လုပ်ငန်းဗီဇာဖြင့်လာပြီး လောင်းကစားပြုလုပ်နေသည့် တရုတ်နိုင်ငံသားများကို ဖမ်းဆီး
DVB
·
August 16, 2016
ရန်ကုန်တိုင်းဒေသကြီး လှိုင်သာယာမြို့နယ်မှာ လုပ်ငန်းဗီဇာနဲ့ လာရောက်တည်းခိုပြီး မာကျောက်လောင်းကစား ပြုလုပ်နေတဲ့ တရုတ်နိုင်ငံသား ၄ ဦးကို ဖော်ထုတ်ဖမ်းဆီးခဲ့တယ်လို့ မြန်မာနိုင်ငံ ရဲတပ်ဖွဲ့ရဲ့ ရဲဇာနည် ဖေ့ဘုတ်စာမျက်နှာ ဖော်ပြထားပါတယ်။
လှိုင်သာယာမြို့နယ်၊ မြို့မရဲစခန်းမှ ဒုရဲအုပ် ကျော်သက်ခိုင်နဲ့အဖွဲ့ဟာ သက်သေတွေနဲ့အတူ သြဂုတ်လ ၁၄ ရက်နေ့ မနက် ၁ နာရီခန့်က လှိုင်သာယာမြို့ (၆) ရပ်ကွက်၊ ပီမိုးနင်းလမ်း၊ အမှတ် ၁၈၁၅ ရှိ ကြာပန်းဟိုတယ်ကို ဝင်ရောက် ရှာဖွေခဲ့ပါတယ်။
ကြာပန်းဟိုတယ်မန်နေဂျာ မခင်သူဇာနဲ့ လုပ်ငန်းဗီဇာနဲ့ လာရောက်တည်းခိုနေကြတဲ့ လျှူဝီကောင်း အပါအ၀င် တရုတ်နိုင်ငံသား ၄ ဦးတို့ကို မာကျောက် လောင်းကစားရာမှာ အသုံးပြုတဲ့ ပစ္စည်းနဲ့ လောင်းကြေးငွေ ၁,၁၀၇,၂၅၀ ကျပ် ဖမ်းဆီးရမိခဲ့ပါတယ်။
ဟိုတယ်မန်နေဂျာ မခင်သူဇာနဲ့ တရုတ်နိုင်ငံသား လျှူဝီကောင်း အပါအ၀င် ၄ဦးတို့ကို လှိုင်သာယာမြို့မရဲစခန်း(ပ)၁၇၃၂/၂၀၁၆၊ လောင်းကစားဥပဒေပုဒ်မ ၁၃(က)/၁၄(က)ဖြင့် အမှုဖွင့် အရေးယူထားတယ်လို့ သိရပါတယ်။
