိပေးနေတဲ့ ငွေဖြည့်အပိုဆုတွေကို ဖေဖော်ဝါရီ ၁၄ ရက်နေ့ ည ၁၂ နာရီ ၅၉ မိနစ်အထိပဲ ပေးသွားမယ်လို့ ထုတ်ပြန်ပါတယ်။
သုံးစွဲသူတွေဆီမှာ လက်ကျန်ရှိနေတဲ့ ငွေဖြည့်အပိုဆုပမာဏတွေကိုတော့ ကျန်တဲ့ သက်တမ်းကာလအတိုင်း အပြောင်းအလဲမရှိ ဆက်လက်အသုံးပြုနိုင်မှာ ဖြစ်ပြီး ငွေဖြည့်အပိုဆု ကလွဲလို့ တခြား ပရိုမိုးရှင်း ဝန်ဆောင်တာတွေကိုတော့ ဆက်ပေးသွားမယ်လို့ ဆိုပါတယ်။
အမ်ပီတီကတော့ တစုံတရာ ကြေညာထားတာ မရှိပါသလို မနေ့ကပဲ ထောဘီ + အစီအစဉ် ကြော်ငြာကို ဖုန်းတွေကို စာတိုတွေ ဆက်လက်ပေးပို့နေပါတယ်။
