ဘယ်သူ့ကို ကာကွယ်ကြမလဲ...
DVB
·
May 11, 2017
သမီးလေးရဲ့လိင်အင်္ဂါတဝိုက်တွင် ရောင်ရမ်းကာ သွေးများလည်း ထွက်နေပြီး၊ အရွယ်နဲ့မလိုက် နာကျင်ခံစားကာ အော်ငိုနေတာကို အမေတယောက်အနေနဲ့ ပြောမပြတတ်အောင် ခံစားရကြောင်း ဒေါ်ထွေးရီက ဆိုပါတယ်။
“သမီးလေး ဗိုက်အောင့်တယ်ဆိုပြီး အော်ငိုရင် ကျမ အရမ်းခံပြင်းတယ်” လို့လည်း မျက်ရည်ကျရင်း ပြောပြပါတယ်။
ဒေါ်ထွေးရီရဲ့သမီးငယ်လေး အသက် ၄ နှစ်အရွယ် ဝေဝေ(အမည်လွှဲ)ဟာ ဘုန်းကြီးကျောင်းမှာ အဓမ္မပြုကျင့်ခံခဲ့ရတာ ဖြစ်ပါတယ်။
ဒီဖြစ်ရပ်ဟာ သူတို့မိသားစုဟာ မန္တလေးမြို့၊ အောင်မြေသာဇံမြို့နယ်၊ စိန်တုံးကျောင်းတိုက်ဝင်းထဲမှာ ခေတ္တသွားရောက် မှီခိုနေထိုင်ခဲ့ချိန်က ဖြစ်ပွားခဲ့ခြင်းပါ။
“ကျမတို့ နေစရာ အဆင်မပြေလို့ ဘုန်းကြီးကျောင်းမှာ သွားနေကြတာ။ သမီးကြီး စာမေးပွဲကြီး ပြီးရင်တော့ ရွာပြန်မယ် လုပ်ထားပြီးပြီ”
ဘုန်းကြီးကျောင်းတွင် ၁ လကျော် နေထိုင်လာပြီး ၂၀၁၅ ခုနှစ်၊ ဒီဇင်ဘာလမှာ သမီးငယ်လေးကို ဘကြီးဘုန်းကြီးက သက်ငယ်မုဒိမ်းမှု ကျူးလွန်ခဲ့တာဖြစ်တယ်လို့ ဒေါ်ထွေးရီက ပြောပါတယ်။
“အခု ကလေးကို မုဒိမ်းကျင့်တဲ့ ဦးဇင်းက ကလေးအဖေရဲ့ အသိပါ”
“သမီးလေးကို စစချင်း မေးတုန်းက ကြောက်နေတယ်။ နောက်ဆုံးတော့ ဘကြီး လုပ်တာဆိုတာ သမီးလေး ပြောပြလာတယ်”
“သမီးကို လုပ်တဲ့အချိန်မှာ ဘာလို့မအော်တာလဲလို့ မေးကြည့်တော့။ ဘကြီး ဘုန်းကြီးက သမီးပါးစပ်ကို တိတ်နဲ့ကပ်ထားတယ်လို့ သမီးက ပြောပြပါတယ်”
ဒေါ်ထွေးရီအနေနဲ့ သူမရဲ့သမီးငယ်ကို ဘုန်းကြီးက မုဒိမ်းကျင့်လိုက်တယ်လို့ သိလိုက်တဲ့အခါမှာ မယုံတဝက် ယုံတဝက် ဖြစ်နေပြီး၊ ဘယ်သူ့ကို သွားရောက် တိုင်ကြားရမယ် ဆိုတာကိုလည်း မသိတဲ့အတွက် အတော်စိတ်ပင်ပန်းခဲ့ရပါတယ်။ ပညာမတတ်၊ ငွေကြေးမပြည့်စုံတဲ့အပြင် ကိုယ်တိုင်ကြားရမယ့်သူက ဘုန်းကြီး ဖြစ်နေတဲ့အတွက်လည်း စိုးရိမ်စိတ်တွေ အများကြီး ဖြစ်ခဲ့ရတယ်လို့ ဒေါ်ထွေးရီက သူမရဲ့ အတွေ့အကြုံကို ပြန်ပြောပြပါတယ်။
ဆေးရုံကိုသွားပြီး ဆေးစစ်ရာမှာလည်း အခက်အခဲများစွာ ရှိခဲ့ကြောင်း၊ ရဲစခန်း သွားတိုင်ကြားရာမှာလည်း တာဝန်ရှိသူများက မြန်မြန်ဆန်ဆန် ဆောင်ရွက်ပေးမှု မရှိကြောင်း၊ တရားရုံးတွင် ရင်ဆိုင်ရာမှာလည်း ရှေ့နေခေါ်ရန် အဆင်မပြေကြောင်း၊ အစောပိုင်းကာလ အဆင်မပြေမှုများကို ဒေါ်ထွေးရီက ပြောပြပါတယ်။
“သမီးလေးက ဆီးအိမ်ရောင်လို့ ဆေးရုံ ၂ ခါ တက်ခဲ့ရတယ်။ ကလေးအတွက် ဆေးကုသဖို့လည်း တဖက်က ရုန်းကန်ရတယ်။ တဖက်ကလည်း အမှုအတွက် အခက်အခဲတွေ အများကြီး ကြုံရတယ်။ ငွေမရှိတော့ တရားရုံးသွားတာတောင် ရှေ့နေမငှားနိုင်ခဲ့ဘူး။ ကျမ အဝတ်လည်း လျှော်တယ်။ စက်လည်း ချုပ်တယ်။ သမီးလေးအတွက် အမှုမှန်ပေါ်ဖို့ တခုပဲ ကျမ စိတ်ထဲမှာရှိတယ်” လို့ ဒေါ်ထွေးရီက ပြောပါတယ်။
ကလေးငယ်ကို မုဒိမ်းမှု ကျူးလွန်ခဲ့တဲ့ ဘုန်းကြီးဟာ ငွေကြေးချမ်းသာတဲ့ အသိုင်းအဝန်း၊ ငွေကြေးချမ်းသာတဲ့ ဒကာ၊ ဒကာမများ ပံ့ပိုးမှုရှိသူဖြစ်လို့ အမှုပိတ်ပေးပါက ကလေးငယ်ရဲ့ ဆေးကုသစရိတ်အားလုံးကို အကုန်အကျခံပေးပြီး လိုအပ်တဲ့ ငွေကြေး အထောက်အပံ့လည်း ပေးမယ်လို့ အကြိမ်ကြိမ် လာရောက်ညှိနှိုင်းမှု ပြုခဲ့ကြောင်း ဒေါ်ထွေးရီက ဆိုပါတယ်။
မန္တလေးမြို့၊ အောင်မြေသာဇံမြို့နယ်၊ စိန်တုံးကျောင်းတိုက်မှ အသက် ၄၆ နှစ်အရွယ် ဝါတော် ၂၆ ဝါရှိ ဘုန်းကြီး ဦးပညာဒီပ(ခ)ဦးကျော်ဝင်းကို တိုင်းတရားရုံးက ပြစ်မှု ကျူးလွန်ကြောင်း ဆုံးဖြတ်ခဲ့ပါတယ်။
“ကျမသမီးရဲ့ဘ၀နဲ့ ဂုဏ်သိက္ခာကို ဘာနဲ့မှ မလဲနိုင်ဘူး။ တရားဥပဒေအတိုင်း လုပ်မယ်။ တိုက်တလုံး၊ ကားတစီး၊ ချမ်းသာအောင် လုပ်ပေးမယ်ဆိုရင်တောင် ကျမ မယူဘူး။ ကျမ အမှန်တရားပဲ လိုချင်တယ်။ သောက်ဖို့ ရေဖိုး မရှိတာတောင် ကျမ သမီးလေး အမှုမှန်ပေါ်ဖို့ ရုံးချိန်း မပျက်မကွက် ရောက်အောင် သွားပါတယ်” လို့ ဒေါ်ထွေးရီက အမှုစတင်လိုက်တဲ့အချိန်မှာ ဖြတ်သန်းခဲ့ရတာတွေကို ပြောပြတယ်။
လက်ရှိအမှုနဲ့ပတ်သက်ပြီး တိုင်းဒေသကြီးအဆင့်ထိ သမီးလေး ဝေဝေ အမှုနိုင်ခဲ့ပေမယ့် တရားခံဘုန်းကြီးဘက်က နေပြည်တော်အဆင့်ထိ အယူခံ လျှောက်ထားတဲ့အတွက် အမှုပြီးမြောက်ခြင်း မရှိသေးပါ။
“အမှုကတော့ ကျမတို့ တိုင်းအဆင့်ထိ နိုင်ပြီးပြီ။ အခု တရားခံဘက်က နစ်နာတယ်ဆိုပြီး နေပြည်တော်ကို စာတင်ထားတယ်။ ကျမလည်း သူတို့ ဘာဆက်ပြီး လုပ်မလဲဆိုတာ စောင့်ကြည့်နေရတယ်။ အခုနောက်ပိုင်းတော့ အခမဲ့ရှေ့နေအဖွဲ့က လိုက်ပြီး ကူညီပေးနေပါတယ်” လို့ ဒေါ်ထွေးရီက ဆက်လက်ပြောပြတယ်။
အရွယ်မရောက်သေးတဲ့သူတွေအပေါ် ကျူးလွန်တဲ့ သက်ငယ်မုဒိမ်းမှုဟာ တနှစ်ထက် တနှစ် ပိုများလာပြီး သက်ငယ်မုဒိမ်းပြုကျင့်သူ တရားခံများထဲမှာ ဘာသာရေး ပုဂ္ဂိုလ်များ ပါဝင်နေတာ တွေ့လာရတယ်လို့ သက်ငယ်မုဒိမ်းမှုများကို လိုက်လံ ကူညီဆောင်ရွက်ပေးနေတဲ့ အဖွဲ့အစည်းများက ပြောကြပါတယ်။
၂၀၁၆ စက်တင်ဘာလအတွင်းကလည်း ဧရာဝတီတိုင်းဒေသကြီး၊ ဇလွန်မြို့နယ်၊ ကျုံတနော်တောင်ကျေးရွာအုပ်စု ညောင်အိုင်ကြီးရွာ ညောင်အိုင်စိတ္တသုခ ကျောင်းထိုင်ဘုန်းကြီးဟာ သက်ငယ်မုဒိမ်းမှု ကျူးလွန်ခဲ့ပြီး တရားလိုဖက်မှ ဇလွန်မြို့ ရဲစခန်းမှာ မုဒိန်းမှု ပုဒ်မ ၃၇၆ နဲ့ အမှုဖွင့်ထားပါတယ်။
၂၀၁၆ ခုနှစ်မှာ မြန်မာတနိုင်ငံလုံး မုဒိမ်းမှုပေါင်း ၁၁၀၀ ကျော်ဖြစ်ပွားပြီး အရွယ်ရောက်ပြီးသူ မုဒိမ်းကျင့်ခံရမှု ၄၉၂ မှုနဲ့ သက်ငယ်မုဒိမ်းမှု ၆၇၁ မှု ရှိကြောင်း မြန်မာနိုင်ငံ၊ ရဲတပ်ဖွဲ့က သတင်းထုတ်ပြန်ထားပါတယ်။
ဘာသာရေးပုဂ္ဂိုလ်များနဲ့ပတ်သက်တဲ့ မုဒိမ်းမှု၊ သက်ငယ်မုဒိမ်းမှုတွေကို မိမိတို့ ကိုးကွယ်ကြတဲ့ ဘာသာရေးအပေါ် ထိခိုက်ပြီး အသရေ ညှိုးနွမ်းမှာ စိုးရိမ်လို့ ဖုံးကွယ်မှုတွေ ပြုလုပ်ကြကြောင်း၊ အကာအကွယ်ပေးလေ့ရှိကြကြောင်း သက်ငယ်မုဒိမ်းမှု လိုက်လံ ကူညီပေးနေတဲ့ အမျိုးသမီးအဖွဲ့အစည်းများက ဆိုကြပါတယ်။
“ခရစ်ယာန်ဘုန်းကြီးပဲဖြစ်ဖြစ်၊ ဗုဒ္ဓဘာသာဘုန်းကြီးပဲဖြစ်ဖြစ် ကိုယ့်ဘာသာ အသရေညှိုးနွမ်းမှာ စိုးရိမ်ပြီးတော့ တာဝန်ရှိသူတွေကိုယ်တိုင် ဖုံးကွယ်ကြတာ။ တကယ်တော့ ဘာသာရေးက ဒါတွေကို အားပေးတာ မဟုတ်ဘူးဆိုတာကို မတွေးမိကြဘူး။ ဘာသာရေးဆိုတာ လိုက်ကာကွယ်ပေးနေစရာလည်း မလိုဘူး။ သူ့ဘာသာသူ ရှင်သန်နေရမယ်” ဟု သက်ငယ်မုဒိမ်းမှုများကို လိုက်လံ ကူညီဆောင်ရွက်ပေးနေတဲ့ အခရာ အမျိုးသမီးအဖွဲ့မှ ဒါရိုက်တာ ဒေါ်ထားထားက ပြောပါတယ်။
တချို့ဘာသာရေးနဲ့ပတ်သက်တဲ့ မုဒိမ်းမှုတွေကို လာရောက်တိုင်ကြားရာမှာလည်း ဘာသာရေးအဖွဲ့အစည်းများက အနှောင့်အယှက်ပေးခြင်းများ လိုက်လံပြုလုပ်ကြတယ်လို့ ဒေါ်ထားထားက ပြောပြပါတယ်။
“လက်ရှိမှာ ကျမတို့အဖွဲ့က လိုက်ကူညီပေးနေတဲ့ ဘုန်းကြီးသက်ငယ်မုဒိမ်း ကျူးလွန်တဲ့အမှု ၂ မှု ရှိပါတယ်။ အဲဒီ ၂ မှုက တော်တော်လေး လိုက်လုပ်ပေးရတယ်။ DNA စစ်ရတဲ့အဆင့်ထိ လုပ်ရတယ်။ အမှန်ဆိုရင် DNA စစ်ရတဲ့ အဆင့်အထိ မလိုဘူး။ စစ်ရတဲ့အဆင့် ရောက်အောင် လုပ်ကြတယ်”
နန်းဆိုင်နွမ်
ယခုဆောင်းပါးကို hiburma.net က ပြန်လည် ကူးယူဖော်ပြသည်။