စိုက်ပျိုးရေးကြီးကြပ်ရေးမှူးကို မီးရှို့သတ်ဖြတ်မှု အမိန့်ချရန် ရက်ရွှေ့ဆိုင်း
Aung Aung Naing
·
June 19, 2018
ရှမ်းပြည်မြောက်ပိုင်း၊ နောင်ချိုမြို့နယ်၊ ရွှေညောင်ပင်ရွာ အားမာန်စိုက်ပျိုးရေးရုံး ကြီးကြပ်ရေးမှူး ဦးငွေစိုး(ခ)ဦးဇင်းအား မီးရှို့သတ်ခဲ့မှုနဲ့ တရားစွဲခံထားရတဲ့ ရွာသား ၆ ဦးကို နောက်ဆုံး အပြီးသတ် အမိန့်ချဖို့ ကျောက်မဲခရိုင် တရားရုံးက ရက်ရွေ့ ဆိုင်းလိုက်ပါတယ်။
၂၀၁၇ မေ ၂၄ရက်က နောင်ချိုမြို့နယ် ကုန်းသာအုပ်စု၊ ရွှေညောင်ပင်ကျေးရွာရှိ အားမာန်စိုက်ပျိုးရေးရုံးက ကြီးကြပ်ရေးမှူး ဦးငွေစိုးကို ကုန်းသာအုပ်စု၊ လွယ်တောင်ရွာသား ဦးသြဇေယျနဲ့ အပေါင်းအပါ ၅ ဦးတို့က ဖမ်းဆီးခေါ်ဆောင်ပြီး မီးရှို့သတ်ခဲ့တယ်ဆိုပြီး အားမာန်စိုက်ကွင်းမန်နေဂျာ ဦးမြင့်ကျော်က ပြီးခဲ့တဲ့နှစ် ဇွန်လ ၂၃ရက် ကတည်းက တရားလို အဖြစ် တရားစွဲဆိုထားတဲ့ အမှုဖြစ်ပါတယ်။
ဦးသြဇေယျ၊ ဦးဝင်းနိုင်(ခ)ရှမ်းကြီး၊ ဦးစိုင်းအောင်ကျန်၊ ဦးအိုက်လူ (ခ)အိုက်ပီး၊ ဦးထွန်းဦး၊ ဦးကျော်ဆွေတို့ ၆ဦးကို ရာဇဝတ်ကြီး အမှုအမှတ် ၃၆၄ လူသတ်မှု ပုဒ်မ ၃၀၂/၃၄၊ အားပေးကူညီမှုပုဒ်မ ၁၁၄/၂၀၀တို့နဲ့ ကျောက်မဲမြို့နယ် ခရိုင်တရားရုံးကတရားလို တရားခံတွေကို စွဲချက်တင်ကြားနားကာ အမိန့်ချ နိုင်ဖို့ ဇွန်လ ၁၈ ရက်နေ့ကို ချိန်းဆိုခဲ့ပါတယ်။
ကျောက်မဲမြို့ခရိုင်တရားသူကြီးရဲ့ သတင်းပြန်ကြားရေး တာဝန်ရှိသူ ဒေါ်မေမီဝင်းရွှေက “တရားသူကြီးက အမိန့်ချဖို့ ဒီအမှုက အနည်းငယ် ရှုပ်ထွေးနေတာကြောင့် ဒီစီရင်ချက်ကို ပိုမိုပြည့်စုံတဲ့ စီမံချက်ဖြစ်ဖို့ မပြီးပြတ်သေးတာကြောင့် ဇွန်လ၂၅ရက်မှ အမိန့်ချဖို့ ပြန်လည်မှာ ချိန်းဆိုမှာဖြစ်တယ်။ အဲဒီနေ့ကျရင်တော့ သိချင်တဲ့ အရာတွေကို ဒီအမူနဲ့ ပတ်သတ်ပြီး ဘယ်သူကို ဘယ်လောက်ချမှတ်မယ်ဆိုတာကို ပြည့်ပြည့်စုံစုံ သိရမှာပါ”လို့ ပြောပါတယ်။
တရားလို ဦးမြင့်ကျော်ကတော့ “ဦးငွေစိုးကို ဖမ်းဆီးခေါ်ဆောင်ပြီး မီးရိူ့သတ်ခဲ့တဲ့ တရားခံတွေကို ထိုက်သင့်တဲ့ ပြစ်ဒဏ်တွေချမှတ် ပေးစေချင်တယ်၊ ဒါမှလည်း ဒီနယ်မြေဟာ ငြိမ်းချမ်းပြီး တရားဥပဒေစိုးမိုးလာမှာဖြစ်တယ်”လို့ ပြောပါတယ်။
ဦးသြဇေယျနဲ့အတူ တရားစွဲခံထားရသူတွေဟာ၂၀၁၇ ခုနှစ်အတွင်းမှာ အားမာန်စိုက်ပျိုးရေးပိုင် ကြံစိုက်ခင်းတွေကို အကြိမ်ကြိမ် မီးရှိုဖျက်ဆီးခဲ့တာကြောင့် တရားစွဲခံခဲ့ရပြီး အားမာန်စိုက်ကွင်းထဲ မကျူးကျော်ရ ဆိုင်းဘုတ်တွေ အတင်းဝင်ရောက် ကျူးကျော်စိုက်ထူတာကြောင့်လည်း တရားစွဲခံထားရပါတယ်။