လွှတ်တော်နှစ်ရပ်မှာ ဆွေးနွေးနေတဲ့ မျိုးစောင့်ဥပဒေမူကြမ်း ၄ ခုနဲ့ ပတ်သက်ပြီး လူ့အခွင့်အရေးချိုးဖောက်တဲ့ အချက်တွေနဲ့ အကြံပြုချက်တွေကို အရပ်ဘက်လူမှုအဖွဲ့အစည်း ၁၈၀က ထောက်ခံလက်မှတ်ထိုးပြီး လွှတ်တော်ကိုယ်စားလှယ်တွေနဲ့ ကော်မတီတွေထံ ဒီကနေ့ သွားရောက် ပေးပို့လိုက်ပါတယ်။
မြန်မာဗုဒ္ဓဘာသာဝင်မိန်းမများအထူးထိမ်းမြားခြင်းဆိုင်ရာဥပဒေကြမ်း၊ တလင်တမယားစနစ် ကျင့်သုံးခြင်းဆိုင်ရာ ဥပဒေကြမ်းတွေမှာ ပါဝင်တဲ့ အချက်တွေဟာ ၂၀၀၈ ခုနှစ် ဖွဲ့စည်းပုံအခြေခံဥပဒေနဲ့ အပြည်ပြည်ဆိုင်ရာ လူအခွင့်အရေးကြေညာစာတမ်း၊ ကလေးသူငယ်များ အခွင့်အရေးဆိုင်ရာ သဘောတူစာချုပ် စတဲ့ နိုင်ငံတကာစာချုပ်တွေပါ အချက်တွေကို ချိုးဖောက်နေတယ်လို့  ဆိုပါတယ်။
ဒါကြောင့် အမျိုးသမီးအခွင့်အရေးဆောင်ရွက်နေတဲ့ အရပ်ဘက်လူမှုအဖွဲ့အစည်းတွေက ဝေဖန်အကြံပြုချက်တွေကိုလွှတ်တော်ထံ သွားရောက် ပေးပို့လိုက်တာလို့ ကျားမတန်းတူညီမျှရေးကွန်ယက်က ဒေါ်မေစံပယ်ဖြူကပြောပါတယ်။
ဒီဥပဒေတွေပေါ်ပေါက်လာဖို့ စတင်ကြိုးပမ်းခဲ့တဲ့ အမျိုးဘာသာသာသနာ စောင့်ရှောက်ရေးအဖွဲ့ က မကွေးဆရာတော် ဦးပါမောက္ခကတော့ ဒီဥပဒေတွေဟာ မြန်မာနိုင်ငံအတွက် လိုအပ်နေတဲ့ ဥပဒေတွေ ဖြစ်တယ်လို့  မိန့်ပါတယ်။
အရပ်ဖက်အဖွဲ့အစည်းတွေကတော့ မျုိုးစောင့်ဥပဒေတွေအစား အမျိုးသမီးများအပေါ် အကြမ်းဖက်မှုတားဆီးကာကွယ်ရေးဥပဒေကြမ်းကို အမြန်ဆုံးရေးဆွဲအတည်ပြု ပြဌာန်းနိုင်ဖို့ အစိုးရအနေနဲ့ ပံ့ပိုးကူညီသင့်တယ်လို့ အကြံပြုထားပါတယ်။
