မြစ်သာမြစ်ရေတိုက်စားမှုကြောင့် မြစ်သာမြစ်ကူးကြိုးတံတား ၅ ပေခန့်တိမ်းစောင်း
DVB
·
August 10, 2016
မကွေးတိုင်းဒေသကြီး ဂန့်ဂေါခရိုင် ဂန့်ဂေါမြို့နယ်အတွင်းရှိ ဂန့်ဂေါမြို့နဲ့ ၃၈ မိုင်အကွာမှာရှိတဲ့ သာလင်း-မြင်သားမြစ်သာမြစ်ကူးကြိုးတံတားမှာ မြစ်ရေတိုက်စားမှုကြောင့် ဩဂုတ်လ ၄ နေ့က မြစ်အထက်ဖက်သို့ ၅ ပေခန့်တိမ်းစောင်းပြီး၊ ၁ ခွဲခန့်နိမ့်ဝင်မှုဖြစ်ပွားခဲ့ပါတယ်။
မြစ်သာမြစ်ကူးကြိုးတံတားကို ၂၀၀၆ ခုနှစ်က ကိုယ်ထူကိုယ်ထ တည်ဆောက်ခဲ့ကြတာဖြစ်ပြီး အလျား ၇၀၇ ပေ၊ အကျယ် ၆ ပေရှိကာ ကျေးရွာအုပ်စု နှစ်စုက ဒေသခံအိမ်ခြေပေါင်း နှစ်ထောင်ကျော်ရှိ ပြည်သူများ အဓိက သွားလာရတဲ့တံတားဖြစ်ပါတယ်။
အခုလို မြစ်ကူးကြိုးတံတားယိမ်းယိုင် တိမ်းစောင်းမှုကို မြို့နယ် အထွေထွေအုပ်ချုပ်ရေး ဦးစီးဌာနက ဒုဦးစီးမှုး၊ မြို့နယ် ကျေးလက်ဖွံ့ဦးစီးမှုး၊ ဆောက်လုပ်ရေးမှ AE တို့နဲ့ ဒေသခံ ကျေးရွာအုပ်စုအုပ်ချုပ်ရေမှူးတွေ ဩဂုတ်လ ၈ ရက်နေ့က သွားရောက်ကြည့်ရှုစစ်ဆေးခဲ့ကြပြီး တံတားဖြတ်သန်းမှုကိုတော့ ပိတ်ပင်တာတွေမလုပ်သေးဘူးလို့ သိရပါတယ်။
သတင်း၊ ဓာတ်ပုံ - သန်းဝင်းနိုင်
