မန္တလေးတွင် ငွေခိုးယူသူကို စီစီတီဗွီမှတ်တမ်းအရ ဖော်ထုတ်အရေးယူ
DVB
·
November 7, 2018
ဆိုင်ကယ်ထဲက ငွေတွေကို ခိုးယူခံရတဲ့ စီစီတီဗွီမှတ်တမ်းကို ဖေ့စ်ဘွတ်လူမှုကွန်ရက်မှာ တင်ခဲ့ပြီးနောက် ခိုးယူတဲ့ တရားခံကို ရက်ပိုင်းအတွင်း ဖမ်းမိထားတယ်လို့ မန္တလေးတိုင်း ရဲတပ်ဖွဲ့က ထုတ်ပြန်ပါတယ်။
နိုဝင်ဘာ ၅ ရက် မွန်းလွဲပိုင်းက မန္တလေး၊ အောင်မြေသာစံမြို့နယ်၊ အနှိပ်တော်ရပ်ကွက်နေ မစုသီရိစံဟာ သူ့အဖေလွှဲလာတဲ့ ငွေတွေကို ၆၂ လမ်း၊ ၁၉x၂၀ လမ်းကြား ကမ္ဘောဇဘဏ်မှာ သူ့အမေနဲ့အတူ သွားထုတ်ယူခဲ့ပါတယ်။
ထုတ်လာတဲ့ငွေ ၁၉ သိန်းကို ဆိုင်ကယ် တူးလ်ဘောက်ထဲမှာထည့်ပြီး ဆန်ဝယ်ဖို့အတွက် ၁၉ လမ်းက ဆိုင်တဆိုင်ရှေ့မှာ ရပ်ထားခဲ့ပါတယ်။
ဘဏ်က ထွက်လာကတည်းက ဘဏ်ရှေ့အပင်အောက်မှာ လူ ၃ ယောက်က စောင့်ကြည့်နေတာကို တွေ့သလို ဆန်ဝင်ဝယ်တဲ့ အချိန်ဟာ ၃ မိနစ်လောက်ပဲရှိမယ်လို့ မစုသီရိစံက သူ့ရဲ့ ဖေ့စ်ဘွတ်ခ်မှာ ပြောပါတယ်။
လူ ၃ ယောက်က ဆိုင်ကယ်တူးလ်ဘောက်ကိုဖွင့်ပြီး ငွေတွေယူသွားပုံ စီစီတီဗွီမှတ်တမ်းကို ပါဖေ့စ်ဘွတ်ခ်မှာ တင်လိုက်ပြီး အကူအညီတောင်းတဲ့အခါမှာ ပြန်ပြီး မျှဝေသူ အများ အပြားရှိခဲ့ပါတယ်။ အဲဒီနောက် အမှတ် ၁ နယ်မြေရဲစခန်းမှာ ခိုးမှုနဲ့ အမှုဖွင့်ခဲ့ပါတယ်။
ဒီအမှုကို မန္တလေးတိုင်းရဲတပ်ဖွဲ့က အထူးအမှုစစ်အဖွဲ့တွေဖွဲ့ပြီး ပတ်ဝန်းကျင်က စီစီတီဗွီ မှတ်တမ်းတွေကို ကြည့်ရှု စုံစမ်းရှာဖွေခဲ့ရာမှာ ကျူးလွန်ရာမှာပါတဲ့ CZI-125 အနက်ရောင် ဆိုင်ကယ်စီးသူဟာ ပုသိမ်ကြီးမြို့နယ်၊ ကုလားကြီးခြံမှာ နေထိုင်တဲ့ စောမင်းဦး ဖြစ်တယ်လို့ သိခဲ့ရပါတယ်။
ဒါကြောင့် နိုဝင်ဘာ ၆ ရက် ညနေပိုင်းမှာ သက်သေတွေနဲ့အတူ ကုလားကြီးခြံကို သွားရောက် စုံစမ်းပြီး ပြစ်မှုကျူးလွန်သူ မသင်္ကာတရားခံ အသက် ၂၄ နှစ်အရွယ် စောမင်းဦးကို သူ့ရဲ့ အိမ်မှာ တွေ့ရပါတယ်။
စစ်ဆေးရာမှာတော့ ဆိုင်ရှေ့မှာ ရပ်ထားတဲ့ ဆိုင်ကယ်တူးလ်ဘောက်ထဲက ငွေ ၁၉ သိန်း ခိုးယူခဲ့တာ စစ်ဆေးပေါ်ပေါက်လို့ ပြစ်မှုကျူးလွန်ရာမှာ သုံးတဲ့ CZI-125 အနက်ရောင် မော်တော်ဆိုင်ကယ်နဲ့ အခင်းဖြစ်တုန်းက သူဝတ်ဆင်ခဲ့တဲ့ အင်္ကျီနဲ့ ပုဆိုးတို့ကို သိမ်းဆည်းကာ အသေးစိတ်ဆက်လက် စစ်ဆေးနေတယ်လို့ မန္တလေး ရဲတပ်ဖွဲ့က ထုတ်ပြန်ထားပါတယ်။
ဓာတ်ပုံ- Mandalay Police
