ကိုကာကိုလာ အချိုရည်စက်ရုံ အလုပ်သမားများ လျော်ကြေးကိစ္စ သဘောတူညီမှုရရှိ
အာကာ
·
February 18, 2018
အလုပ်ရပ်စဲတာ၊ ကုမ္ပဏီပြောင်းရွှေ့တာတွေကြောင့် အငြင်းပွားမှုတွေဖြစ်ခဲ့တဲ့ ကိုကာကိုလာအချိုရည် စက်ရုံ အလုပ်သမား ၁၆၀ လောက်ဟာ တဦးကို ကျပ် ၁၄ သိန်းကျော်ကနေ သိန်း ၄၀ ကျော်ထိ ရရှိမယ့် နို့တစ်ကြေး၊ ဘောနပ်ကြေး၊ လုပ်သက်ကြေးတွေနဲ့ အလုပ်ရပ်နားဖို့ သဘောတူညီလိုက်ပါတယ်။
မှော်ဘီမြို့နယ်မှာ စက်ရုံဖွင့်လှစ်ထားတဲ့ Coca-Cola Pinya Beverages Myanmar (CCPBM) သယ်ယူပို့ဆောင်ရေးကဏ္ဏမှာ တာဝန်ထမ်းဆောင်နေတဲ့ အလုပ်သမားအားလုံးကို အလုပ်က ရပ်စဲ/ပြောင်းရွှေ့ပြီး သယ်ယူပို့ဆောင်ရေး ကဏ္ဏတစ်ခုလုံးကို Third Party ကုမ္ပဏီ ၃ ခုကို လွှဲပြောင်းတာဝန်ပေးလိုက်တယ်လို့ ဖေဖော်ဝါရီ ၁၃ ရက်နေ့က စက်ရုံတာဝန်ရှိသူတွေက တွေ့ဆုံပြောကြားပြီးနောက် အခုလို အငြင်းပွားမှုတွေဖြစ်လာတာပါ။
မှော်ဘီမြို့နယ် အလုပ်သမားညှိနှိုင်းဖြန်ဖြေရေး အလုပ်သမားကိုယ်စားလှယ် ဦးရဲဝင်းထွန်းက “ဖေဖော်ဝါရီ ၂၈ ရက်နေ့ နောက်ဆုံးထားပြီး လျော်ကြေးတွေပေးဖို့ သဘောတူခဲ့ပါတယ်။ လုပ်သက်ကြေးကတော့ လုပ်သက်အနည်းဆုံး ၂ နှစ်ကနေ အများဆုံး ၁၈ နှစ်ထိကို ရရှိပါတယ်။ အဲဒါကြောင့် တဦးကို နို့တစ်ကြေး၊ ဘောနပ်ကြေး၊ လုပ်သက်ကြေးတွေနဲ့ ဒီလလစာအပါအဝင် အနည်းဆုံးကျပ် ၁၄ သိန်းကျော်ကနေ အများဆုံး ကျပ်သိန်း ၄၀ ကျော်ထိ ရမှာဖြစ်ပါတယ်။ အလုပ်သမား ၁၅၇ ဦးအတွက်ပါ”လို့ ဒီဗွီဘီ ကိုပြောပါတယ်။
ဒါ့အပြင် အလုပ်ရပ်နားရမယ့် အလုပ်သမားတွေကို Coca က သယ်ယူပို့ဆောင်ရေးအတွက်လွှဲပြောင်း တာဝန်ပေးမယ့် Third Party ကုမ္ပဏီ ၃ ခုမှာ အလုပ်အကိုင် ရရှိအောင်လည်း ညှိနှိုင်းပေးဖို့ သဘောတူညီထားတယ်လို့ဆိုပါတယ်။
CCPBM ကုမ္ပဏီဟာ မြန်မာနိုင်ငံမှာ ၂၀၁၃ ခုနှစ် ဇွန်လက လုပ်ငန်းစတင်ခဲ့ပြီး ၅ နှစ်အတွင်း အမေရိကန်ဒေါ်လာ သန်း ၂၀၀ လောက် ရင်းနှီးမြှုပ်နှံထားတယ်လို့ သိရပါတယ်။