မောင်တောရှိ ပိုင်ရှင်မဲ့ မိုးစပါးများကို ရိတ်သိမ်းရောင်းချ၍ ပိုင်ရှင်ကိုပေးအပ်မည်
DVB
·
November 15, 2017
ရခိုင်ပြည်နယ် မောင်တောဒေသရှိ ပိုင်ရှင်မဲ့မိုးစပါးတွေကို ရိတ်သိမ်းရောင်းချပြီး ရရှိငွေကို နိုင်ငံတော်ဘတ်ဂျက်မှာထည့်သွင်းမှာ မဟုတ်ဘဲ မူလပိုင်ရှင်ကိုပေးအပ်သွားမယ်လို့ အစိုးရ သတင်းထုတ်ပြန်ရေးကော်မတီက ထုတ်ပြန်ပါတယ်။
မောင်တောဒေသမှာ ကျေးရွာအလိုက် နေရပ်စွန့်ခွာသွားသူတွေရဲ့ မိုးစပါးတွေကို ရခိုင်ပြည်နယ် အစိုးရက ထိန်းသိမ်းရေးကော်မတီဖွဲ့စည်းပြီး ရိတ်သိမ်းပေးနေရာမှာ နိုဝင်ဘာ ၁၃ ရက်ထိ စပါးစိုက် ဧကပေါင်း ၁၇၁၄ ကျော် ရိတ်သိမ်းပေးခဲ့ပြီး စပါးတင်းပေါင်း ၆၅၆၂၈ တင်း ထွက်ရှိခဲ့တယ်လို့ဆိုပါတယ်။
ရိတ်သိမ်းခြွေလှေ့ပြီး ထွက်ရှိလာတဲ့ မိုးစပါးတွေကို ရောင်းပြီး ရရှိလာတဲ့ငွေတွေကို ဘဏ်မှာ အကောင့်တစ်ခု ဖွင့်လှစ်ပြီး နိုင်ငံတော်က ထိန်းသိမ်းထားရှိမှာဖြစ်ပြီး ရရှိလာတဲ့ ငွေကြေးကို မောင်တောဒေသ ဖွံ့ဖြိုးတိုးတက်ရေး လုပ်ငန်းတွေအတွက် သုံးမှာမဟုတ်ဘဲ နေရပ်စွန့်ခွာသူ လယ်ပိုင်ရှင်တွေ ပြန်လည်ရောက်ရှိလာချိန်မှာ ပြန်လည်ပေးအပ်မယ်လို့ သိရပါတယ်။
မောင်တောဒေသမှာ ပိုင်ရှင်မဲ့စပါးတွေ ရိတ်သိမ်း၊ ရောင်းချပြီး နိုင်ငံတော်ဘတ်ဂျက်သို့ ထည့်သွင်းမယ်ဆိုတဲ့ သတင်းတွေ မှန်ကန်မှုမရှိဘူးလို့လည်း အစိုးရက ငြင်းဆိုထားပါတယ်။